Read saamia 2 Abatesalonika 2 Bible Online

2 Abatesalonika 2 - saamia bible

2 Abatesalonika 2

¹ Bulaanu basyaange, ebidiira hu hukobola hw'Omwaami weefwe Yesu Kristo neende ohwebuusa alala hweefwe ohumubukaanira, hubekweeda,

²mutaanguyaanga ohuba neende ohukana-kana mu bibaaso byeeng'we, oba ohuba neende ohwesiinduha hulw'emboosi, oba ebibaaso, oba ebbarwa biboola biti bitula eyiri efwe, nibyomiisa biti Oludaalo lw'Omwaami lwoolere.

³Lehe omuundu yeesi atababacha mu ngeri yoosi. Olwohuba oludaalo olwo haba silwahoole ohwoola lu huyiingana humaliirihayo hwahabeeo mani omuundu otatya Nasaae yi batekehera nyaanja y'omuliro yahabonehane.

⁴ Omuundu wuno achia ohuyiingania haandi yeniinie ohuhiraho buli syoosi esilaangwa nasaae oba esiinamirwa. Haandi achia ohweniinia aakulu mani yeyihaase mu Nyuumba ya Nasaae, mani yelaangirire ati niye Nasaae.

⁵Simwiichulisa muti ndababoolera bino byoosi nindali nisisiiri naang'we?

⁶Haandi bulaanu mumanyire esiindu siri ohumukayira ohwiicha hwaanyale ohubonehana esiha syae syeene nisyoolere.

⁷Olwohuba amaani k'esyaama akakera abaandu baahaya ohutya Nasaae kamala ohuchaaka omulimo; nae omuundu okakayira ohumwoolaho achia ohuhola atyo ohwoola lu yahatuswe hu ngira.

⁸ Mani ao niwo lu muundu otatya Nasaae achia ohubonehanira, yi Omwaami Yesu achia ohwiita neende omuuya kw'omuuhanwa wae mani amusihirise neende ohubonehana hw'oluyaali lwae naakobola.

⁹ Omuundu otatya Nasaae oyo, achia ohwiicha neende amaani ka Sitaani, mani ahole obulolero neende ebiwuukisa by'obubacha,

¹⁰neende ebyonoono biingi ebibachirisa ab'ohusihirira, olwohuba bahaya ohuheera obwadyeeri bwahabawoniisye.

¹¹Mani hulw'emboosi yino, Nasaae achia ohubatumira obubacha buungi, mani hubafukiirire ebitahoyera,

¹²mani abaheengere omusaango kuhire abo abatafukiirira obwadyeeri nae baasaangaalira ebyonoono byoong'ene.

¹³Abaheerwa b'Omwaami, huhoyera ohweebasa Nasaae hulweeng'we buli siha, olwohuba Nasaae yabadoola muhuchaaka ati munyoole ohuwonisibwa neende amaani ka Mwooyo Mwoolerefu akabalabya hulw'efukiirira yaadyeeri yeeng'we yi muli nayo.

¹⁴Nasaae yabalaanga mu fukiirira yino n'abitira mu Mboosi Ndai yi hwabeekesa, ati munyoole hu luyaali lw'Omwaami weefwe Yesu Kristo.

¹⁵Sakira basyaange, mweeme bulai haandi mwomiirire hu bwadyeeri buhwabeekesa, mu nomanoma neende mu bbarwa yeefwe.

¹⁶Lehe Omwaami weefwe Yesu Kristo omweene-no-mweene, alala neende Nasaae Seefwe, owatuheera haandi mu mbabaasi chae yatuberesa obwomiifu butaakama neende esuubi lai,

¹⁷alemye emyooyo kyeeng'we mani ababerese amaani k'ohuhola neende ohulomaloma buli siindu silai syoosi.