Read saamia Yosua 13 Bible Online

Yosua 13 - saamia bible

Yosua 13

¹Esiha sino bulaanu, Yosua yali n'amalire ohukofula muno. Nae Omwaami yamuboolera ati, “Ewe bulaanu mbano omalire ohukofula, nae yisisiiriyo esyaalo esihoongo muno esisidaha ohudiirwa koti:

²esyaalo syoosi esya Filisitia neende esya Gesuuri,

³haandi neende esyaalo syoosi esya Afiimu ohwoolera elalira emwaalo bweene. (Esyaalo ohutulira elalira hu mwaalo kwa Sihoori, hu lwaaho lwa Misiri, ohwoolera elalira emukulu bweene hu lwaaho lwa Ekironi esyali nisibukulwa ohuba ey'Abakanani; abatuki b'Abafilisiti nibo abali nibamenya mu Gasa, Asidoodi, Asikelooni, Gaati, neende mu Ekironi.)

⁴Yisiiriyo esyaalo sy'Abakanani, neende esy'Abameara (esyali nisiri esy'Abasidooni), esyoolera elalira hu Afeki, hu lwaaho lw'Abaamoori;

⁵esyaalo sy'Abagebbali; Lebbanooni yoosi ohwoolera elalira ebukwe bweene, ohutulira elalira hu Bbaligaadi, esiri emwaalo woolugulu lwa Hamoni, haandi ohwoolera elalira hu Hamati Paasi.

⁶ Obuhoongo bw'esyaalo sino buyiriramo alala neende esyaalo syoosi esy'Abasidooni, abali nibamenya mu syaalo sy'ebigulu-gulu akatikaati w'Engulu chia Lebbanooni, neende ohwoolera elalira hu Misirefooti Maimu. Ese njia ohwiirusiramo elalira abaandu bano boosi koti lu baandu ba Yisiraeli banabeechaanga nibamaala. Nae ewe mani ohoyere ohunyala ohukabaniamo esyaalo esyomu Abaisiraeli, koti sa lundahulagira ohuhola.

⁷Mani bulaanu buti, chia okabaniemo esyaalo sino mu nono chitaanu-na-chine chiindi chira, haandi esituundu sy'enono ya Manaase, hu bosi banyale ohuba neende eloba lyaabwe hu bwaabwe.”

⁸ Enono cha Rubbeeni neende Gaadi, haandi neende esituundu siindi sira esy'enono ya Manaase chali nichamala ohunyoola hu loba li Musa, omuhalaabani w'Omwaami yali niyamala ohubaberesa hale; eloba elyo lyali niliri hu lwaande lw'ebukwe lw'Omwaalo Yorodaani.

⁹Esyaalo syaabwe esyo syali nisibaambaliya ohwoola hu Aroeri (hu busoonjo bw'Ehooho lya Arinooni) nae esiko nisiri akatikaati w'ehooho elyo, haandi syali nisiyiriramo neende esyaalo sy'esipaapi syoosi ohutulira elalira hu Medeba neende ohwoolera elalira hu Dibboni.

¹⁰Esyaalo esyo syali nisyabaambaliya ohwoolera elalira hu lwaaho lw'Abaamooni, haandi luyiriramo neende ebiko byoosi ebyali nibitukwa neende omutuki Sihooni Omuamoori, owali n'atukiraanga Hesibboni.

¹¹Syali nisiyiriramo alala neende Gileadi, esituundu sy'esyaalo sya Gesuuri neende esyaalo sya Maaka, Olugulu lwa Hamoni lwoosi, haandi neende Bbasani yoosi ohwoolera elalira hu Saleka.

¹²Haandi syali nisiyiriramo alala neende obwaami bwa Ogu, owamaliirihayo hu Bbarefaimu, owali niyatukiraanga Asitarooti neende Edirei. Musa yali niyamala ohulwaania haandi niyayiingira abaandu bano boosi, haandi niyamala ohubeerusa ohubatusa mu syaalo muno.

¹³Kata katyo, Abaisiraeli bano haba sibali nibanyala ohwiirusa ohumaliramo elalira Abagesuri, alala neende Abamaaka; bano badoong'a sa nibamenya mu Yisiraeli bweene.

¹⁴Nae Musa yali n'asisiiri ohuberesaho enono ya Leefi eloba lyoosi. Koti lu Omwaami yali niyaboolera Musa ati, abo bali nibachia ohunyoola hu omukaabo kwaabwe abeene, okutula hu biyaanwa bisaambwa hu alutaari nibiyaaniirwe Omwaami, Nasaae wa Yisiraeli.

¹⁵Bulaanu Musa yali n'amalire ohukabaho esituundu sy'eloba elyo amadaala kaandi ak'enono ya Rubbeeni ohuba omukabo kwaabwe abeene.

¹⁶Mani esyaalo syaabwe syali nisyalaandaala ohwoolera elalira hu Aroeri (hu busoonjo bw'Ehooho lya Arinooni) nae esiko nisiri akatikaati w'ehooho elyo, haandi nisiyiriramo neende esyaalo sy'esipaapi syoosi esyebodoohania Medeba.

¹⁷Syayiriramo neende Hesibboni haandi neende ebiko byoosi ebyali nibiri hu syaalo sy'esipaapi esyo koti: Dibboni, Bbamooti, Bbaali, Bbeeti Bbalimeoni,

¹⁸Yahasi, Kedemooti, Mefaati,

¹⁹Kiriataimu, Sibbima, Sereeti, Sadaari esiri hu lugulu luli mu hooho omwo,

²⁰Bbetipeore, enyaande chiihirira ech'Olugulu lwa Pisiga, haande neende Bbetiyesimooti.

²¹Haandi syali nisiyiriramo neende ebiko byoosi ebyali hu syaalo sy'esipaapi ohwo, haandi neende obwaami bwoosi obw'omutuki Sihooni Omuamoori, owatukiraangaho Hesibboni. Musa yali niyamulwaania ohumuyiingira, alala neende abatuki baandi aba Midia koti: Efi, Rekemu, Suuri, Huuri, neende Rebba. Abo boosi bali nibatukiraho Omutuki Sihooni esyaalo esyo.

²²Mu baandu b'abaandu ba Yiriraeli banyala ohwiita mwalimo omulakusi wuundi olaangwa mbwe Bbalamu, omwaana wa Bbeyori.

²³Yorodaani kwali nikwo olwaaho lw'emuumbo olw'enono ya Rubbeeni. Mani bino nibyo ebyali ebiko bihunuufu, haandi neende ebidiidi ebyali nibyabereswa amadaala k'enono ya Rubbeeni koti omukabo kwaabwe kweene.

²⁴Musa haandi yali niyamala ohukabaho esituundu siindi esy'eloba elyo amadaala kaandi ak'enono ya Gaadi ohuba omukabo kwaabwe kweene.

²⁵Mani esituundu sy'esyaalo esyali nisiri esyaabwe syali nisirimo Yaseeri neende ebiko byoosi ebya Gileadi, esituundu sy'eloba ly'Abaamooni ohwoolera elalira hu Aroeri, esiri ebukwe wa Rabba;

²⁶mani eloba lyaabwe lyali nililandaala ohutulira elalira hu Hesibboni, ohwoolera elalira hu Ramaati Misipe neende hu Bbetoniimu, haandi ohutulira elalira hu Mahanaimu ohwoolera elalira hu lwaaho lwa Lodebbari.

²⁷Nae mu Hoondo ya Yorodaani, lyali niliyiriramo neende Bbeeti Haraamu, Bbeti Nimura, Sukooti, neende Safoni, obwaami budoong'ereyo bwoosi obw'Omutuki Sihooni wa Hesibboni. Nae olwaaho lwaabwe lw'emuumbo, kwali nikwo Omwaalo Yorodaani, ohwoolera elalira hu Nyaanja Galilaaya.

²⁸Mani bino nibyo ebiko bihunuufu alala neende ebidiidi ebyali nibyabereswa amadaala k'enono ya Gaadi ohuba omukabo kwaabwe kw'elalira.

²⁹Musa yali niyamala ohukabaniamo esituundu sy'eloba siindi mu madaala k'esituundu siindi sy'enono ya Manaase ohuba omukabo kwaabwe kw'elalira.

³⁰Mani esituundu sy'esyaalo syali esyaabwe syali nisyalambaala ohwoola hu Mahanaimu haandi syali nisiyiriramo Bbasani yoosi, obwaami bwoosi obwa Ogu, haandi omutuki Bbasani yesi, haandi alala neende engoongo amahumi kasaasaba choosi ohutula huchia Yairi mu Bbasani.

³¹Syali nisiyiriramo neende esituundu esilaamba esya Gileadi, haandi neende Asitarooti neende Edirei, esiko sihunuufu esy'obwaami bwa Ogu mu Bbasani. Esituundu sy'esyaalo sino syoosi syali nisyabereswa esituundu silaamba sy'amadaala katula hu lwiibulo lwa Makiri omwaana wa Manaase.

³²Mani yino niyo engeri yi Musa yakabanisiryamo eloba lyali ebukwe wa Yeriko neende Yorodaani, niyaba naali mu syaalo sikwalaafu sya Moabbu.

³³ Nae kata katyo, Musa haba siyali niyakabaho eloba lyoosi enono ya Leefi daawe. Yali sa niyababoolera ati, mbwe omukabo kwaabwe kwali nikuli omukabo kutula hu biyaanwa bi bereswa Omwaami Nasaae wa Yisiraeli.