Read saamia Abagalatia 4 Bible Online

Abagalatia 4 - saamia bible

Abagalatia 4

¹Ndi ohweekesa endi, omwaana oyo naaba n'asisiiri omuyere, haba saaba naahira omuwaambe, kata neende naaba naali niye omweene busiha;

²nae aba n'asisiiri aasi w'abaliindi neende abahoonyi ohwoola hu ludaalo luba nilwateebwao neende laatang'ene.

³Nilwo lu siri neende efwe fwesi; nihwali nihusisiiri abayere, hwali abawaambe neende emyooyo kyomu syaalo muno.

⁴Nae esiha nisyali nisimalire ohwoola, Nasaae yatuma Omwaana wae, owebulwa neende omuhasi, owebulwa naali aasi w'amalako ka Musa,

⁵ ohununula abo abali aasi w'amalako ka Musa, hu hunyale ohunyoola ohudoolwa hube koti abaana ba Nasaae.

⁶Mani olwohuba muli abaana bae, Nasaae yatuma Mwooyo w'Omwaana wae yeengire mu myooyo kyeefwe Olira ati “Laata! Laata!”

⁷Mani ohubitira mu Nasaae, eng'we haba simusisiiri abawaambe, nae muli abaana, mani nimuba nimuli abaana, mani muli abomusiha.

⁸Hale nimwali ni mutaamanya Nasaae, mwali nimuli mu buwaambe bw'ebiindu bitaali nasaae daawe;

⁹nae bulaanu koti lu mumalire ohumanya Nasaae, oba awuundi Nasaae ohubamanya, munyala mutye haandi ohukobola enyuma haandi eyiri emyooyo mikata, emisabirisi eky'omusyaalo muno, nimudaha ohuba abawaambe baakyo ehabi liindi?

¹⁰Muhusaanga endaalo chiindi, neende emyoosi kiindi, neende ebiha biindi, neende emyaaka kiindi!

¹¹Ese ndi omuti olwohuba ndi koti owabanyahaniraho endyo olwebihaya byeene.

¹²Basyaange, mbekweeda mube koti lu undi, olwohuba ese syesi ndamala ohweehola ohuba koti lu muli. Simwaholaho esibi syoosi daawe;

¹³mumanyire ebilai byeene muti ohulwaala hw'omubiri kwaange nihwo ohwakera ndaanyala ohubayaalira Emboosi Ndai olwataangira;

¹⁴nae haandi kata neende obulamu bwaange bweecha bwaaba koti esiteemo yi muli, haba simwaambisamo emoni kata ohuundekeresa daawe, nae mwanjakaanira koti abakaanira malaika wa Nasaae, haandi koti lumubukaanira Kristo Yesu.

¹⁵Siina syeene haandi esyeecha syatula mu bwiichufu bu mwali nabwo obwo? Olwohuba ese nyala ohubatusira obuloli endi, siba nisyali nisinyaliha, mwahanyalire kata ohweyiyamo emoni cheeng'we mwachiimberesa.

¹⁶Haandi hane ndeeholere ohuba omusuku weeng'we hulw'ohubaboolera obwadyeeri?

¹⁷Abaandu baandi abo bali sa ohubeniinisiryaho hulw'ebihaya byeene; bali sa ohudaha babeekalire erwaanyi, hu munyale ohubekoomba muno.

¹⁸Olwohuba siba esichiiririrwa silai nikali mbwe onyala wekoombebwa muno, nae haba sikali mbwe nimba ni ndi alala naang'we lwoong'ene.

¹⁹Eng'we baana baange basisiiri abayere, mbachuunirwa koti omuhasi olumwa lwachuunisibwa ohwoola lumwaheehole koti lu Kristo mweene lu ali.

²⁰Ndahekoombere muno ohuba aambi naang'we, mani ndaanyala ohukaluhaniaho enomanoma yaange olwohuba mbelalihiire muno.

²¹Eng'we abekoomba ohuba aasi w'amalako ka Musa mumboolereho, haba simuli huwuliraanga bulai bi Malako kadaha?

²² Olwohuba syandiikwa siti, Abburahamu yali neende abaana basyaani babiri, mulala yi yeebula neende omuhasi muwaambe, neende owuundi yi yeebula neende omuhasi mulehuule.

²³Nae kali mbwe omusyaani w'omuhasi muwaambe yebulwa ohweema hu bwekoombi bw'omubiri, nae omusyaani w'omuhasi mulehuule yebulwa ohweema hu sisuubise.

²⁴Bulaanu huno n'ohukeraania mbwe: abahasi bano bali koti Endagaano chibiri. Ndala yohu lugulu lwa Sinai, ni yibulira abaana obuwaambe; niye Hagari.

²⁵Bulaanu, Hagari ali Olugulu lwa Sinai mu Buwaraabbu; mani akeraanisibwa neende Yerusalemu syaleero, olwohuba ali mu buwaambe alala neende abaana bae.

²⁶Nae Yerusalemu siri Muukuulu silehuule, haandi niye oli ng'ineefwe.

²⁷ Olwohuba syandiikwa siti, “Weehoye, ewe omuhasi mukuumba; Tuunduhe mani mwehuume, eng'we abatalumwaangaho ohwiibula; olwohuba abaana b'omuhasi walobwa bachia ohuba abaangi muno ohuhira abaana b'omuhasi oli neende omusaacha.”

²⁸Nae efwe, basyaange, koti sa Yisaka, huli abaana b'esisuubise.

²⁹ Nae koti sa lu siha syeene sira, koti omusyaani webulwa ohweema hu bwekoombi bw'omubiri yaboneresaanga omwaana wali niyeebulwa ohweema hu Mwooyo wa Nasaae, mani nilwo lu siri kata neende bulaanu buti.

³⁰ Nae ebyandiiko byoolerefu biboola bitye? Biboola biti, “Yirusa omuhasi muwaambe oyo neende omwaana wae mweene; olwohuba omusyaani w'omuhasi muwaambe oyo, haba saachia husihira alala neende omusyaani w'omuhasi mulehuule.”

³¹Mani sakira basyaange, efwe haba sihuli abaana b'omuhasi muwaambe, nae huli abaana b'omuhasi mulehuule.