Read saamia Abagalatia 5 Bible Online

Abagalatia 5 - saamia bible

Abagalatia 5

¹Obuboolole nabwo, Kristo yatuboolola; mani mumenye nimuli abalehuule, haandi mutoola ohweyingisaho ehabi liindi mu bulamu bw'obuwaambe.

²Bulaanu ese Paulo, ndi ohubaboolera endi, nimuchia mwaahebwa, Kristo aba achia ohuba otaali neende obuhoonyi bwoosi yi muli.

³Ndi ohuboolera buli muundu yeesi ochia yaahebwa endi, mani ahoyere ohwooseresa bi Malako ka Musa kadaha byoosi.

⁴Muba mumalire ohwehalaka hu Kristo, eng'we ababa bachia ohuholwa abahoyera neende amalako ka Musa; muba mumalire ohweekabulira elalira ohutula hu mbabaasi cha Nasaae.

⁵Nae efwe, esuubi lyeefwe liri liti Nasaae achia ohutuhola abaluungifu ohubitira mu Mwooyo wae haandi ohweema hu fukiirira yeefwe.

⁶Olwohuba mu Kristo Yesu, oba ohuhebwa oba obutahebwa, haba sisiri neende obuhoonyi bwoosi, nae efukiirira niyo eyihola niyibitira mu buheeri.

⁷Mwali nimuli ohukeenda bulai muno; nae wiina mweene owabakayira ohufukiirira obwadyeeri?

⁸Ohuserera huno haba sihutula eyiri oyo obalaangaanga.

⁹ Amamera madiidi muno kanyala ohubbaaha esiniho siingi syoosi.

¹⁰Ndi neende obweesike mu Omwaami endi eng'we haba simuchia hubukula embaasa yiindi ohutusaho eyaange yino; nae oyo oli ohubanyasaanga achia ohukiinga omusaango kwae omweene, kata neende naaba naali wiina mweene.

¹¹Nae basyaange, nikali mbwe ese mweene siyalaanga sa ohuhebwa, ni lwasiina mba nisiboneresebwaanga? Syeekesa mbwe mu mboosi eyo, esichihi sino esyegumusa omusalabba syamala ohutusibwayo.

¹²Ndi ohusaba endi abaandu bali ohubadengaanianga abo bahoya baachia beelada abeene mani!

¹³Olwohuba eng'we basyaange, mwalaangirwa obulehuule; ohutusaho mbwe mutachia haandi mwachaaka ohwehoonyera obulehuule obwo koti ehabi y'ohuhola bi obwekoombi bw'omubiri bubayiika muhole, nae ohubitira mu buheeri, muhoyere mwehole abahalaabani b'abasyeeng'we.

¹⁴ Olwohuba amalako ka Musa koosi kabuusibwa koosereswa mu mboosi ndala mbwe, “Heraanga owaasyo, koti weheera omwene.”

¹⁵Nae nikali mbwe mulumana haandi nimuliichana abeene-na-beene, mweliinde mani mutoola ohumalanao abeene-na-beene.

¹⁶Nae ndi ohuboola endi, keendereenge mu Mwooyo, hu muhaye ohuloondaanga obwekoombi bw'omubiri.

¹⁷ Olwohuba obwekoombi bw'omubiri, buyiinganianga Mwooyo, nae ebidahibwa by'Omwooyo, byosi biyiinganianga eby'omubiri; olwohuba ebiindu bino byoosi, haba sibinyala ohuchiana, hubihukayire ohuholaanga byooba niwahadahireenge ohuhola.

¹⁸Nae nooba niwiimiriirwe neende Mwooyo, haba soonyala waatukwa neende Amalako ka Musa.

¹⁹Bulaanu, ebihole by'omubiri biri alafu biti: obucheke, esifwaabi, obwekoombi,

²⁰ohwiinamira emisaambwa, obulakusi, obusuku, ohuyiriimbana, ehali-hali, etima, obwimani, ohwekabulanamo, ohweeholamo emikaanda,

²¹ehiinda, obutemo, obumeesi, ebiyumo neende ebiindi ebifwaana bityo. Mbalabula, koti lundabalabulaho hale endi, abo abahola ebiindu bifwaana bityo, haba sibacha ohwiingira mu Obwaami bwa Nasaae.

²²Nae esyaamo sya Mwooyo, ni ebiindu koti, obuheeri, esangaalo, omuleembe, ohwesimiirisa, esisa, obulai, obweesikwa,

²³obuwulisi, alala neende ohweliinda omweene. Abulao amalako koosi akachooma ebiindu bino byoosi.

²⁴Abaandu ba Kristo Yesu baba nibamala ohwiitira elalira obwekoombi neende ebiwonya by'emibiri kyaabwe.

²⁵Mwooyo yamala ohutukabula omukabo okwa obulamu; mani sakira niye oba n'ahoyeere ohuba n'atuka obulamu obweefwe.

²⁶Hutabechaangaho neende ohweniinia kata sa ohutangana abasyeefwe, kata sa ohudiiriraanga abasyeefwe ehali-hali.