Read saamia 1 Timoteo 4 Bible Online

1 Timoteo 4 - saamia bible

1 Timoteo 4

¹Bulaanu, Mwooyo aboola bulai bweene ati, mu ndaalo chiicha, abaandu baandi balitula hu fukiirira nibaloonda emyooyo mibachirisi neende enjekesa ch'emisaambwa.

²Balihola batyo nibabitira mu hwekaadirisa hw'ababacha ba bibaaso byaabwe byalala.

³Bakaira ohudeehisania mani beyambaania hu huhaya ebyohulya bi Nasaae yaloonga ati biliibweenge neende ohweebasa Nasaae neende abo abafukiirira haandi abamanyire obwadyeeri.

⁴Olwohuba buli siindu syaloongwa neende Nasaae silai, mani sibulao esiindu syoosi esihoyere ohukaanibwa nisiriibwa neende ohweebasa Nasaae;

⁵olwohuba ao siba silabisibwe neende Emboosi ya Nasaae neende ohusaba esaala.

⁶Nooberesa abafukiiriri bao amakerako kano, oba ochia ohuba omuhalaabani mulai wa Kristo Yesu, owahusibwa neende emboosi ch'efukiirira haandi ech'enjekesa yadyeeri yiwaloonda.

⁷Otediisaho hu ngano echibulamo amakesi haandi echitaalimo ohutya Nasaae. Wenase ohumenya mu hutya Nasaae;

⁸olwohuba kata neende ohunasa omubiri nihuli neende engaanga, ohutya Nasaae huli neende engaanga mu ngeri choosi, koti hulimo esisuubise sidiira hu bulamu buliwo bulaanu neende hu bulamu bucha ohubaao mu moni.

⁹Enomanoma yino yadyeeri niyo haandi yihoyera ohufukiirirwa hwoosi yiti:

¹⁰eno huhalaabana haandi hunyaahana, olwohuba huli neende esuubi lyeefwe hu Nasaae mulamu, Omuwonia w'abaandu boosi, ohuhirira elalira abo abafukiirira.

¹¹Lagiraanga haandi yekesaanga ebiindu bino.

¹²Otalehaho omuundu yeesi yalekeeresa oburaaga bwao, nae beresa abafukiiriri esyohuboneraho mu nomanoma neende mu biholwa, mu buheeri, muhufukiirira neende mu buluungifu.

¹³Mani ohwoolera elalira lu ese mweene ndahanyale ohwiicha eyo, malira ebiha byao alala neende amaani kao koosi hu husomaanga ebyaandiika byoolerefu alafu mu lwichuule, alala neende ohuyalaanga neende ohusomesaanga.

¹⁴Nae kata katyo, ewe otalehaanga ohwehoonyera esiyaanwa sy'ebyomwooyo si hulimo esyo, haandi esyo si ewe mweene wakabwa bukabwa nga lu banabbi bali nibali ohulomalomaanga sa batyo, haandi neende nga lu abahuluundu bosi bahwiisaho amahono akaabwe batyo.

¹⁵Holaanga ebiindu bino byoosi, mani haandi weweerengeyo sa ewe omweene elalira hu byeene ebyo bityo, hu wesi omweene weemeo onyaleenge ohukeraanga ehulaahulana eyo ohubonehanaanga neende abaandi boosi.

¹⁶Welindeenge ewe omweene, haandi oliindeenge bulai enjekesa eyao eyo. Weedinye sa ohuhuloonga akeene kano ohubeera n'ohola otyo, oba ochia ohweonia ewe omweene alala neende abo boosi abahutekeeresa.