Read saamia Yosua 10 Bible Online

Yosua 10 - saamia bible

Yosua 10

¹Adonisedeki, omutuki wa Yerusalemu, yawulira ati Yosua yali n'amalire ohudiira haandi neende ohusihirisira elalira Ai, nihaandi ati yali niyeetere neende omutuki wasyo, koti sa lu yali naaholere hu Yeriko neende omutuki wasyo. Haandi yaawulira ati abaandu ba Gibbeoni bali nibachiire nibaholere neende Abaisiraeli obwiicha bw'ohutaao omuleembe, haandi hane bali nibamala neende ohuchaaka ohumenyaangamo.

²Abaandu ba Yerusalemu besiinduhira muno esiholwa sino olwohuba Gibbeoni syali esitabaafu syaaka neende ebiko biindi byali neende omutuki; kata syali nisiri esitabaafu ohuhira neende Ai, haandi abasaacha basyo bali abalwaani bamanyirifu muno.

³Mani sakira Adonisedeki yatuma emboosi chiloondaho chino eyiri omutuki Hohamu wa Hebburoni, omutuki Piramu wa Yarumuuti, omutuki Yafia wa Lakisi, neende omutuki Debbiri wa Egilooni:

⁴“Mwiiche muu hoonye seete Gibbeoni, olwohuba abaandu basyo bamalire ohutaao omuleembe neende Yosua neende Abaisiraeli.”

⁵Mani abatuki bataanu b'Abaamoori bano, abatuki ba Yerusalemu, Hebburoni, Yarimuuti, Lakisi, neende Egilooni, baambaania alala amaani kaabwe, mani baachia bebodoohania Gibbeoni, mani baasiseeta.

⁶Nae abasaacha ba Gibbeoni bosi batuma emboosi eyiri Yosua naali mu kaambi mu Giligaali bati: “Otatujwaang'a haba daawe, omuhuluundu! Yicha bwaangu otuhoonye! abatuki b'Abaamoori boosi abali mu syaalo sy'ebigulu mbano babuusire alala amaye kaabwe mani batuseetere!”

⁷Mani Yosua alala neende eye lyae lyoosi, n'oyiriiremo alala neende abalwaani bahiramo obulai, bachaakiraniramo olukeendo ohutula mu Giligaali.

⁸Omwaami yaboolera Yosua ati, “Mutabatya daawe. Ese omweene malire hale ohubaberesa obuyiingiri. Abulao kata mulala hu bo onanyala ohusiingira yeeme abalwaanise daawe.”

⁹Mani esiro syoosi, Yosua alala neende eye lyae bali nibali sa ohuhumbaanga ohutula Giligaali nibachia mu Gibbeoni, mani baahola ohuseeta hw'ohusiindusa eyiri Abaamoori.

¹⁰Mani Omwaami yahola Abaamoori bakwaamo oluteengo ni boobbya sa bati emoni chaabwe hu ye lya Yisiraeli. Abaisiraeli babasiinjira mu Gibbeoni lukali muno, mani baabeeruhania baabeehirisa hu ngira yoohulugulu lwa Bbeeti Horooni, nibeedinyiisye sa ohulwaana ohwoola lu boola aasi bweene emwaalo wa Aseka neende Makeda.

¹¹Mani koti lu Abaamoori bali nibeeruha nibeehirira hu ngira eyo, nibatula hu ye ly'Abaisiraeli, Omwaami yesi yahola emikina ky'efula mihoongo muno kyaabakwichaangaho nikitula aakulu ohwoolera elalira lu boola mu Aseka. Mani abahira obuungi hu bo beetwaanga neende amakina k'efula ako ohuhiraho abeetwa neende Abaisiraeli beene.

¹²Mani hu ludaalo lu Omwaami yabereseraho abasaacha ba Yisiraeli ohuyiingira Abaamoori, Yosua yalomaloma neende Omwaami. Mu moni w'Abaisiraeli boosi, yaboola ati, “Ewe elyuuba, yema wedungeerere hu Gibbeoni; Ewe omwoosi, yema hu Hoondo y'Aijalooni.”

¹³Elyuuba lyeema lyeedungeeresa nae omwoosi haba sikwasudaho kata nabudiidi ohwoola lu esyaalo esyo syayiingirira abasuku basyo. Bino byandiikwa mu Esitabo sya Yasaari. Elyuuba lyeema lyeedungeeresa akatikaati w'ekulu mani lyaahaya ohwihirira oludaalo lwoosi.

¹⁴Haba sisyali hoo, haandi si lwali hoo, oludaalo lu fwaana koti olwo, Omwaami ni yeesaho oluyaali mu muundu sa. Omwaami yalwaanira Yisiraeli!

¹⁵Luunyuma lwasino, Yosua alala neende eye lyae bakobolayo engo waabwe mu kaambi yali mu Giligaali.

¹⁶Abatuki bataanu bala Abaamoori, kata katyo, bali nibanyalire ohweeyiba mani nibali ohweekisaanga mu ng'uungu ya Makeda.

¹⁷Nae omuundu wuundi yababona, mani Yosua yaboolerwa abuundu yi bali nibeekisire.

¹⁸Yaboola sa ati, “Eng'we muchie sa mani musiindikisire ekina hoongo muno mu moni w'omulyaango kwiingira mu ng'uungu eyo. Mani muteeo ab'eye baliindi abweene ao,

¹⁹nae eng'we abeene mutadoong'ayo daawe. Mwemeede sa nimuloonda abasuku, mani mubaseete nimubatulira emukoongo; mutabakanyaho baakobola boola engo mu biko byaabwe daawe! Omwaami Nasaae weeng'we mbao amalire ohubaberesa ohubayiingira.”

²⁰Yosua alala neende abasaacha ba Yisiraeli banyala ohubasiinja muno, kata neende abaandi nibanyoolaanga obweyikamo mukati w'ebida by'ebiko byaabwe, mani baahaya ohwiitwa.

²¹Nibamala batyo, abasaacha ba Yosua bakobolera nibali abweene mu kaambi yali mu Makeda. Abulao kata omuundu mulala mu syaalo omwo owali naanyala ohwenyiira ohulomalomaho hu Abaisiraeli.

²²Yosua yaboola ati, “Muchie mwiikuleo omulyaango kuchia mu ng'uungu omwo, mani mutusemo abatuki abo bataanu mani mubaleete ano yiindi.”

²³Eng'uungu eyo yeekulwao, mani abatuki ba Yerusalemu, Hebburoni, Yarimuuti, Lakisi, neende Egilooni batuswa erwaanyi

²⁴bayirwa eyiri Yosua. Yosua bulaanu yalaanga abasaacha boosi ba Yisiraeli beecha yaali, yalagira abahoongo bali nibachiire nae mu biita beecha yaali mani baaseena amakulu kaabwe hu makosi k'abatuki abo. Bahola batyo.

²⁵Yosua yaboolera abahoongo bae abo ati, “Mutatya, haandi mutawaamo omwooyo. Mwomiire sa haandi mugume olwohuba sino nisyo si Omwaami achia ohuhola hu basuku beeng'we boosi.”

²⁶Mani Yosua yeeta abatuki abo mani yaabaaniha hu misaala kitaanu, hu milaambo kyaabwe kyadoong'a nikideemba ohwoola engoloobe.

²⁷Elyuuba nilyali nilikwa, Yosua yatusa elako, mani emilaambo kyaabwe kyaanulwa kyeeswa aasi, mani kyaamala kyaasukunwa mu ng'uungu yeene eyo yi bali nibeekisiremo hale. Amakina mahoongo kateebwa hu mulyaango kwiingira mu ng'uungu eyo, mani kasisiiri ohwo ohwoola buti.

²⁸Yosua yaseeta mani yaadiira Makeda neende omutuki wasyo ludaalo olwo lweene. Yeeta buli muundu yeesi owali mu siko esyo; abulao owalehwa naali omulamu. Yahola hu mutuki wa Makeda esiindu si yali naaholere hu omutuki wa Yeriko.

²⁹Mani luunyuma lwasino ohuwa, Yosua alala neende eye lyae bemeeda ohutula Makeda boola Libbina mani baasiseeta.

³⁰Omwaami haandi lwosi yaberesa Yisiraeli ohuhira esiko sino neende omutuki wasyo. Haba sibabisiraho omuundu yeesi daawe, nae beeta buli muundu walimo yeesi. Bahola hu mutuki oyo esiindu sibali nibahola hu mutuki wa Yeriko.

³¹Mani luunyuma lwasino ohuwa, Yosua alala neende eye lyae bachaaka olukeendo ohutula mu Libbina, ohuchia mu Lakisi, basibodoohana baasiseeta.

³²Omwaami haandi lwosi yaberesa Abaisiraeli ohuyiingira hu Lakisi, hu ludaalo lwa habiri lw'ebiita. Koti lu bali nibahola Libbina, haba sibabisiraho omuundu yeesi, nae beeta buli muundu owali mu siko esyo.

³³Omutuki Horamu wa Geseri yeecha eyiri Lakisi ohunyoola obuhoonyi,

³⁴Ohuloondaho, Yosua alala neende eye lyae bachaaka olukeendo ohutula mu Lakisi ohuchia Egilooni, mani baasyeebodoohania mani baamala baasiseeta.

³⁵Basidiira hu ludaalo lweene olwo, mani beeta buli muundu wasirimo, koti sa lu bali nibaholere mu Lakisi.

³⁶Luunyuma lwasino ohuwa, Yosua alala neende eye lyae bachaaka olukeendo ohutula mu Egilooni ohuniina mu bigulu ohwoola mu Hebburoni, baasiseeta,

³⁷mani basidiira. Beeta omutuki wasyo alala neende buli muundu yeesi owuundi owali mu siko esyo, haandi neende abali mu biko byali aambi ao. Yosua yaheengera esiko esyo omusaango ohusihirisirwa elalira, koti sa lu yali naaholere mu Egilooni. Abulao omuundu wasirimo owalehwa n'asisiiri omulamu daawe.

³⁸Bulaanu Yosua neende eye lyae, bakaluuhana baakobola enyuma eyiri Debbiri, mani baasiseeta.

³⁹Yasidiira, alala neende omutuki wasyo, haandi neende ebiko byoosi ebyali nibisisibiraane. Beeta buli muundu yeesi owali mu biko ebyo byoosi. Yosua yahola mu Debbiri neende hu mutuki wasyo esiindu si yahola mu Hebburoni, haandi neende mu Libbina neende omutuki wasyo.

⁴⁰Yosua yadiira esyaalo syoosi. Yayiingira abatuki bomu syaalo syoomubigulu, ebiihiriro by'ebukwe byoosi, haandi neende mu nandaalira w'ebigulu by'emuumbo byoosi, haandi kata neende ebyo byoosi ebyohu syaalo syoomu esiri emwaalo. Haba siyabisirahooyo omuundu yeesi daawe; buli muundu yeesi yeetwa sa. Sino nisyo esiindu si Omwaami Nasaae wa Yisiraeli yali n'alagiire.

⁴¹Obulwaani bwa Yosua bwamutusa Kadesi Bbarinea emwaalo, mani bwamwoosa mu Gasa aambi neende eegenya ly'enyaanja, n'oyiriramo neende esyaalo syoosi esya Goseni, haandi neende ohwoolera elalira emukulu bweene mu Gibbeoni.

⁴²Yosua yayiingira abatuki bano boosi haandi neende obwaami bwaabwe mu huseeta hulala hwoong'ene olwohuba Omwaami, Nasaae wa Yisiraeli, niye owali naali ohulwaaniraanga Yisiraeli.

⁴³Bino byoosi nibyawa, Yosua neende eye lyae bakobolayo engo mu kaambi yali mu Giligaali.