Read saamia Abakolosaayi 1 Bible Online

Abakolosaayi 1 - saamia bible

Abakolosaayi 1

¹Ohutula eyiri Paulo, ohweema hu hudaha hwa Nasaae, oli omutume wa Kristo Yesu, neende ohutula eyiri Timoteo omwaana weefwe.

²Ohuchiira aboolerefu haandi abeesikwa basyeefwe mu Kristo abamenya mu Kolosaayi: Embabaasi cha Nasaae Seefwe neende omuleembe kwae bibe naang'we.

³Efwe hwamenya nihweebasaanga muno Nasaae laatang'ene Omwaami weefwe Yesu Kristo, buli lu hubasabiraanga,

⁴olwohuba hwamala ohuwulira ebidiira hu fukiirira yeeng'we mu Kristo Yesu haandi neende ohudaha hweeng'we koti lu mwaheera aboolerefu boosi,

⁵ohweema hu sisuubise syababiihirwa Muukulu. Mwamala ohuwulira hu syeene sino mu mboosi y'obwadyeeri, Emboosi Ndai

⁶eyabeechera, koti mubwadyeeri bweene yeecha mu syaalo syoosi mu yiri ohwamaanga ebyaamo haandi niyihula yityo mweeng'we, ohutulira elalira hu ludaalo lu mwawuliirira haandi mwamala mwamanyira elalira embabaasi cha Nasaae koti lu chiri mubwadyeeri,

⁷ koti lu mwacheeka ohutula hu Epafura omuhalaabani waasyefwe muheerwa. Muhalaabani mweesikwa muno mu Kristo hulweefwe

⁸haandi niye owatuboolera hu buheeri bweeng'we mu Mwooyo.

⁹Mani, ohutulira elalira hu ludaalo lu hwawulirira hu buheeri obwo, hutaalehaho ohubasabiraanga, nihwekoomba huti, mwesi mwiichusibwe neende ohumanya naadaha mu makesi k'omwooyo neende ohumanyaanga,

¹⁰ohumenyaanga obulamu buhoyere ohuba mu Omwaami, obumusangaasira elalira, nibwaama ebyaamo mu buli mulimo mulai, haandi nibwemeeda ohumanyaanga Nasaae.

¹¹Muhoyere ohwomiisibwaanga neende amaani koosi, akeema hu buhunuufu bwae bw'oluyaali, mu hwomiira hwoosi neende ohwesimiirisaanga neende esangaalo,

¹²nimweebasaanga Seefwe, owanyala ohutuhola abahoyera ohukabana hu mukabo kw'aboolerefu mu bulafu.

¹³Yanyala ohututusa mu bunyala bw'esiirima, haandi yatukiinga yaatuleeta mu Bwaami bw'Omwaana wae mukoosi,

¹⁴ yi hunyooleramo ohununulwa, neende ohuleherwamo ebyonoono.

¹⁵Kristo niye esifwaanani sya Nasaae otanyala ohubonehana, haandi niye omwiikula-nda w'ebiindu byoosi ebyaloongwa;

¹⁶olwohuba ohubitira mu mweene oyo nimwo mu Nasaae yaloongera ebiindu byoosi ebiri Muukulu neende hu syaalo, ebibonehana neende ebyo ebitabonehana, kata obutuki bwoosi, oba obuhoongo bwoosi, endekeha choosi, oba obunyala bwoosi, ebiindu byoosi byaloongwa ohubitira mu mweene oyo, haandi hulw'omweene oyo.

¹⁷Kristo yaliwo ebiindu byoosi nibitaabaao, haandi ni mu mweene oyo nimwo mu biindu byoosi binyala ohwomiisibwa alala.

¹⁸ Niye omutwe kw'abafukiiriri, omubiri kwae; niye enjaako, omwiikula-nda w'abasyuuha ohutula mu bafu, hu bulaanu anyale ohuba omutaangirisi mu buli siindu.

¹⁹Olwohuba ni mu mweene oyo, nimwo mu Nasaae yeesi yasiima ohumenya,

²⁰ haandi ohubitira mu mweene oyo hu Nasaae anyale ohusasaania niyekalusaho ebiindu byoosi, kata ebiba nibiri hu syaalo, oba Muukulu, niyehoonyera amabaanga k'omusalabba kwae ohutaao omuleembe.

²¹Haandi eng'we, abali hale nimwakabuhana haandi nimwasyuulana mu bibaaso, nimuholaanga ebihole bibi,

²²bulaanu anyale ohuba n'amalire ohubasaasanisiria mu mubiri kwae kw'enyama ohubitira mu hufwa hwae, hwaanyale ohubayira mu moni wa Nasaae nimuli aboolerefu, haandi abataaliho neende esyonoono syoosi, haandi abatanyala ohulekeereswa,

²³nikali mbwe muchia ohuchiiririra nimuli neende efukiirira, ohuba ab'amaani haandi abomiifu, nimutakaluuhana ohutula hu suubi ly'Emboosi Ndai yi mwawulira, eyamala ohuyaalirwa buli siloonge syoosi esiri aasi w'Ekulu, haandi eyeene eyo yi ese Paulo mweene ndeehola ohuba omuhalaabani wayo.

²⁴Bulaanu ndi ohusangaalira mu husaandisibwa hwaange hulweeng'we, nae mu mubiri kwaange, ndi ohumaliirisaanga ebyo ebitoolerera mu huchuunisibwa hwa Kristo hulw'omubiri kwae, okulaangwa mbwe abafukiiriri,

²⁵okweene okwo ku syesi ndeecha ndeehola ohuba omuhalaabani wakwo ohweema hu mulaanga kutula Muukulu okwambereswa hulweeng'we, ohukera Emboosi ya Nasaae yimanyihane mu bwiichufu,

²⁶esyaama syakisibwa hu mbaka ndeeyi, haandi hu njibulo nyiingi muno, nae bulaanu esyabwihuliirwe aboolerefu bae.

²⁷Eyiri abeene abo Nasaae yaheengao ohukera bamanye obuhunuufu yi bwaaka obuli mu Abateende engaanga y'oluyaali lw'esyaama sino, esiri nisyo Kristo oli mweeng'we, esuubi ly'oluyaali luhoongo muno.

²⁸Oyo niye yi efwe huyaala, nihulabula buli muundu haandi nihweekesa buli muundu neende amakesi koosi, hu hunyale ohuyira buli muundu naali omwaangafu mu Kristo.

²⁹Mani ni hulw'esifune syeene sino, sakira ndidiihana, nindeemaho ohuhola neende amaani kosi, esiindu syoosi si anyala ohuba ni yandeeremo ohuhola.