Read saamia 1 Abatesalonika 5 Bible Online

1 Abatesalonika 5 - saamia bible

1 Abatesalonika 5

¹Baasyeefwe, sisihoyere ohubaandiikira ebidiira hu biha oba obwiire bu biindu bino bicha ohukwiirao.

² Olwohuba abeene mumanyire bulai muti Oludaalo lw'Omwaami luchia ohwiichia koti omwiibi mu siro.

³Abaandu nibaboola bati, omuleembe kuliwo, haandi bati buli siindu syoosi siyenjeefu, mani abweene ao niwo yi bachia ohusihirisirwa! Luchia ohwiichia bwaangu koti ohulumwa hw'omuhasi odaha ohwiibula hwiichaanga, mani abulao omuundu yeesi ochia ohweebalula daawe.

⁴Nae eng'we baasyaange, haba simusisiiri mu siirima, mani Oludaalo siluhoyere ohubakwaaho sa koti omwiibi.

⁵Eng'we mweesi muli abaana b'obulafu, haandi abaana b'esideete. Sihuli ab'esiirima oba ab'esiro daawe.

⁶Mani sakira sihuhoyere ohukona endoolo koti baandu baandi, nae huhoyere ohubechaanga meeso, haandi mwaaywe.

⁷Olwohuba abaandu bakona endoolo, bakonaanga esiro, haandi abameesi, bameeraanga esiro.

⁸ Nae efwe huli ab'esideete, mani sakira huhoyere ohubechaanga abaaaywe. Huhoyere ohwefwaalaanga efukiirira neende obuheeri hu koti ebbaati libwiiha hu sirifu, neende esuubi lyeefwe ly'obuwonia koti lu ekofia nyaangalafu muno yohumutwe.

⁹Nasaae siyatutekehera etima daawe, nae yatutekehera ohunyoola obuwonia ohubitira mu Omwaami weefwe Yesu Kristo,

¹⁰owatufwiira hu bulaanu humenye alala nae, kata nihuba abalamu oba abafu hu ludaalo lu yaheechereho.

¹¹Mani sakira, mulemyeenge abasyeeng'we emyooyo haandi muhoonyaneenge koti lu muli ohuholaanga sa bulaanu.

¹²Baasyaange hubekweeda huti mubeereseenge oluyaali luhoyera abo ababahalaabaniramo, ababakololosa haandi baabeekesa ebidiira hu bulamu bw'efukiirira mu Kristo.

¹³Mubeeseengemo oluyaali lw'amaani, haandi mubaheereenge hulw'omulimo ku bahola. Mumenyeenge nimuli mu muleembe abeene-na-beene.

¹⁴Baasyeefwe, hubekweeda huti mukerakireenge abaandu batadaha ohuhola emirimo, mugumieenge abati, muhoonyeenge abakata, haandi mwesimiirisireenge buli muundu.

¹⁵Ataba hoo omuundu yeesi mweeng'we owutuunga esibi hu sibi, nae ebiha byoosi muboneenge muti echoomo lyeeng'we nilyo ohuholaniraanga ebilai, neende ohuholeraanga abaandu boosi ebilai.

¹⁶Saangaaleenge ebiha byoosi,

¹⁷mulameenge buli siha,

¹⁸haandi mweebaseenge Nasaae mu bulamu bwoosi. Sino nisyo si Nasaae abadahaho mu bulamu bweeng'we buli mu bulala neende Kristo Yesu.

¹⁹Muteekaliraanga Mwooyo Mwoolerefu haandi

²⁰mutalekeeresaanga emboosi cha Nasaae.

²¹Piimeenge buli siindu mberi: lindeenge esilai

²²haandi mweebwabeenge esibi sya buli ngeri yoosi.

²³Lehe Nasaae otuberesaanga omuleembe abahole mube aboolerefu mu ngeri yoosi haandi aliinde obulamu bweeng'we bwoosi, omwooyo, obulamu, neende omubiri nibitaaliho esibi syoosi, ohwoola hu ludaalo lw'ohwiichiraho hw'Omwaami weefwe, Yesu Kristo.

²⁴Oyo owabalaanga achia ohusihola, olwohuba mweesikwa niye.

²⁵Baasyeefwe, mutulaamireho fwesi.

²⁶Heese Abakristo boosi neende ohukwiichana mu birifu hwoolerefu.

²⁷Mbekweeda neende obunyala bw'Omwaami endi, musome ebbarwa yino eyiri Abakristo boosi.

²⁸Embabaasi ch'Omwaami weefwe Yesu Kristo chibe naang'we.