Read saamia Yosua 5 Bible Online

Yosua 5 - saamia bible

Yosua 5

¹Abatuki b'Abaamoori boosi, abali emuumbo wa Yorodaani neende abatuki b'Abakanani boosi abali hu ndulo w'Enyaanja Hoongo ya Mediterania bawulira bati Omwaami yali n'ahamiisye Yorodaani ohwoola lu baandu ba Yisiraeli bahalakania. Batya muno mani bawaamo omwooyo hulw'Abaisiraeli.

²Omwaami yaboolera Yosua ati, “Hola amahaande ohutula mu saanja ch'engaano, mani ohebe Abaisiraeli.”

³Kata katyo, Yosua yesi yahola koti lu Omwaami yalagira, mani yaahebera Abaisiraeli abuundu alaangwa bwe “Olugulu Lwohuheba.”

⁴ Sino nisyo esyakera Yosua yaabaheba: abaandu b'esisaacha boosi hu baandu batula mu Misiri, abasaacha b'ebiita boosi, bali nibamala ohufwiira hu ngira mu siparara nibali nibamalire ohutula mu Misiri.

⁵Kata neende abaandu boosi abali nibatula mu Misiri bali nibamala ohuhebwa, nae abaandu boosi abeebulirwa hu ngira mu siparara luunyuma lw'ohutula mu Misiri haba sibali bahebwa daawe.

⁶Olwohuba abaandu ba Yisiraeli bali nibakeenda embaka y'emyaaka amahumi kane amalaamba mu siparara, ohwoolera elalira esyaalo syoosi, abasaacha b'ebiita abali nibatula mu Misiri, bawa, olwohuba haba sibali nibatekeeresa ekono ly'Omwaami; mani yi bali, Omwaami yali niyalaira ati haba saachia ohubakanya ohubonaho esyaalo si Omwaami yali niyeechubira bakuuka yaabwe ohutuberesa, esyaalo sihulukusa amabeere neende obuuhi.

⁷Abaana basyaani b'abaandu bano haba sibali nibahebwa daawe, mani byali mbwe ni olwiibulo luyaaha luno nilwo lu Yosua yaheba.

⁸Ohuheba nihwawa, esyaalo syoosi syadoong'a sa mu kaambi ohwoola lu bihebe byaona.

⁹Omwaami yaboolera Yosua ati, “Olwaalero, ese malire ohubamalaho esoni ch'ohuba abawaambe mu Misiri.” Mani esyo nisyo esikera abuundu ao n'alaangwa mbwe “Giligaali,” ohwoola olwaalero.

¹⁰Abaisiraeli nibali nibasisiiri mu kaambi mu Giligaali, hu syaalo sikwalaafu siri aambi neende Yeriko, bahusa Paasaka engoloobe y'oludaalo lwa ehumi neende hane lw'omwoosi okwo.

¹¹Oludaalo lwaloondaho nilwo olwali ehabi litaangira lyaabwe ohulyaaho hu byohulya byalimwa mu Kanani: emere esaambe neende emigaati ekitaali emibbaahe.

¹²Ao niwo yi mana yaakamira ohukwichaanga niyitula Muukulu, mani Abaisiraeli baakama ohubeechaanga nayo. Ohutula esiha esyo ohwemeeda mu moni, balichaanga sa ebyohulya byalimwa mu Kanani.

¹³Haandi Yosua niyali naali aambi neende Yeriko, yeechuhana naabona omusaacha niyeemere mu moni wae, n'adiirire olugaanga. Yosua yasuda aambi nae mani yamuteeba ati, “Ewe oli mulala hu b'amaye beefwe, kose oli omusuku?”

¹⁴“Kata,” omusaacha oyo haba siyakobolamo daawe. “Ese ndi ano koti omuhoongo w'eye ly'Omwaami.” Yosua yeehubba aasi mu hwiinamira mani n'aboola ati, “Ese naange ndi sa omuhalaabani wao, omuhuluundu waange. Siina syeene syoodaha ese hole?”

¹⁵Mani omuhoongo w'eye ly'Omwaami yamuboolera ati, “Mani ewe wefwaalulemo ebiraato byao ebyo; weemere Abuundu Woolerefu.” Mani Yosua yahola sa koti lu yali n'amubooleere.