Read saamia 2 Abatesalonika 3 Bible Online

2 Abatesalonika 3 - saamia bible

2 Abatesalonika 3

¹Esimaliirihayo, basyeefwe, mutusabire muti Emboosi ya Nasaae yinyale ohusalaana bwaangu haandi yinyoole oluyaali koti lu yali mweeng'we.

²Haandi mutusabire muti Nasaae atuwonie abasuku neende abonooni, olwohuba sisiri mbwe buli muundu yeesi ali neende efukiirira.

³Nae Omwaami mweesikwa; achia ohubaberesa amaani, haandi abakaye ohutula hu musuku Sitaani.

⁴Haandi huli abeesikwa mweeng'we mu Omwaami huti muli ohuhola buli siindu sihubalagira haandi muchia ohwemeeda ohuhola mutyo.

⁵Lehe Omwaami yeemirire emyooyo kyeeng'we mube neende obuheeri bwa Nasaae haandi neende obwesimiirisi bwa Kristo.

⁶Baasyeefwe, mu liita ly'Omwaami weefwe Yesu Kristo, hubalagira huti, mweyaabe omufukiiriri mukata yeesi otaloondakana neende enjekesa yi hwababeresa.

⁷Olwohuba eng'we abeene mumanyire bulai muti muhoyere ohutuboneraho engeri yi hwabeekesa. Sihwali bakata nihuli mweeng'we

⁸haandi sihwalyaaho esyohulya sy'omuundu yeesi nihutatuungire. Nae hwahalaabana haandi hwaholaanga neende amaani esiro neende esideete, huhaye ohusidoyera omuundu yeesi mweeng'we.

⁹Hwahola sino nihutachiiririra huti haba sihudaha obuhoonyi bweeng'we; nae nihuchiiririra huti hube esyohuboneraho yi muli.

¹⁰Olwohuba nihwali nihuli naang'we hwababeresa elako huti: omuundu yeesi otahola omulimo haba saahoyere hulya.

¹¹Huboola sino olwohuba huwulira mbwe aliwo abaandi mweeng'we abakata abatadaha ohuhola omulimo kwosi ohumalaho ohwiingiriraanga sa emirimo ky'abaandi.

¹²Mu liita ly'Omwaami Yesu Kristo hubalagira haandi husaba abaandu b'engeri eyo batereese ebiima byaabwe, haandi bachaake ohuhola emirimo hu banyale ohunyoola ebiindu bihoonya obulamu bwaabwe bweene.

¹³Nae eyiri eng'we basyeefwe, mutajoong'a ohuholaanga amalai.

¹⁴Omuundu yeesi oli eyo otawulira bi hubaandiikira mu bbarwa yino mumwehaliirisenge bulai, haandi, mutaholeranga alala nae, hu soni chimudiire.

¹⁵Nae mutababukulanga koti omusuku, ohumalaho mumweekese koti omwaana weeng'we.

¹⁶Lehe Omwaami mweene, okabanga omuleembe ababerese omuleembe endaalo choosi haandi mu ngira yoosi. Omwaami abe neende buli muundu yeesi mweeng'we.

¹⁷Ese Paulo nyandiika amaheeso kano neende omuhono kwaange kweene, haandi aho niho ahalolero handechaanga mu bbarwa chaange choosi. Yino niyo engeri yi nyandiki.

¹⁸Leha embabaasi ch'Omwaami weefwe Yesu Kristo chibe naang'we mweesi.