Read saamia 2 Abatesalonika 1 Bible Online

2 Abatesalonika 1 - saamia bible

2 Abatesalonika 1

¹ Ebbarwa yitula eyiri Paulo, Silifaano neende Timoteo, niyichiira abafukiiriri bali mu Tesalonika, abaandu ba Nasaae weefwe, neende Omwaami Yesu Kristo.

²Lehe Nasaae Seefwe neende Omwaami Yesu Kristo bababerese embabaasi neende omuleembe.

³Baasyeefwe, huhoyere ohweebasa Nasaae hulweeng'we buli siha. Silai efwe ohweebasa hutyo olwohuba efukiirira yeeng'we yemeeda niyihula muno, haandi obuheeri bu buli muundu ali ninabwo eyiri owaasye bwosi bwemeedere.

⁴Sakira efwe fwesi huli ohubehoyeramo eyiri emikaanda ky'abafukiiriri ba Nasaae kiindi. Hwemeeda ohubehoyeramo mu ngeri yi mwemeederamo ohugumira mu fukiirira kata neende mwahaba nimusaandisibwa neende mu huchuunisibwa hu mulimo.

⁵Sino nisyo esyeekesa siti, ohuheenga hw'emisaango hwa Nasaae hwadyeeri, haandi situliramo eng'we ohubalibwa mu bahoyera Obwaami bwa Nasaae, bu muli ohusaandira.

⁶Olwohuba Nasaae asibona ati sihoyera ohusaandya abo ababasaandya,

⁷haandi ohutuberesa alala naang'we obuwuluuhiro abali ohusaandisibwa, Omwaami Yesu niyahabonehane n'atula Muukulu alala neende malaika bae b'amaani mu muliro kwaaduha.

⁸Sino sichia ohuba esyohwetuunga eyiri abo abataamanyire Nasaae, neende abo abatawulira Emboosi Ndai y'Omwaami Yesu.

⁹ Bachia ohunyoola ohusaandisibwa hw'ohumalirwao elalira nibatusibwa mu moni w'Omwaami neende mu luyaali lwae lw'amaani,

¹⁰naakobola hu ludaalo olwo abereswe oluyaali mu boolerefu bae, haandi yesibwemo oluyaali mwaabo boosi abafukiirira olwohuba obuloli mweeng'we bwafukiirirwamo.

¹¹Sakira hubasabira buli siha, huti Nasaae weefwe ahoyere anyale ohubahola mube abahoyera obulamu bumwalaangwamo. Haandi neende amaani kae omweene yoserese abweene buli sichiiririrwa silai siri mu myooyo kyeeng'we neende buli mulimo kumuhola ohweema hu fukiirira.

¹²Mu ngira yino, nimwo mu liita ly'Omwaami weefwe Yesu lichia ohuberesebwa oluyaali mweeng'we, haandi eng'we mwesi muchia ohunyoola oluyaali mu Omwaami Yesu, ohweema hu mbabaasi cha Nasaae weefwe neende Omwaami Yesu Kristo.