Read saamia Abagalatia 6 Bible Online

Abagalatia 6 - saamia bible

Abagalatia 6

¹Basyaange, omuundu yeesi niyeecha yayingirwa neende esibi syoosi, eng'we ababa nimuli abaluungifu, muhoyere ohumukololaanga mu mwooyo muloonga. Mweebonereho abeene, awuundi mwesi munyala mwoola ohuteemwa.

²Honyeenge abasyeeng'we ohukiingaanga emikuku kyaabwe, hu munyale ohwooseresaanga amalako ka Kristo.

³Olwohuba omuundu yeesi naaba niyebaasa ati alimo echamu, nae hane muhaya mweene, aba ali ohwebacha omweene.

⁴Nae mulehe buli muundu alingaale abone koti lu biima byae biri. Nibiri esibi, ao anyala ohweniinia omweene olw'ebyo bi yahola omweene, ataali ohwekeraania neende omulimo kw'omuundu wuundi.

⁵Olwohuba buli muundu achia ohukiingaanga omugugu kwae omweene.

⁶Lehe oyo yeesi oba niyeekeswaho emboosi ya Nasaae yoosi, akabane ebiindu bilai byoosi neende oyo oba niyeekesaanga emboosi eyo.

⁷Mutabachibwa daawe; Nasaae haba saakachulwaanga, olwohuba buli siindu si muundu ataaka, nisyo sy'achia ohukesa.

⁸Olwohuba oyo yeesi oba nataakiraanga omubiri kwae omweene, aba achia ohukesa ebibi bitula mu mubiri; nae oyo otaakira Mwooyo achia ohukesa obulamu butaakama.

⁹Mani mulehe hutajoong'a ohuholaanga ebilai, olwohuba esiha sihoyere syeene nisyahoole huchia ohukesa, nihutawaamo omwooyo.

¹⁰Mani sakira koti lu husisiiri neende ehabi eyo, lehe huholereenge abaandu boosi ebilai, haandi ohuhirira elalira abo ababa nibali mu nyuumba y'abaandu bali neende efukiirira mu Kristo.

¹¹Muboneho sa mani obuhoongo bw'enukuta chiindi ohubaandiikira neende omuhono kwaange kweene.

¹²Ni abo abadaha ohwewulirira mu mubiri abachia ohubayiikaanga muhebebwe, mbwe hu banyale ohutasaandisibwa hulw'omusalabba kwa Kristo.

¹³Olwohuba kata abo abahebwaanga, abeene sibanyalaanga hwooseresa amalako ka Musa koosi nae badaha eng'we muhebwe hu banyale ohwewulirira sa mu mibiri kyeeng'we.

¹⁴Nae ese haba sinyalaho kata nabudiidi ohwefumia hulw'esiindu syoosi ohutusaho ohwefumisirya mu musalabba kw'Omwaami weefwe Yesu Kristo, okwanyala ohubaamba esyaalo syoosi yi ndi haandi syeesi omweene ohubaambwa eyiri esyaalo.

¹⁵Olwohuba kata haba sihuhebwa hwoong'ene ohulimo amahuluundu oba ohutahebwa hwoong'ene ohulimo amahuluundu, nae esihuluundu sihira ni ohuloongwa buyaaha.

¹⁶Omuleembe neende embabaasi bibe hu abo boosi abakeendera mu lako lino, neende eyiri Yisiraeli yoosi eya Nasaae.

¹⁷Mani ohweema hu ako koosi, lehe omuundu yeesi yaakame ohusaandyaanga; olwohuba ngiingire hu mubiri kwaange embala cha Yesu.

¹⁸Embabaasi ch'Omwaami weefwe Yesu Kristo chibe mu myooyo kyeeng'we, basyaange. Amiina.