Read saamia Yosua 1 Bible Online

Yosua 1 - saamia bible

Yosua 1

¹Luunyuma lw'ohufwa hwa Musa omuhalaabani w'Omwaami, Omwaami yalomaloma neende Yosua omuhoonyi wa Musa, haandi omwaana wa Nuuni.

²Yaboola ati, “Omuhalaabani waange Musa mbano afwiire. Mani ewe weetekehe bulaanu, ewe alala neende abaandu ba Yisiraeli boosi, mwaambuhe Omwaalo kwa Yorodaani mwiingire mu syaalo si ndi ohubaberesa.

³Koti sa lu ndaboolera Musa, ese malire ohuhuberesa alala neende abaandu baange boosi eloba lyoosi li muchia ohunyala ohuhuumbaho.

⁴Enjaho cheeng'we chichia ohutulira elalira hu siparara emwaalo ohwoolera elalira hu Ngulu cha Lebbanooni emukulu; ohutulira elalira hu mwaalo muhunuufu Omwaalo kwa Ewufuraate ebukwe, ohubitirania mu syaalo sy'Abahiiti, ohwoolera elalira hu Nyaanja Hoongo ya Mediterania emuumbo.

⁵Ewe Yosua, abulao oyo yeesi onanyala ohuhuyiingira n'osisiiri omulamu. Njia ohuba naawe koti lu ndabeechaanga neende Musa. Njia ohuba naawe ebiha byoosi; haba siinjia ohuhujwaang'aho kata sa nabudiidi.

⁶Jiing'a haandi ogume, olwohuba ewe niiwe ochia ohuba omwiimirisi w'abaandu bano nibanaba hu beengira ohuyira esyaalo sino si ndasuubisa bakuuka yaabwe.

⁷Ewe maliirira sa, haandi ogume; haandi mani omale wehaliirise oliinde sa Amalako koosi ka Musa omuhalaabani waange yababeresa. Mutalekeeresaangaho kata esituundu syako, nimuba muchia ohubitaangamo buli yi muchia ohuchichaanga.

⁸Yomiseenge ohubona muti esitabo sy'Amalako sisomwa mu hwiinamira Nasaae hweeng'we hwoosi. Sisomeenge esideete neende esiro, haandi mubona muti mwiisa oluyaali mu buli siindu syandiikwamo. Mani ao muba muchia ohubeechaanga abanyali haandi ababitamo mu buli siindu sibahola.

⁹Yichulisa oti mbeere hulagiire ohuba omumaliirifu haandi omugumu! Otabeechaanga omuti oba omusinyifu, olwohuba ese Omwaami Nasaae wao, ndi naawe eyo yoosi y'ochiira.”

¹⁰Bulaanu Yosua yalagira abeemirisi

¹¹ohuchia babite mu kaambi yoosi nibaboolera abaandu bati, “Tekeheho ebyohulya, olwohuba mu ndaalo chidatu enaamba munaba nimuchiire ohwaambuha Omwaalo Yorodaani ohuchia ohuyira esyaalo si Omwaami Nasaae weeng'we ali ohubaberesa.”

¹² Yosua yaboolera enono cha Rubbeeni neende Gaadi neende esituundu sy'enono ya Manaase ati,

¹³“Mwiichulise bulai koti Musa omuhalaabani w'Omwaami, yeecha yi muli mani yaababoolera ati, Omwaami Nasaae weeng'we yali n'achia ohubaberesa eloba lino eliri hu lwaande lw'ebukwe wa Yorodaani ohuba edaala lyeeng'we.

¹⁴Abahasi beeng'we, abaana beeng'we, alala neende ebituke byeeng'we byoosi, muchia ohudoong'a ano, nae ab'amaye beeng'we, abakingiire elalira ebilwaaniso nibetekeehe ohuchia ebiita, nibo abachia ohutaangiramo mu moni w'Abaisiraeli basyaabwe boosi, ohubahoonya ohulwaana

¹⁵ohwoola lu bananyalira ohuyira eloba liri hu lwaande lw'emuumbo wa Yorodaani, li Omwaami Nasaae weeng'we ababereese. Naaba n'amalire ohuliinda enono choosi echa Yisiraeli, hu bulaanu muba muchia ohukobolera engo abweene ao, mani mwaamala mwaamenya ano mu loba lyeeng'we lyeene eliri ebukwe wa Yorodaani, li Musa, omuhalaabani w'Omwaami yababeresa.”

¹⁶Boosi bakobola mu Yosua bati, “Efwe huchia ohuhola buli siindu syoosi sy'otuboleere, haandi huchia ohuchichaanga buli yoochia ohututumaanga.

¹⁷Huchia ohuhwisaangamo oluyaali, koti lu hwesaanga oluyaali ebiha byoosi mu Musa, mani haandi Omwaami Nasaae wao oyo ahoya yaaba naawe koti sa lu yabeechaanga neende Musa!

¹⁸Oyo yeesi ochia ohukanakanaanga obunyala bwao, oba ohuhayaanga ohwiisa oluyaali mu buli malako kao, achia ohwitwaangwa sa. Ewe ba omumaliirifu haandi omwomiifu!”