Read saamia 1 Timoteo 1 Bible Online

1 Timoteo 1 - saamia bible

1 Timoteo 1

¹Ebbarwa ohutula eyiri Paulo omutume wa Kristo Yesu ohweema hu hulagira hwa Nasaae Omuwonia weefwe, neende Kristo Yesu esuubi lyeefwe.

² Ohuchiira Timoteo, omwaana waange w'elalira mu fukiirira. Lehe embabaasi neende esisa, alala neende omuleembe kutula eyiri Nasaae Seefwe neende Kristo Yesu Omwaami weefwe bibe naang'we.

³Ndaha odoong'e mu Efeso koti lundahwekweeda nindali ninjia mu Makedonia, onyale ohukayira abaandu baandi bateekesa enjekesa yiindi.

⁴Baboolere balehere ao ohweboya hu ngano chitaamanyihaane neende ohubala enjibulo chitaakama echileeta sa ohuyingana nae sichirimo ameeko ka Nasaae akali mu fukiirira.

⁵Esichiiririrwa sy'ohweekesa hweefwe nisyo obuheeri butulira elalira mu mwooyo mulai, neende embaasa ndai, neende efukiirira y'obwadyeeri.

⁶Abaandu baandi bamala ohwawuha ohutula hu njekesa yadyeeri, mani bachia badoondobana beyiingisa mu huyiingana hubulamo obuhoonyi.

⁷Beehola ohuba abeekesa b'Amalako ka Musa, nae haba sibamanyire kata bi baboola, haandi nibataamanyire ebiindu bi balomalomaho neende obwomiifu batyo.

⁸Humanyire huti amalako ka Musa malai omuundu yeesi n'akehoonyera koti lu kahoyeere.

⁹Haandi humanyire huti amalako haba sikateebwao hulw'abaandu baluungifu nae kateebwao hulw'abahalaki b'Amalako neende abajeemu, abatatya Nasaae neende abahola-mbi, abataali aboolerefu neende abatadeeba hu Nasaae, abeeti ba basaabwe neende abeeti ba bang'inaabwe, abeeti b'abaandu.

¹⁰Kateebwao hulw'abaandu bacheke, abayirana neende abasaacha oba abahasi baasyaabwe, abakosao abaandu, ababacha, abatusa obuloli bw'obubacha, neende abahola esiindu syoosi esikabuhaane neende enjekesa yadyeeri.

¹¹Enjekesa yadyeeri niyo eyo eyichiana neende Emboosi Ndai y'oluyaali yindaberesebwa eya Nasaae ofumisibwa.

¹²Ndeebasa Kristo Yesu Omwaami weefwe owamberesa amaani k'ohuhola omulimo kuno, olwohuba yambukula koti omuundu mweesikwa mani yandoola ohumuhalaabanira,

¹³ kata nindamufwoolaanga hale haandi nindamusaandyanga, haandi nimunyeka. Nae Nasaae yeecha yangwiira esisa olwohuba ndaholaanga endyo nitaali neende efukiirira haandi nitaamanyire esy'ohuhola.

¹⁴Mani Omwaami weefwe yanjuhira embabaasi nyiingi muno alala neende efukiirira neende obuheeri ebiri ebyeefwe mu Kristo Yesu.

¹⁵Enomanoma yino yadyeeri haandi yihoyera ohwakaanirwa neende ohufukiirira hwoosi yiti, Kristo Yesu yeecha mu syaalo muno ohuwonia abahola-mbi. Naange niise ohiriramo elalira mu bahola-mbi;

¹⁶nae hulw'esifune sino, Nasaae yangwiira esisa hu Yesu Kristo anyale ohweekesa ohwesimiirisa hwae hwiichufu ohuba esy'ohweekeraho eyiri abo abachia ohumufwiiramo banyoole obulamu butaakama.

¹⁷Eyiri Omutuki w'endaalo choosi, otafwa, otabonehana, Nasaae mulala yeeng'ene, afumisibwe haandi abereswe oluyaali endaalo choosi. Amiina.

¹⁸Timoteo, mwaana waange, huberesa esilagiro sino, esichiana neende obunabbi bwahulomwalomwaho hale, mani bihuhoonye onyale ohulwaana neende obumaliirifu bwoosi.

¹⁹Mani yomiirira hu fukiirira yao, haandi obe neende ebibaaso bilai. Abaandu baandi baleha ebibaaso bilai mani beetera elalira efukiirira lyaabwe.

²⁰Mwaabo nimwo omuli Hamenesi neende Alekisaanda, ba ndamala ohudiisa Sitaani hu banyale ohweeka obutafwoolaanga Nasaae.