Read saamia Abaefeso 5 Bible Online

Abaefeso 5 - saamia bible

Abaefeso 5

¹Mani sakira mubecheenge ababonera hu Nasaae, koti abaana baheerwa.

² Mani mukeendereenge mu buheeri, koti Kristo yatuheera yeyaanayo omweene hulweefwe, esiyaanwa syesing'aari, haandi esiyaanwa sya Nasaae.

³Nae obudaamba neende ebiindu by'omufuto byoosi, oba obwekoombi sibihoyere kata ohutumbulwaanga mweeng'we, koti ebihoyera ohuba mu baandu boolerefu.

⁴Mutakanyaanga esiindu syesibboli syoosi sibabaamo, oba embaha y'obusiru, kata sa ohuyemula, ebitahoyera; nae mu bweyaango bweebyo, abeecheengeo ohweebasaanga sa Nasaae.

⁵Mwehalirise sino, mbwe abulao omudaamba yeesi oba omuundu w'omufuto, oba omuundu mwekoombi (esyeekesa ow'emisaambwa), oli neende obusiha mu bwaami bwa Kristo neende obwa Nasaae.

⁶Mutalehaanga omuundu yeesi ababachirisa neende emboosi chitaalimo amahuluundu, olwohuba ni hulw'ebiindu bifwaana biti obwaalaba bwa Nasaae bweehera hu baana b'obutawulira.

⁷Mani sakira mutaholeganaangaho nabo,

⁸olwohuba mwesi hale mwalichiingi esiirima syeene, nae bulaanu muli obulafu mu Omwaami; mani keendeenge koti abaana b'obulafu,

⁹(olwohuba esyaamo situla mu bulafu, sinyoolehanira mu biindu byoosi ebilai, haandi ebiluungifu haandi ebyadyeeri),

¹⁰mani muteemeho ohweeka ohuholaanga ebisaangaasa Omwaami.

¹¹Muteyingisaanga mu huhola ebiindu bitaalimo obuhoonyi eby'esiirima, nae mu bweyaango bw'ohuhola mutyo, eng'we mubituumbuleenge sa.

¹²Olwohuba by'esoni nibyo kata ohulomaloma hu biindu bi baandu abo bahola mu bweekisi;

¹³nae esiindu syoosi nisikisulwa neende obulafu, siicha syabonehana, olwohuba esiindu syoosi esibonehana nisyo obulafu.

¹⁴Mani sakira siboolwaanga siti, “Simuha, Ewe nandoolo, mani osiingire otule mu bafu, mani Kristo achia ohuhuberesa obulafu.”

¹⁵Mani tingaala bulai obone koti lwokeenda, otaba koti otaali omusiru nae koti oli omukesi,

¹⁶ mani wehoonyereenge bulai muno ebiha byoosi, olwohuba endaalo chino mbi.

¹⁷Mani sakira, mutabeechaanga abasiru, nae manyeenge si Omwaami aba n'adaha.

¹⁸Haandi mutameraanga amalwa, olwohuba kachia ohubanyaasa, nae mwiichusweenge neende Mwooyo,

¹⁹ nimukerakirana neende abasyeeng'we mu sabburi neende enyembo ch'ediini neende enyembo cha Nasaae, nimweemba haandi nimuchiluungira Omwaami neende omwooyo mulala,

²⁰buli siha syoosi, neende hulwabuli siindu syoosi, nimweebasaanga Nasaae Seefwe mu liita ly'Omwaami weefwe, Yesu Kristo.

²¹Buli muundu aticheenge owaasye ohweema hu hwiisa oluyaali mu Kristo.

²² Abahasi, yiseenge oluyaali mu abasaacha beeng'we koti lumwaheesa oluyaali mu Omwaami.

²³Olwohuba omusaacha niye omutwe kw'omuhasi koti lu Kristo ali omutwe kw'abafukiiriri, abali omubiri kwae, nae omweene ali Omuwonia waabwe.

²⁴Koti lu bafukiiriri batya Kristo, nilwo lu bahasi bosi baba batye mu buli ngeri yoosi, abasaacha baabwe.

²⁵ Abasaacha, hereenge abahasi beeng'we, koti lu Kristo yaheera abafukiiriri mani yeyaanayo omweene hulwaabwe,

²⁶hwaanyale ohubalabya n'amalire ohuboosa neende ohwoosa hw'amaachi, alala neende emboosi,

²⁷hwaanyale ohwediisa omweene abafukiiriri abo, neende obulai, nibabulaho ekoondo lyoosi, kata sa ohweekoda hwoosi, oba esiindu syoosi esifwaanaho sityo, hu banyale ohuba aboolerefu haandi ababulaho obubi bwoosi.

²⁸Kata katyo, abasaacha bahoyere ohuheeraanga abahasi baabwe koti lu baheera emibiri kyaabwe. Omusaacha yeesi oheera omuhasi wae aba yeheera omweene.

²⁹Olwohuba abulao omuundu yeesi osyuulangaho omubiri kwae kweene, nae akuliinda haandi yakuliisa, koti lu Kristo aholaanga abafukiiriri,

³⁰olwohuba huli ebituundu by'omubiri kwae.

³¹ “Hulw'esifune sino, omusaacha achia ohulehaanga laatang'ene neende ng'ina, yeyambaanie neende omuhasi wae, mani boombi babe omubiri mulala.”

³²Esyaama sino sihuluundu muno, haandi ndi ohuboolaanga endi, sidiira hu Kristo neende abafukiiriri;

³³nae kata katyo, lehe buli mulala hweeng'we aheereenge omuhasi wae koti lu yedaha omweene, haandi lehe omuhasi aboneenge ati yeesa mu wamwe oluyaali.