Read saamia Yosua 19 Bible Online

Yosua 19 - saamia bible

Yosua 19

¹Ohukaba hwaloondaho hwali ohw'amadaala k'enono ya Simeoni. Obuhoongo bw'esituundu sino bwalandaala bweengira mu loba lyali nilyabereswa enono ya Yuda.

²Syali siyiriramo neende Bberisebba, Seebba, Molada,

³Hasaari Suali, Bbaala, Eseemu,

⁴Elitolaadi, Bbetuuli, Horima,

⁵Sikilaagi, Bbeeti Marikabboti, Hasarisusa,

⁶Bbeeti Lebbaoti, neende Saruheeni: bino byoosi alala byali ebiko ehumi neende bidatu, haandi ohumeendaho neende ebiko bidiidi-diidi biindi ebyalichiingi nibibyebodoohaanie.

⁷Haandi yaliyo ebiko biindi koti, Ayini, Eni-Rimoni, Eteri, neende Asani: bino alala byali ebiko bine ebilaamba, haandi ohumeedaho neende ebidiidi-diidi biindi ebyalichiingi nibibyebodoohaanie.

⁸Esituundu sino syayiriraangamo alala neende ebiko biindi bidiidi-diidi ebyalichiingi nibibyebodoohaanie ohwoolera elalira hu Bbalati Bbeeri (oba Rama), emwaalo bweene. Mani lino lityo nilyo elyali eloba li madaala k'enono ya Simeoni kanyoola ohuba elyaabwe hu bwaabwe.

⁹Nae koti omukabo kwa Yuda kwali nikuli omutabaafu ohuhiraho koti lu kwali nikweenyeha ohuba, esituundu siindi syakwo syameedwa hu sy'enono ya Simeoni.

¹⁰Omukabo kwa hadatu kwali okw'amadaala k'enono ya Sebbuluuni. Mani eloba libanyoola lyali nililandaala nilyoola hu Saridi.

¹¹Mani ohutulira ebweene eyo, olwaaho lwachooma emuumbo ohwoola hu Mareali, haandi lwaaba niludiiraho hu Dabbeseeti, haandi neende hu haalo hali ebukwe wa Yokineyamu.

¹²Nae hu lwaande luundi olwa Saridi, olwaaho olwo lwachiira ebukwe, ohwoolera elalira hu lwaaho lwa Kisiloti Tabbori, mani haandi lwaamala lwaachia hu Dabberaati, haandi lwaniina ohwoola hu Yafia.

¹³Haandi luchiiririra sa niluchoomere ebukwe nilutulire ebweene eyo, ohwoola lu lwoola Gaatiheferi, haandi neende hu Etikasiini, haandi nilukabuha niluchooma yi Neya siri, yi lubita sa niluchia nilwoola hu Rimoni.

¹⁴Emukulu nayo, olwaaho luno lwakabuha lwachooma Hanatoni, mani nilwaakamira hu Hoondo lya Yifitaheli.

¹⁵Eloba lino lyayiriramo neende Katati, Nahalaali, Simirooni, Yidaala, neende Bbetilehemu: bino biko byoosi alala byali ebiko ehumi neende bibiri, haandi ohumeedaho neende ebiko bidiidi-diidi biindi ebyalichiingi nibibyebodoohaanie.

¹⁶Ebiko bihunuufu bino alala neende ebiko bidiidi-diidi byabyo byoosi, byali nibiri mu loba li madaala k'enono ya Sebbuluuni kanyoola ohuba elyako hu bwaako.

¹⁷Omukabo kwa hane kwali okw'amadaala k'enono ya Yisakari.

¹⁸Obuhoongo bwalyo bwali nibuyiriramo ebiko koti, Yesireeli, Kesulooti, Suneemu,

¹⁹Hafaraimu, Sioni, Anaharaati,

²⁰Rabbiti, Kisioni, Ebbesi,

²¹Remeti, Enganiimu, Enihaada, neende Bbeetipaseesi.

²²Olwaaho luno lwosi lwali nilwegeeng'aho hu Tabbori, Sahasuma, neende hu Bbeeti Semesi, mani nilwaakamira hu Yorodaani bweene. Lwali niluyiriramo neende ebiko ehumi neende bisaasaba, haandi alala neende ebiko biindi bidiidi-diidi ebyalichiingi nibibyebodoohaanie.

²³Mani ebiko bihunuufu bino, alala neende ebiko bidiidi-diidi byabyo bino byoosi, byalichiingi nibiri mu loba li madaala k'enono ya Yisakari kanyoola ohuba elyako hu bwaako.

²⁴Omukabo kwa hataanu kwali okw'amadaala k'enono ya Aseri.

²⁵Obuhoongo bwalyo bwali nibuyiriramo ebiko koti, Helikaati, Hali, Bbeteni, Akisafu,

²⁶Alaamu Meleki, Amaadi, neende Misali. Emuumbo walyo lyali nilyegeeng'a hu Karimeeli neende Sihori Libbinaati.

²⁷Nae koti lu lwali nilweekoda niluchooma ebukwe, olwaaho luno lwachia lwoola Bbetidagoni, nilwegeeng'a hu Sebbuluuni neende Hoondo ya Yifitaheli hu ngira niluchiira emukulu ohwoola hu Bbetemeeki neende Neyeli. Lwali nilwemeeda sa ohuniina emukulu ohwoola lu lwoola Kabbuuli,

²⁸Ebburooni, Rehobbu, Hamooni neende Kaana, ohwoolera elalira hu Sidoni.

²⁹Olwaaho olwo bulaanu lwakabuha lwachiira eyiri Rama, mani nilumala nilwoolera elalira hu siko sy'olukoba esya Tiiro; ao haandi lwakabuha lwachooma hu Hoosa, mani lwaakamira hu Nyaanja Hoongo ya Mediterania. Lwayiriramo neende Mahalabbu, Akisibbu,

³⁰Wuma, Afeki, neende Rehobbu: ebiko bino byoosi alala byali nibiri amahumi kabiri neende bibiri, haandi n'oyiriiremo alala neende ebiko bidiidi-diidi ebyalichiingi nibibyebodoohaanie.

³¹Mani ebiko bihunuufu bino alala neende ebidiidi-diidi byaabyo, byoosi byali nibiri mu loba li madaala k'enono ya Aseri kanyoola ohuba elyako hu bwaako.

³²Omukabo kwa hasaasaba kwali okw'amadaala k'enono ya Nafutaali.

³³Olwaaho lwalyo lwali niluchiiririra ohutulira hu Helefu ohwoola hu mutuumba kuli mu Sananiimu, haandi lwaachiiririra ohwoola hu Adami Nekebbu, haandi neende hu Yamunia, haandi ohwoolera elalira hu Lakumu, mani lwaamala lwaakamira hu Yorodaani bweene.

³⁴Ebweene eyo niyo yi lwaaho olwo lwakabuhira mani lwaachooma emuumbo niluchia eyiri Asinooti Tabboori, ebweene eyo haandi yi lwatulira mani lwachiira eyiri Hukooki, nilwegeeng'a hu Sebbuluuni emwaalo bweene, Aseri nisidoong'a emuumbo, nae Yorodaani niyidoong'a ebukwe.

³⁵Ebiko byali nibyakedeerana engoba byali nibyo bino mbwe, Sidiimu, Seri, Hamaati, Rakati, Kinereeti,

³⁶Adama, Rama, Hasoori,

³⁷Kedesi, Edirei, Enihasoori,

³⁸Yirooni, Migidaleeli, Horeemu, Bbeetanaati, neende Bbeeti Semeesi: ebiko bino byoosi alala byali ebiko ehumi neende bitaanu-na-bine, haandi n'omeedereho neende ebiko bidiidi-diidi ebyalichiingi nibibyebodoohaanie.

³⁹Mani ebiko bihunuufu bino alala neende ebiko bidiidi-diidi byabyo bino boosi alala, byalichiingi nibiri mu loba li madaala k'enono ya Nafutaali lwanyoola ohuba elyako hu bwaako.

⁴⁰Omukabo kwali okwa hataanu-na-habiri, kwali okw'amadaala k'enono ya Daani.

⁴¹Obuhoongo bwalyo bwali nibuyiriramo ebiko koti, Soora, Esitaoli, Yirisemesi,

⁴²Salibbini, Aijalooni, Yitiala,

⁴³Eloni, Timuna, Ekironi,

⁴⁴Eliteeke, Gibbetooni, Bbalaati,

⁴⁵Yehuudi, Bbenebberaaki, Gatirimoni,

⁴⁶Mejarikoni, neende Rakoni, kata haandi neende esituundu sy'eloba syali nisyebodoohania Yopa.

⁴⁷Mani abaandu ba Daani nibakosa eloba lyaabwe, bachia Laisi mani baasiseeta. Basiwaamba, mani beeta abaandu basyo, nibasiyira ohuba esyaabwe hu bwaabwe. Bamenya mu bweene omwo, mani baakaluuhania eliita ly'esiko esyo ohutula hu Laisi, lyaaba Daani, nibasikuliha ohuloondakana neende eliita lya Daani kuuka yaabwe.

⁴⁸Ebiko bihunuufu bino alala neende ebiko bidiidi-diidi byaabyo byoosi alala byali mu loba li madaala k'enono ya Daani kanyoola ohuba elyako hu bwaako.

⁴⁹Mani abaandu ba Yisiraeli nibamaliirisa ohukabaniamo eloba elyo, baberesa Yosua omwaana wa Nuuni esituundu siindi syoohu loba elyo, lyosi libe koti elyae sa hulwae.

⁵⁰Koti sa lu Omwaami yali n'alagiire, bamuberesa esiko si yali omweene naasabire: Sino syali nisyo, Timunaati Seera, esyali nisiri mu syaalo sy'engulu sya Efuraimu. Omweene yoombaha esiko esyo buyaaha, mani yaamenya mu bweene omwo.

⁵¹Nae Eliasaari omulaamisi, Yosua omwaana wa Nuuni, alala neende abeemirisi b'amadaala k'enono ya Yisiraeli bakabaanga ebituundu by'eloba bino nibehoonyera ohuubbaannga eha nibali Silo, hu mulyaango kw'Eyeema ly'Ohubaao hw'Omwaami. Mani ohubitira mu ngira yeene yino, bamaliirisa ohukabaniamo eloba elyo.