Read saamia Yosua 21 Bible Online

Yosua 21 - saamia bible

Yosua 21

¹Abeemirisi b'amadaala k'Abaleefi bachia eyiri Eliasaari omulaamisi, Yosua omwaana wa Nuuni, neende abahoongo b'amadaala k'enono choosi echia Yisiraeli.

² Mani eyo mu Silo, mu loba lya Kanani, bababoolera bati, “Omwaami yalagira naabitira mu Musa ati efwe huhoyere ohubereswa ebiko bi humenyamo, haandi neende eloba ly'olwaayiro eliba nilibyebodohaanie, libe ely'ebituke byeefwe.”

³Mani sakira ohuchianakana neende elako ly'Omwaami, abaandu ba Yisiraeli bakanya ohuberesa Abaleefi ebiko biindi, haandi neende amaloba k'enjayiro, ohutula hu situundu sy'esyaalo syaabwe abeene.

⁴Mani amadaala k'enono y'Abaleefi eya Kohati, nibo abali abaamberi ohubereswa ebiko. Nae amadaala akali nikatula hu Arooni omulaamisi, babereswa ebiko ehumi neende bidatu ebilaamba ohutula hu bituundu by'ebyaalo bya Yuda, Simeoni, neende Bbenjamini.

⁵Nae enono chidoong'ereyo echia Kohati nachio chabereswa ebiko ehumi ebilaamba ohutula hu bituundu by'ebyaalo bya Efuraimu, Daani, neende Manaase Emuumbo.

⁶Nae enono ya Gerisoni yabereswa ebiko ehumi neende bidatu ebilaamba, ohutula hu bituundu by'ebyaalo bya Yisakari, Aseri, Nafutaali, neende Manaase Bukwe.

⁷Mani amadaala k'enono ya Merari kabereswa ebiko ehumi neende bibiri ebilaamba ohutula hu bituundu by'ebyaalo bya Rubbeeni, Gaadi, neende Sebbuluuni.

⁸Mani nibehoonyera ohuubbaannga eha, abaandu ba Yisiraeli bakabaanga ebiko bino alala neende amaloba k'enjayiro kahwo, eyiri Abaleefi, koti lu Omwaami yali niyalagira ohubitira mu Musa.

⁹Mani kano niko ameeta k'ebiko ebyo ohutulira elalira hu bituundu by'ebyaalo bya Yuda neende Simeoni, ebyakabwa

¹⁰abeechuhulu ba Arooni abali ab'enono ya Kohati, eyatulana hu Leefi. Omukabo kwaabwe nikwo okwali okwaamberi ohuholwa.

¹¹Mani babereswa esiko sya Aribba (Aribba yali laatang'ene Anaaki), bulaanu buti esilaangwa mbwe Hebburoni, esiri mu syaalo sy'ebigulu-gulu esya Yuda, alala neende eloba ly'olwaayiro lisyebodohaanie.

¹²Kata katyo, emikuunda ky'esiko esyo, kata neende eky'ebiko bidiidi-diidi byasyo, byali nibyamala ohubereswa Kalebbu omwaana wa Yefune ohuba ekyae hu bwae.

¹³Haandi ohumeeda hu Hebburoni, (esyali esiko silala hu biko by'obwiiruhiro), ebiko biindi biloondaho bino byosi byabereswa abeechuhulu ba Arooni omulaamisi: Libbina,

¹⁴Yatiiri, Esitemoa,

¹⁵Holooni, Debbiri,

¹⁶Aini, Yuuta, neende Bbeeti Semeesi, alala neende amaloba k'enjayiro kahwo: bino byali ebiko bitaanu-na-bine ohutula hu enono cha Yuda neende Simeoni.

¹⁷Nae ohutula hu situundu sy'esyaalo sya Bbenjamini, babereswa ebiko bine ebilaamba: Gibbeoni, Gebba,

¹⁸Anatooti, neende Alimooni, alala neende amaloba k'enjayiro kahwo.

¹⁹Bino alala byoosi byali ebiko ehumi neende bidatu ebilaamba, alala neende amaloba k'enjayiro kahwo, ebyabereswa abalaamisi, abali abeechuhulu ba Arooni.

²⁰Amadaala kaandi akali ak'enono y'Abaleefi eya Kohati babereswa ebiko biindi ohutula hu situundu sy'esyaalo sya Efuraimu.

²¹Bano babereswa ebiko bine ebilaamba: Sekemu, alala neende amaloba k'enjayiro kahwo, esyali mu syaalo sy'ebigulu-gulu esya Efuraimu (esyali silala hu biko by'obwiiruhiro), Geseri,

²²Kibbusaimu, neende Bbeeti Horooni, alala neende amaloba k'enjayiro kahwo.

²³Ohutula hu situundu sy'esyaalo sya Daani, babereswa ebiko bine ebilaamba: Eliteeke, Gibbetooni,

²⁴Aijalooni, neende Gatirimoni, alala neende amaloba k'enjayiro kahwo.

²⁵Ohutula hu situndu sy'esyaalo sya Manaase Emuumbo, babereswa ebiko bibiri ebilaamba: Tanaki neende Gatirimoni, alala neende amaloba k'enjayiro kahwo.

²⁶Amadaala kano ak'enono ya Kohati, kanyoola ebiko ehumi ebilaamba alala byoosi, haandi alala neende amaloba k'enjayiro kahwo.

²⁷Nae omukaanda kuundi okw'abaandu ba Leefi, enono ya Gerisoni, kwanyoola ohutula hu situundu sy'esyaalo sya Manaase Bukwe ebiko bibiri ebilaamba: Golani mu Bbasani (esyali silala hu biko by'obwiiruhiro) neende Bbesiteera, alala neende amaloba k'enjayiro kahwo.

²⁸Nae ohutula hu situundu sy'esyaalo sya Yisakari, banyoola ebiko bine ebilaamba: Kisioni, Dabberaati,

²⁹Yarimuuti, neende Enganiimu, alala neende amaloba k'enjayiro kahwo.

³⁰Nae ohutula hu situundu sy'esyaalo sya Aseri, banyoola ebiko bine ebilaamba: Misali, Abbudoni,

³¹Helikaati, neende Rehobbu, alala neende amaloba k'enjayiro kahwo.

³²Nae ohutula hu situundu sy'esyaalo sya Nafutaali, banyoola ebiko bidatu ebilaamba: Kedesi mu Galilaaya, alala neende amaloba k'enjayiro kahwo (esyali silala hu biko by'obwiiruhiro), Hamootidori, neende Karitaani, alala neende amaloba k'enjayiro kahwo.

³³Amadaala kataali nasilala ak'enono ya Gerisoni kosi kanyoola obuungi bw'ebiko ehumi neende bidatu ebilaamba, alala neende amaloba k'enjayiro kahwo.

³⁴Nae Abaleefi badoong'ereyo boosi, enono ya Omumerari, banyoola ohutula hu situundu sy'esyaalo sya Sebbuluuni ebiko bine ebilaamba: Yokineyamu, Kariita,

³⁵Dimina, neende Nahalaali, alala neende amaloba k'enjayiro kahwo.

³⁶Nae ohutula hu situundu sy'esyaalo sya Rubbeeni, banyoola ebiko bine ebilaamba: Bbeseeri, Yahasi,

³⁷Kedemooti, neende Mefaati, alala neende amaloba k'enjayiro kahwo.

³⁸Nae ohutula hu enono ya Gaadi, banyoola ebiko bine ebilaamba: Ramoti mu Gileadi, alala neende amaloba k'enjayiro kahwo (sino syali silala hu biko by'obwiiruhiro), Mahanaimu,

³⁹Hesibboni, neende Yaseeri, alala neende amaloba k'enjayiro kahwo.

⁴⁰Mani sakira enono ya Omumerari yabereswa alala obuungi bw'ebiko ehumi neende bibiri ebilaamba.

⁴¹Mani ebiko by'Abaleefi ebyali mu baandu ba Yisiraeli boosi byali ebiko amahumi kane neende bitaanu-na-bidatu ebilaamba.

⁴²Haandi buli siko hu biko bino syalichiingi neende amaloba k'enjayiro kahwo nikabyebodoohania.

⁴³Mani mu ngira eyo yityo, niyo yi Omwaami yanyaliramo ohuberesa Yisiraeli yoosi esyaalo si yali niyasuubisa nachwiichwiisa bakuuka yaabwe ati ohwoola achia ohubaberesa. Mani nibali nibahamala ohusinyoola syoosi, boombaha, mani baasimenyamo.

⁴⁴Omwaami yababeresa omuleembe mu syaalo esyo syoosi, koti sa lu yali niyasuubisa bakuuka yaabwe hale. Abulao kata mulala hu basuku baabwe boosi owanyala ohubeema mu moni, olwohuba Omwaami yali niyaberesa Abaisiraeli obuyiingiri hu basuku baabwe boosi.

⁴⁵Omwaami yooseresa buli sisuubise si yali niyahola eyiri abaandu ba Yisiraeli.