Read saamia 1 Abatesalonika 1 Bible Online

1 Abatesalonika 1 - saamia bible

1 Abatesalonika 1

¹Ebbarwa yitula eyiri Paulo, Silifaano[1], neende Timoteo, eyichiira Abafukiiriri Batesolonika, ba Nasaae Seefwe haandi neende ba Omwaami Yesu Kristo adoola. Embabaasi neende emuleembe bibe naang'we.

²Hweebasaanga Nasaae ebiha byoosi, hulweeng'we, haandi buli ludaalo hubatuumbulaanga mu husaba hweefwe.

³Hwiichulisaanga mu moni wa Nasaae weefwe haandi Seefwe koti muta efukiirira yeeng'we mu biholwa, haandi koti obuheeri bweeng'we bukera nimuhalaabana neende amaani, haandi koti esuubi lyeeng'we mu Omwaami weefwe Yesu Kristo liri elyomiifu.

⁴Baasyaange, humanyire huti, Nasaae yabaheera haandi yabadoola mube abaandu bae beene.

⁵Olwohuba Emboosi Ndai yi hwabaleetera, si yali ohulomaloma emboosi sa choong'ene, nae yeechera mu maani neende mu Mwooyo Mwoolerefu, neende mu ohwomiisira elalira obwadyeeri bwayo. Mumanyire koti obulamu bweefwe bwali nihwali eyo naang'we, mani hweeyira hutyo hulw'obulai bweeng'we bweene.

⁶ Mwabonera hweefwe neende hu Omwaami; mani kata nimwasaanda muno mutyo, mwaakaanira sa emboosi eyo neende esangaalo litula eyiri Mwooyo Mwoolerefu.

⁷Mani sakira mweehola esyohuboneraho eyiri Abakristo boosi abali mu Makedonia neende mu Akaya.

⁸Olwohuba emboosi chidiira hu Omwaami echachaakira mweeng'we haba sichoola mu Makedonia neende Akaya mwoong'ene nae emboosi chidiira hu fukiirira yeeng'we mu Nasaae yakera chasalaanira buli abuundu woosi. Mani sakira hubula esy'ohulomaloma siindi.

⁹Olwohuba abaandu b'eyo boosi balomalomaanga sa koti lu mwatwaakaanira nihwabakeniya, haandi koti lu mwalehana neende ohwiinamiraanga emisaambwa, mani mwaakobola eyiri Nasaae, ohuhalaabanira Nasaae wadyeeri, haandi omulamu.

¹⁰Haandi koti lu muli ohuliindiriraanga Omwaana wae akobole naatula Muukulu, oyo niye Yesu, yi Nasaae yasyuuhisa ohutula mu bafu, haandi niye ochia ohutuwonia etima lya Nasaae liri ohwiicha.