Read saamia Abafilipi 2 Bible Online

Abafilipi 2 - saamia bible

Abafilipi 2

¹Obulamu bweeng'we mu Kristo bubameedamo amaani, haandi obuheeri bwae bubagumia emyooyo. Muli silala neende Mwooyo. Mwooyo yabaambaania alala, mani muli neende ohudiirira abasyeeng'we esisa alala neende ohubaleheramo.

²Bulaanu mbekweeda muusangaasire elalira nimuba neende ebibaaso bifwaana, neende ohuheerana hufwaanana, mani mubecheenge silala mu myooyo kyeeng'we neende mu bibaaso byeeng'we.

³Mutaholaanga esiindu syoosi nimulwaanira oluyaali, oba nimudaha ohwelyooyia hutaalimo obuhoonyi, nae mubecheenge abaloonga mu moni w'abaasyeng'we, nimubayira koti abali neende oluyaali ohubahira.

⁴Haandi buli muundu hweeng'we abaseenge hu siiindu si waasye aba n'adaha ataali ohubasaanga sa hu si mweene aba n'adaha.

⁵Ebibaaso byeeng'we bihoyere ohubechaanga koti bi Kristo yali nabyo,

⁶kata neende niyali naali silala neende Nasaae, haba siyatemaho ohwehoonyera amaani ako ohudoong'a niyaakana neende Nasaae.

⁷Ohutusaho, omweene yemalaho ebiindu byoosi, mani yehola koti omuhalaabani muwaambe. Yebulwa koti omuundu mani yeecha yafwaana koti omuundu.

⁸Yali omuloonga, mani yakeendera mu buwulisi ohwoolera elalira mu hufwa, ohufwa hwae hu musalabba.

⁹Mani sakira Nasaae yamuniinia aakulu muno, haandi yaamuberesa eliita ly'oluyaali lihira ameeta koosi.

¹⁰Mani sakira ohweema hu luyaali lw'eliita lya Yesu, ebiloonge byoosi ebiri Muukulu neende hu syaalo, neende aasi w'esyaalo, bichia ohusigama aasi biberese eliita lya Yesu oluyaali

¹¹haandi enimi choosi chichia ohutuumbula chiti, Yesu Kristo niye Omwaami, nichiberesa Nasaae Laatang'ene oluyaali.

¹²Sakira, basyaange baheerwa, koti lu mwambuliraanga, buli siha ni ndi naang'we, mani bulaanu muhoyere ohuumbulira ohuhirao, koti lu taali aambi naang'we. Mwemeede ohuhalaabanira obuwonia bweeng'we mu hutya neende mu luteengo.

¹³Olwohuba Nasaae niye oli ohubaholeramo ebiha byoosi naakera nimufukiirira haandi nimunyala ohuhola by'adaha.

¹⁴Holeenge buli siindu syoosi ataali ohwekanyiirisa oba ohuyiingana,

¹⁵hu munyale ohuba nimutaaliho esiindu syoosi sibabafunaana, nae mube abaluungifu koti abaana ba Nasaae ababulaho esyonoono, abamenya mu syaalo sy'abaandu badoondobanu haandi abonooni. Mani muhoyere ohubaaduhamo, koti eng'ining'ini chihosa mu syaalo,

¹⁶nimwomiriire hu Mboosi y'obulamu. Nimuhola mutyo mba njia ohuba neende esifune esy'ohubehoyeramo hu ludaalo lwa Kristo, olwohuba sichia ohweekesa siti amaani kaange koosi alala neende omulimo kwaange, haba sibyali eby'ebihaya.

¹⁷Kata amabaanga kaange kahaba nikachuhibwa aasi hu siyaanwa sy'ohweyaanayo sy'efukiirira yeng'we eyiri Nasaae. Nisiba sityo, ndi omusangaafu ohukabana esangaalo lyaange naang'we mweesi.

¹⁸Mu ngeri nasilala, mwesi muhoyere ohukabana esangaalo lyeeng'we alala naange.

¹⁹Nihuli ohudaha hw'Omwaami, suubira endi njia ohubatumira bwaangu Timoteo, hu nyale ohugumisibwa neende emboosi echibadiiraho.

²⁰Yibulao omuundu wuundi ohutusaho oyo yeeng'ene obachuunirwa koti ese.

²¹Abadoong'ereo boosi bafwa hu biindu byaabwe byoong'ene, ataali ohubaasa hu bidiira hu Kristo Yesu.

²²Haandi mwesi mumanyiire elalira koti lu Timoteo yekesera elalira ati anyala omulimo okwo bulai, haandi koti omwaana neende laatang'ene, hwahalaabanira alala ohweekesa Emboosi Ndai.

²³Suubira ohumutuma yi muli ndaafwa ndamanya koti lu njia ohuba.

²⁴Haandi suubira mu Omwaami endi ese mweene njia ohwiicha eyo bwaangu.

²⁵Haandi mbaasire endi sihoyera ohubatumira omwaana weeng'we Epafurodiito yesi owamala ohuhalaabana tuma yi muli omwaana weefwe wuno Epafirodito owamala ohuhalaabana naahola koti wamwaanda weeng'we ohuhoonyera.

²⁶Yekoomba muno ohubabona mweesi, haandi yachunisibwa muno mu mwooyo ohuwulira ati mwamanya n'alwaala.

²⁷Mubwadyeeri bweene yali omulwaaye muno yoola aambi ohufwa. Nae Nasaae yeecha yaamukwiira esisa, haandi syesi yangwiira esisa, hu nyale ohutaba neende esibeera siingi muno.

²⁸Sakira ndi omwetekefu ohumutuma yi muli, hu nyale ohusangaala nimubweene haandi, hu sibeera syaange siwe.

²⁹Sakira mumwakaanire neende esangaalo liingi koti abakaanira omwaana weeng'we mweene mu Omwaami. Haandi mwiseenge oluyaali mu baandu bafwaana batyo,

³⁰olwohuba yeyanayo obulamu bwae yawona ohufwa hulw'ohuhalaabanira Kristo, hwaanyale ohuumberesa obuhoonyi bu eng'we mutanyala ohuumberesa.