Read saamia Yosua 12 Bible Online

Yosua 12 - saamia bible

Yosua 12

¹ Bulaanu, abaandu ba Yisiraeli bali nibamalire ohuyiingira esyaalo syali ebukwe wa Yorodaani, mani haandi nibamala ohusimenyamo, ohutulira elalira hu Hoondo ya Arunooni ohwoolera elalira hu Hoondo ya Yorodaani, haandi neende ohwoolera elalira emukulu hu Lugulu lwa Hamoni. Ohwoolera ano, bali nibamalire ohuyiingira abatuki babiri abalaamba.

²Omutuki mulala yali n'alaangwa mbwe, Sihooni omutuki w'Abaamoori owali yamenya e Hesibboni. Obwaami bwae bwali nibwayiriramo esituundu sya Gileadi: ohutulira elalira hu Aroeri (hu busoonjo bw'Ehooho lya Arinooni) haandi neende ohutulira elalira hu siko syali akatikaati w'ehooho elyo, ohwoolera elalira hu Mwaalo kwa Yabbooki, olwaaho lwa Abaamooni;

³haandi nibwayiriramo neende Ehooho lya Yorodaani ohutulira elalira hu Nyaanja Galilaaya emwaalo, ohwoolera elalira hu Bbetiyesimooti (ebukwe w'Enyaanja y'Omuunyu) haandi ohwemeeda ohuchiiririra nibuchoomere mu nandaalira w'oLugulu lwa Pisiga.

⁴Haandi bali nibayiingira Omutuki Ogu wa Bbasani, owali mulala hu Abarefaimu badoong'ao; wuno yali naatuka Asitarooti neende Edirei.

⁵Obwaami bwae bwali nibuyiriramo Olugulu lwa Hamoni, Saleka, haandi neende Bbasani yoosi ohwoolera elalira hu enjaho cha Gesuuri neende Maaka, haandi neende esituundu siindi sya Gileadi, ohwoolera elalira hu bwaami bw'Omutuki Sihooni wa Hesibboni.

⁶ Mani abatuki bano boombi, bali nibalwaaniswa neende Musa naali alala neende abaandu ba Yisiraeli mani niyabamala ohubayiingira. Musa, omuhalaabani w'Omwaami, yali niyamala ohuberesa eloba lyaabwe lyoosi enono cha Rubbeeni neende Gaadi, haandi neende esituundu sy'enono ya Manaase, libe elyaabwe ly'obusihirano.

⁷Mani, Yosua alala neende abaandu ba Yisiraeli bali nibamalire ohulwaania haandi neende ohuyiingira abatuki boosi abali nibali mu syaalo sy'emuumbo wa Yorodaani, ohutulira elalira hu Bbaligaadi mu hooho lya Lebbanooni, ohwoolera elalira hu Lugulu lwa Halaki emwaalo bweene aambi neende Edomu. Yosua bulaanu yaheengao ohukabaniamo esyaalo sino mu nono cha Yisiraeli, mani yaachikaba syaaba koti omukabo kwaabwe kw'endaalo choosi.

⁸Obuhoongo bw'esyaalo sino bwali nibuyiriramo neende esyaalo sy'ebigulu-gulu esyo, enandaalira ch'emuumbo w'engulu echio, obwiihiriro bw'ebukwe bw'engulu, haandi alala neende esyaalo syooma kurururu esiri emwaalo bweene. Esyaalo sino syoosi syali nisyalichiingi obumenyo bw'abaandu Bahiiti, Abaamoori, Abakanani, Abaperisi, Abahiifi, haandi neende Abayebbusi.

⁹Abaandu ba Yisiraeli balwaania bayiingira abatuki b'ebiko biloondaho bino biti: Yeriko, Ai (aambi neende Bbeteli),

¹⁰Yerusalemu, Hebburoni,

¹¹Yarimuuti, Lakisi,

¹²Egiloni, Geseri,

¹³Debbiri, Gedeeri,

¹⁴Harima, Aradi,

¹⁵Libbina, Adulaami,

¹⁶Makeda, Bbeteli,

¹⁷Tapua, Hefeeri,

¹⁸Afeki, Lasarooni,

¹⁹Madooni, Hasoori,

²⁰Simirooni, Akasafu,

²¹Tanaki, Megido,

²²Kedesi, Yikineyamu (mu Karimeeli),

²³Doori (hu lwaasi lw'enyaanja), Goimu (mu Galilaaya),

²⁴mani neende Tirisa boosi alala, abatuki amahumi kadatu neende mulala.