Read saamia Abafilipi 1 Bible Online

Abafilipi 1 - saamia bible

Abafilipi 1

¹ Ohutula eyiri Paulo neende Timoteo, abahalaabani ba Kristo Yesu, Niyichiira aboolerefu ba Nasaae abali mu bulala neende Kristo Yesu, alala neende abeemeresi b'emikaanda ky'abafukiiriri alala neende abahoonyi baabwe.

²Lehe Nasaae Seefwe, alala neende Omwaami Yesu Kristo, bababe embabaasi neende omuleembe.

³Buli luumbabaasaho, ndeebasa Nasaae hulweeng'we;

⁴haandi buli siha siimbasabira, mbasabiraanga neende esangaalo,

⁵olwohuba mwahoonya ohuhalaabanira Emboosi Ndai, ohuchaakira elalira hu ludaalo lwataangira ohwoola bulaanu.

⁶Sakira manyire neende omwomiifu endi, Nasaae wachaakisa omulimo mulai mweeng'we, achia ohwemeeda nakwo ohwoola lwaalikumaliirisira hu ludaalo lwa Kristo Yesu.

⁷Buli siha muli mu mwooyo kwaange! Mani sakira silai mbabaaseho endyo. Olwohuba eng'we mweesi mwakabanira alala naange mu mbabaasi chi Nasaae yaamberesa, ni ndi mu jeela bulaanu, haandi neende nindali omulehuule ohulwaanirira Emboosi Ndai neende ohuyoomiisira elalira.

⁸Nasaae niye omuloli waange omanyire ati ndi ohuboola obwadyeeri endi, ohubaasa humbabaasaho, hubaasa hwa Yesu Kristo hweene.

⁹Ese saba endi, ohuheerana hweeng'we hwemeede ohuhula-hulana, alala neende ohumanya buli siindu neende ohutegeera bulai,

¹⁰hu munyale ohumanya ohukabuhania esiindu siba nisihiramo obulai mu byoosi. Ao muchia ohumenya nimubulaho ekoondo lyoosi, neende ohufunaanwa hwoosi hu ludaalo lwa Kristo.

¹¹Obulamu bweeng'we boosi bucha ohwaama ebyaamo by'ebiima bilai bi Krisito mweene aleeta mani byaaberesa Nasaae oluyaali neende efuma.

¹²Basyaange, ese ndaha mumanye muti, esiindu syandeholehaho, syahoonya muno ohusalaania Emboosi Ndai.

¹³ Esyatulamo syali siti, abaliindi b'edooho boosi, alala neende abaandu baandi boosi banyala ohumanya bati ndi mu jeela hulw'ohuhalaabanira Kristo;

¹⁴haandi ohumenya hwaange mu jeela hwaberesa abasyaange bahira obuungi abafukiirira Omwaami amaani kohwemeeda ohuyaala Emboosi ya Nasaae neende ekono ly'aakulu ataali ohutya hwoosi.

¹⁵Mubwadyeeri bweene abaandu baandi bali ohuyalaanga Kristo ohweema hu hali-hali neende obusoolo nae abaandi beekesa neende embaasa ndai.

¹⁶Abaandi bano bahola batyo mu buheeri, olwohuba bamanyire bati bandeeta ano ohuyira omusaango kwaange eyiri Emboosi Ndai.

¹⁷Nae abaandi bala bayaala Kristo ohweema hu siwonya ataali obwadyeeri, haandi abeene badaha ohweniinia aakulu sa; babaasa bati banyala ohundeetera ebidinyu nisisiiri mu jeela.

¹⁸Nae mbula emboosi yiindi yoosi ohutusaho sangaala sa, olwohuba mu ngeri yoosi baba beekesa sa Kristo, kata ebichiiririrwa byaabwe byahaba nibiri ebihyaamu oba ebikololofu. Haandi ese njia ohwemeeda ohusangaala,

¹⁹olwohuba manyire endi, ohweema hu husaba hweeng'we, neende obuhoonyi butula eyiri Mwooyo Mwoolerefu wa Kristo, bachia ohumboolola ohutula mu jeela.

²⁰Esiindu sihira ohwekoomba neende ohusuubira muno nisyo siti, haba siinjia huhaywa ohwooseresa omulimo kwaange, nae endi ebiha byoosi kata bulaanu buti, njia ohuba neende esinani siingi esiteeta oluyaali lwa Kristo mu mubiri kwaange, kata andahabao omulamu oba niifwa.

²¹Nae eyiri ese, ohuba omulamu olwo nilwo oluyaali lwa Kristo, haandi ohufwa nihwo ohunyoola amagoba.

²²Nae nindemeeda ohuba omulamu mu mubiri, ao mba njia ohwemeeda ohuhola omulimo mulai kuundi; bulaanu ese ngoterwe esiindu sihoyere ohudoola.

²³Ebibaaso bibiri bino biingabuhaaniemo akatikaati; ndaha muno ohuleha obulamu buno njie mbe neende Kristo, esyo nisyo esihiramo obulai;

²⁴Nae hulw'obulai bweeng'we, silai ndoong'e ni ndi omulamu.

²⁵Manyire sino bulai bweene mani sakira nyomiisa endi njia ohudoong'a ni ndi omulamu. Njia ohuba naang'we mweesi ohubameedamo obuloli endi mudoong'e nimuhula-hulana neende esangaalo mu fukiirira.

²⁶Mani sakira, ninjia ohuba naang'we haandi muchia ohuba neende esangaalo liingi mu bulala bweeng'we mu Kristo.

²⁷Esihirira elalira nisyo mbwe, ebiima byeeng'we bihoyere bibe koti Emboosi Ndai ya Kristo yidaha, kata ni mba niinjichire ohubabona, oba nimbulira-buwulira ebibadiiraho. Mube abomiifu muno neende esichiiririrwa silala, haandi mulwaanire alala neende embaasa ndala eyitula mu Mboosi Ndai.

²⁸Mutatichaanga abasuku beeng'we, nae buli siha mubecheenge neende esinani, olwohuba esyo nisyo esichia ohubeekesa siti bachia ohuhirwa, nae eng'we ning'we abachia ohuhira, olwohuba Nasaae niye ochia ohukera muhire.

²⁹Olwohuba Nasaae yamala ohubaberesa ehabi ati, ataali ohufukiirira mu Kristo hwoong'ene, nae neende ohumusaandira hwosi.

³⁰ Olwohuba ohulwaana hu muli nahwo bulaanu, nihwo nasilala neende humwaambona ninwaana mu biha byabita, haandi humuwulira muti sisiiri ninahwo.