Read saamia 1 Timoteo 3 Bible Online

1 Timoteo 3 - saamia bible

1 Timoteo 3

¹Enomanoma yino yadyeeri: Omuundu yeesi n'adaha ohuba omweemeresi w'abafukiiriri, aba adaha omulimo kw'oluyaali.

² Omweemeresi ahoyere ohuba omuundu otaaliho esyonoono syoosi; ahoyere ohuba omusaacha w'omuhasi mulala, otaali ow'etima, omwegenderesa, ow'oluyaali, osangaalira abakeni, haandi ahoyere ohuba omweekesa mulai.

³Ahoyera ohuba otaali omumeesi, haandi otaali omwaalaba, nae ahoyere ohuba omuloonga, otaali omusoolani, haandi otaali omwekoombi w'eseende.

⁴Ahoyere ohuba omuundu onyala ohuliinda edaala lyae bulai, oweekesa abaana bae ohuba abaloonga haandi ababeresa abaandu oluyaali mu ngira choosi.

⁵Olwohuba omuundu otaamanyire ohuliinda edaala lyae, anyala atye ohuliinda abafukiiriri ba Nasaae?

⁶Omweemeresi s'ahoyere ohuba omuundu wahachaaka sa ohuba omufukiiri, olwohuba anyala ohwehuduumbasa niyefumia mani yahengerwa omusaango nasilala koti okwahengerwa Sitaani.

⁷Ahoyere ohuba omuundu yi baandu bataali abafukiiriri bosi beesamo oluyaali, ataali ao anyala ohubaaho sibamufunaania mani yaakwa mu muteego kwa Sitaani.

⁸Abahalaabani b'abafukiiriri bosi bahoyere ohuba abaandu b'ebiima bilai haandi abalomaloma obwadyeeri, abataali abang'wi muno, haandi abataali neende esiwonya sy'eseende.

⁹Bahoyere ohwomiirira hu fukiirira yadyeeri yibekeswa nibali neende ebibaaso bilai.

¹⁰Haandi bahoyere ohuteemebwaho mberi; mani nibamalire ohweyekesa bati babulaho esifune syoosi, lehe bafukiirirwe ohuba abahalaabani b'abafukiiriri.

¹¹Abahasi baabwe bosi bahoyere ohuba abaandu b'ebiima bilai, abataali abamoonyi, nae abaloonga haandi ab'esikwa mu biindu byoosi.

¹²Omuhalaabani w'abafukiiriri ahoyere ohuba omusaacha w'omuhasi mulala yeeng'ene haandi nga anyala ohuliinda bulai abaana bae neende ohuliinda bulai edaala lyae lyoosi.

¹³Olwohuba oyo onyala ohuhola bulai omulimo kw'ohuhalaabanira abafukiiriri yeefunira eliita lai mu baandu haandi aba neende obwomiifu buungi mu fukiirira yiri mu Kristo Yesu.

¹⁴Ese omweene suubira ohwiicha eyo bwaangu, nae niwiichuhana ndahiinda,

¹⁵mbaandiikira ebbarwa yino nimbeekesa engeri yimuhoyere ohwebisiramo nimuli mu Nyuumba ya Nasaae, abo nibo abafukiiriri ba Nasaae mulamu, omusiiro haandi yi bwadyeeri bwoosi bweemaho.

¹⁶Ataali ohukana-kana hwoosi, esyaama sy'ediini yeefwe sihuluundu muno esiboola siti: Nasaae yeyekesa koti omuundu mweene, yomiisibwa neende Mwooyo Mwoolerefu, haandi malaika bamubona, yayaalibwa mu byaalo, yafukiirirwamo mu syaalo, yayiribwa Muukulu neende oluyaali.