Read saamia Yosua 22 Bible Online

Yosua 22 - saamia bible

Yosua 22

¹Bulaanu, Yosua yalaanga yabuusa alala abaandu boosi ab'enono cha Rubbeeni, Gaadi, neende Manaase Ebukwe.

² Yababoolera ati, “Mbao mumalire ohuhola buli siindu syoosi si Musa omuhalaabani w'Omwaami yabalagira ohuhola, haandi mwiisire oluyaali mu malako kaange koosi.

³Ebiha bino byoosi, eng'we haba simujwaang'reho Abaisiraeli baasyeeng'we daawe. Mubeere sa nimuli abehaliirifu ohubona muti mwiisa oluyaali mu malako k'Omwaami, Nasaae weeng'we.

⁴Mani bulaanu, koti sa lu yali nasubiise, Omwaami Nasaae weeng'we amalire ohuberesa Abaisiraeli baasyeeng'we omuleembe. Mani bulaanu, mukoboleyo engo mu loba li mwedoolera abeene, eloba liri hu lwaande lw'ebukwe wa Yorodaani, li Musa omuhalaabani w'Omwaami yababeresa.

⁵Mweehaliirise mubone muti, munyala ohwisaanga oluyaali mu malako ka Musa yabalagira mbwe: heeraanga Omwaami Nasaae wao, holaanga byaadaha, yisaanga oluyaali mu malako kae, beechaanga omweesikwa yaali, haandi muhalaabanireenge neende omwooyo kwao kwoosi, neende obulamu bwao bwoosi.”

⁶Yosua yababeresa ehabi, mani yaabaseebula baawaao; baachichaanga mu mako kaabwe.

⁷Nae bulaanu eyiri esituundu siindi esy'enono ya Manaase, Musa yali n'amalire ohubaberesa omukabo kwaabwe mu Bbasani; nae eyiri olwaande luundi, Yosua yesi yali n'amalire ohubaberesa omukabo kwaabwe okwali nikusibiraane neende abeebule baabwe, abali nibali mu loba lyali emuumbo wa Yorodaani. Mani Yosua niyoola ohubaseebula baweeo bachie mu mako kaabwe, n'amalire ohubaberesa ehabi,

⁸yababoolera ati, “Eng'we bulaanu muweeo mukobole engo mu mako keeng'we neende emyaandu mibitiirifu kyeeng'we ekyo, haandi neende eng'oombe nyiingi, haandi neende efeesa, neende esaabbu, neende emigasa, neende ebibya, haandi neende ebyefwaalo biingi muno; nae mukabanaangaho ebiindu bi mwapeeya ebyali eby'abasuku beeng'we, neende abeebule beeng'we.”

⁹Mani abaandu b'enono cha Rubbeeni, Gaadi, neende Manaase Ebukwe baawaao baakobola engo waabwe. Baleha abaandu ba Yisiraeli baandi badoong'ereo mu Silo, mu loba lya Kanani, mani nibatula olukeendo ohuchia eyiri eloba lyaabwe hu bwaabwe, elyali eloba lya Gileadi, li bali nibayaaya koti sa lu Omwaami yali naabalagiire ohubitira mu Musa.

¹⁰Mani enono cha Rubbeeni, Gaadi, haandi neende Manaase Ebukwe nichoola mu Gelilooti, nibasisiiri hu lwaande lw'emuumbo lwa Yorodaani, boombaha alutaari emaambali, haandi ey'esiroonyo, aambi neende omwaalo.

¹¹Nae abaandu baandi ba Yisiraeli abadoong'ereyo baboolerwa bati, “Eng'we mutekeerese! Abaandu b'enono cha Rubbeeni, Gaadi, neende Manaase Ebukwe, mbao bamalire ohwoombaha alutaari mu Gelilooti, hu lwaande lweefwe lwa Yorodaani!”

¹²Mani abaandu ba Yisiraeli nibawulira sino, omukaanda kwaabwe kwoosi kwebuusira alala mu Silo, ohuchia ohuchaaka ebiita enono neende chali nichiri ebukwe.

¹³Mani abaandu ba Yisiraeli batuma Finehaasi, omwaana wa Eliasaari omulaamisi, achie eyiri abaandu b'enono cha Rubbeeni, Gaadi, neende Manaase Ebukwe mu loba lya Gileadi.

¹⁴Abasaacha bahunuufu ehumi bosi bachiana neende Finehaasi, buli musaacha mulala ohutula mu buli daala lala ely'enono ch'emuumbo, haandi nga buli mulala oyo niye omwiimirisi w'edaala lala mu nono echio choosi.

¹⁵Bachia boola mu loba lya Gileadi, eyiri abaandu ba Rubbeeni, Gaadi, neende Manaase Bukwe,

¹⁶mani baachaaka ohulomalomera omukaanda kwoosi okw'abaandu b'Omwaami, nibababoolera bati, “Eng'we lwasiina mwaholere esiindu sibi syakiire ano siti eyiri Nasaae wa Yisiraeli? Mbano eng'we muhayuhiire Omwaami mani mweeyombahira alutaari yeeng'we abeene! Eng'we hane mbao haba simusimuloonda haba daawe!

¹⁷ Nae muhoya mwechulisaho esyonoono syeefwe koti lu hwali nihuli mu Peyori, Omwaami yaboneresa abaandu bae beene, niyehoonyera oluumbe lubi? Eng'we haba simunyalaho ohubona muti, efwe husisaandaanga sa hulw'esibi esyo! Mubaasa muti, esyonoono esyo haba sisyali nisimala ohutweekesa esomo?

¹⁸Eng'we ngamuli, muhayiriire sa muti haba simuchia hwemeeda ohumulondaanga haandi? Mani nikali mbwe muheengereo ohujeemera Omwaami olwaaleero, omweene aba achia ohunyoolerera buli muundu yeesi oli mu Yisiraeli muchuli.

¹⁹Mani bulaanu, nikali mbwe eloba lyeeng'we haba sirihoyera ohwiinamiraangamo, mwaambuhe mwiiche mu loba ly'Omwaami, eyiri Eyeema lyae. Mwiiche mani mutusabeho eloba diidi li huli nalyo. Nae mutatemaangaho ohujeemera Omwaami daawe, oba ohutukoonyaangamo abahayuha abali mweefwe beene, nimubitira mu hwoombaha alutaari ohumeeda hu alutaari y'Omwaami Nasaae weefwe.

²⁰Mwiichuliseho koti Akani omwaana wa Seera yahaya ohwiisa oluyaali mu lako lidiira hu biindu byasirwa bisihiriswe; omukaanda kwoosi okw'abaandu ba Yisiraeli kwabonereswa hulweesiindu esyo syoong'ene siti. Akani haba siniye yeeng'ene owafwa hulw'esibi syae esyo daawe.”

²¹Nae abaandu b'enono cha Rubbeeni, Gaadi, neende Manaase Ebukwe bakobola mu beemirisi b'amadaala k'enono ch'emuumbo bati:

²²“Ow'Obunyala Bwoosi niye Nasaae! Oyo niye Omwaami! Ow'Obunyala Bwoosi niye Nasaae! Oyo niye Omwaami! Oyo amanyire esikerere efwe hwaahola esiholwa sino, nihaandi efwe fwesi hudaha eng'we mwesi musimanye! Mani nikali mbwe efwe huhayuuhe mani hwaahaya ohuta obweesike bweefwe mu Omwaami, lehe hutemeeda ohuba nihuli abalamu daawe!

²³Nikali mbwe efwe huhayuhiire Omwaami, mani hweyoombahira abeene alutaari yeefwe, ohusaambiraangaho ebiyaanwa, oba ohwehoonyeraanga hulw'ebiyaanwa by'emere oba ebiyaanwa by'ohuholegana, leha Omwaami mweene mani atubonerese.

²⁴Poo! Efwe hwaasiholere olwohuba efwe hwali nihutiire huti, mu bwiicha eyo, abeechuhulu beeng'we bahoole baatubooleraanga bati, ‘Mwahaholeereho siindu siina syeene Omwaami, Nasaae wa Yisiraeli?

²⁵Oyo niye owataao Yorodaani ohuba olwaaho akatikaati weefwe, neende eng'we abaandu ba Rubbeeni neende Gaadi. Eng'we mubulaho esiindu syoosi simwahaholeere Omwaami daawe.’ Mani abeechuhulu beeng'we baheemere ao, mani baakera abeechuhulu beefwe baakama ohwiinamiraanga Omwaami.

²⁶Mani sakira efwe hwoombaha alutaari, obutasaambiraangaho ebiyaanwa, oba obutatusiraangaho ebiyaanwa,

²⁷nae mu bweyaango bweebyo byoosi, sibe koti esyeekesa eyiri abaandu beefwe, haandi kata neende abeeng'we, kata neende eyiri enjibulo enyiingi echiriloonda hweefwe, mbwe efwe mubwadyeeri bweene hwiinamiraanga Omwaami mu moni w'Eyeema lyae lyoolerefu, neende ebiyaanwa byeefwe ohusaambwaanga, haandi neende biyaanwa sa haandi neende ebiyaanwa by'ohuholeganaanga. Sino haandi syali sichia ohunyala ohukaira abeechuhulu beeng'we ohubolaanga bati, ebyeefwe bino haba sibidiira hooho hu Omwaami daawe.

²⁸Esibaaso syeefwe syali mbwe, esiindu sino siti nisiryoola ohukwaao, abeechuhulu beefwe bahanyale ohuboolaanga bati, ‘Boneho! Bakuuka yeefwe banyala ohuhola alutaari eyiri sa koti alutaari y'Omwaami. Nae haba siyali eyohusaambiraangaho ebiyaanwa, oba ohuyaaniraangaho sa ebiyaanwa, nae ohuba koti elyeeko eyiri abaandu beefwe neende abeeng'we.’

²⁹Efwe haba sihwahanyalire kata nabudiidi ohujeemera Omwaami, oba ohwaakama ohumuloondaanga bulaanu, nihwoombaha alutaari ohusaambiraangaho ebiyaanwa oba hulw'ebiyaanwa by'emere oba ebiyaanwa biindi. Efwe haba sihwahanyalire ohwoombahaho alutaari yiindi yoosi ohutusaho alutaari y'Omwaami Nasaae weefwe oweema mu moni w'Eyeema ly'Ohubaao hwae.”

³⁰Mani Finehaasi omulaamisi alala neende abasaacha bahunuufu bomu mukaanda kw'abaandu ba Yisiraeli ehumi abali nae bala, abali abeemirisi b'amadaala k'enono ch'emuumbo, nibawulira bi baandu b'enono cha Rubbeeni, Gaadi neende Manaase Ebukwe baboolaanga, batya muno.

³¹Finehaasi, omwaana wa Eliasaari omulaamisi, yababoolera ati, “Efwe bulaanu humanyire elalira huti hane Omwaami ali naafwe. Eng'we hane mbao haba simumuhayuhiire, mani mbao munyalire ohuwonia abaandu ba Yisiraeli boosi ohutulana hu sibonereso sy'Omwaami.”

³²Mani bulaanu Finehaasi alala neende abeemirisi abo batulana hu baandu ba Rubbeeni neende Gaadi, abali mu loba lya Gileadi, mani nibamala nibawaao nibakobola engo mu Kanani, eyiri abaandu ba Yisiraeli, ohubakobosera amakaluso.

³³Abaisiraeli boosi beekuta emboosi echio mani baamala baafumia Nasaae. Balehera ao ohwemeeda ohulomalomaanga hu huchia ohulwaana ebiita ohunyaasa eloba li baandu ba Rubbeeni neende Gaadi bali nibamenyeremo.

³⁴Abaandu ba Rubbeeni neende Gaadi baboola bati, “Alutaari yino niyo obuloli eyiri efwe fweesi mbwe, Omwaami niye Nasaae mweene.” Mani baikuliha bati, “Buloli.”