Read saamia Yosua 9 Bible Online

Yosua 9 - saamia bible

Yosua 9

¹Ohuyiingiraanga hwa Yisiraeli hwoola hwaamanyihana muno eyiri abatuki boosi abali emuumbo wa Yorodaani mu bigulu, mu nandaalira ch'ebigulu, haandi neende hu syaalo syakwalaala sya hu lwaasi lw'Enyaanja Hoongo ya Mediterania, ohwoolera elalira emukulu wa Lebbanooni; bano nibo abatuki b'Abahiiti, Abaamoori, Abakanani, Abaperisi, Abahiifi, neende Abayebbusi.

²Bano boosi baambaania alala amaye kaabwe ohulwaania Yosua neende Abaisiraeli boosi ohuyirira alala.

³Nae abaandu ba Gibbeoni, abali nibali Abahiifi, nibawulira bi Yosua yali naaholere hu Yeriko neende Ai,

⁴baheengao ohumubachirisa. Bachia banyoolaho ebyohulya mani badwiiha hu suhiri chaabwe neende ebigunia byakofula neende ebikiingiro by'efiini byanabwa-nabwa.

⁵Befwaala ebikubo byataanduha-taanduha neende akaala byanabwa-nabwa. Emigaati ki bali nibakiingire kyoosi kyali ekyooma haandi ekyoobba olukuhu.

⁶Mani baachia hu kaambi yali mu Giligaali baboolera Yosua neende Abaisiraeli boosi alala bati, “Efwe hutula mu syaalo sy'eyale muno. Bulaanu efwe hudaha ewe ohole naafwe endagaano.”

⁷Nae Abaisiraeli baboola bati, “Siina syeene esikera efwe hwaahola endagaano naang'we? Awuundi eng'we mwamenya sa aambi naafwe ano.”

⁸Nabo baboolera Yosua bati, “Efwe huli mu bunyala bwao sa.” Nae Yosua yabateeba ati, “Nae eng'we niing'we naanu? Mutula yeena bweene?”

⁹Bulaanu bachaaka ohumukanira olukano luno luti: “Efwe hutula mu syaalo sy'eyale muno, omuhuluundu, olwohuba hwawuliraho sa ebidiira hu Omwaami, Nasaae wao. Hwawulira buli siindu syoosi si yahola mu Misiri

¹⁰haandi neende bi yaholere hu batuki babiri ab'Abaamoori ebukwe wa Yorodaani: Omutuki Sihooni wa Hesibboni, neende Omutuki Ogu wa Bbasani, owali niyamenya mu Asitarooti.

¹¹Mani abeemirisi beefwe, alala neende abaandu boosi abamenya mu syaalo syeefwe nibo abatuboolera bati hutekeheho ebyohulya eby'olukeendo ohwiicha hubukaanane naawe. Hwaboolerwa ohwiicha huhukwe mu makulu mani huhusabe ohole endagaano naafwe.

¹²Bonaho emigaati kyeefwe kino. Nihwatula engo nakyo, mani hwachaaka olukeendo ohwiicha ohubukaanana naawe, kyali nikisisiiri emibafu. Nae bulaanu bonaho! Kyoomeerere haandi kyuubbire olukuhu.

¹³Nihwali nihwiichusa ebikiingiro by'efiini by'eseero bino, byali nibisisiiri ebiyaaha, nae bulaanu bonaho sa! Bitaanduuhe biweere. Engubo cheefwe neende akaala byeefwe byoosi bikofuule biweere ohweema hu hukeenda olukeendo luleeyi muno.”

¹⁴Abaisiraeli bafukiiriraho ebyohulya biindi ohutula mu mahono kaabwe, nae haba sibachia beteebaho eyiri Omwaami ebidiira hu byohulya bino daawe.

¹⁵Yosua yahola endagaano y'obwiicha neende abaandu ba Gibbeoni mani yaabafukiirira bamenye nabo. Abeemirisi b'omukaanda kw'abaandu ba Yisiraeli basuubisira elalira bati bachia ohwomiisa endagaano eyo.

¹⁶Nae endaalo chidatu nichabitao endagaano eyo niyimalire ohweehola, Abaisiraeli bafuumbula bati hane, abaandu bano bali mubwadyeeri bweene nibamenya aambi bweene nabo.

¹⁷Mani sakira abaandu ba Yisiraeli batula olukeendo, nae luunyuma lw'endaalo chidatu choong'ene, boola mu biko bi baandu bano bali nibamenyamo: Gibbeoni, Kefira, Bberooti, neende Kiriati Yearimu.

¹⁸Nae Abaisiraeli haba sibabeetaho daawe, olwohuba abahuluundu b'oluyia lwa Yisiraeli bali nibahola nabo esisuubise sy'elalira mu liita ly'Omwaami, Nasaae wa Yisiraeli. Mani abaandu boosi bekanyiirisa eyiri abahuluundu baabwe abo, hu siindu sino muno,

¹⁹nabo baakobolamo bati, “Efwe hwamala ohuhola nabo esisuubise sy'elalira mu liita ly'Omwaami Nasaae wa Yisiraeli. Mani bulaanu efwe haba sihunyala ohubaholaho obusuku bwoosi daawe.

²⁰Huhoyere ohubaleha baabaao abalamu hulw'esisuubise syeefwe esyo; nihutabaleha baabaao, Nasaae mweene niye oba n'achia ohusaandya efwe beene.

²¹Mani lehe babeeo abalamu sa, nae bahoyere ohutwasyakiraanga eehwi neende ohutuchiraanga amaachi.” Mani sino nisyo si beemirisi baheengao.

²²Bulaanu Yosua yalagira abaandu ba Gibbeoni ohuleetwa yaali, mani yaabateeba ati, “Eng'we lwasiina mwatubachirisa mutyo, mani mwaatuboolera mbwe muti, mwali nimutula mu syaalo sy'eyale muno, nihane mwamenya sa aambi ano muti?

²³Mani olwohuba mwahola sino siti, Nasaae amalire ohubaheengera omusaango luweere. Abaandu beeng'we bachia ohubeechaanga abawaambe endaalo choosi pe, nibasyakaanga sa eehwi, neende ohuchichaanga sa amaachi ebyomu nyuumba ya Nasaae waange.”

²⁴Nabo bakobolamo bati, “Omuhuluundu, efwe hwasihola hutyo olwohuba hwali nihumanyire huti hane byali ebyadyeeri mbwe Omwaami Nasaae wao yali niyalagira Musa omuhalaabani wae ohubaberesa esyaalo sino syoosi, haandi neende ohwiita abaandu bali nibasimenyamo koti lu mwemeeda ohuyira esyaalo. Mani efwe hwasihola olwohuba hwali hwabatya muno; efwe mani hwali hwatya ohukosa obulamu bweefwe.

²⁵Nae bulaanu mbano huli mu bunyala bwao; mani ewe tuhole sa esiindu syoosi syooba n'obaasa oti nisyo esihoyera.”

²⁶Mani sino nisyo esiindu si Yosua yahola: yabaliinda mani yaahaya ohukanya abaandu ba Yisiraeli ohubeeta daawe.

²⁷Nae esiha syeene esyo, yabahola baaba abawaambe, ohwasakaanga eehwi neende ohuchichaanga amaachi eby'abaandu ba Yisiraeli, haandi neende hulwa alutaari y'Omwaami. Mani ohwoola enyaanga yino, baholaanga sa emirimo kino abuundu yi Omwaami aba niyadoola ohwiinamirwaangao.