Read saamia 2 Timoteo 4 Bible Online

2 Timoteo 4 - saamia bible

2 Timoteo 4

¹Mu moni wa Nasaae neende mu moni wa Kristo Yesu, ochia ohuheengera omusaango abalamu neende abafu, haandi olwohuba achia ohwiicha koti Omutuki, hwekweeda neende esinani siingi endi:

²yalaanga Emboosi ya Nasaae, yomiiraanga ohuyiyaala (kata neende esiha nisihoyera oba nisitahoyera), yekesa bamanye, boolobye, bagumie emyooyo, haandi yekesa neende ohwesimiirisa.

³Olwohuba esiha sichia ohwoola, abaandu bahaye ohuwulira enjekesa yadyeeri, nae bachia ohuloonda obwekoombi bwaabwe abeene, haandi bachia ohwebuusiraho abeekesa ba beene badaha, abacha ohubaboolera ebiindu bi matwi kaabwe kadaha ohuwulira.

⁴Bachia ohutula hu hutekeeresaanga obwadyeeri, mani bamalire ebibaaso byaabwe hu ngano chibulamo obuhoonyi.

⁵Nae ewe, ebiha byoosi ohoyere ohweetuka omweene; gumira ohusaanda, hola omulimo kw'omuyaali w'Emboosi Ndai, haandi yoseresa obufunibwa bwao koti omuhalaabani wa Nasaae.

⁶Nae hulwaange, esiha mbano syahanjolera esy'ohweyaanayo; esiha sinjoleere esy'ohutula mu bulamu buno.

⁷Nwaanire ohulwaana hulai, malire embiro chaange, haandi niindire efukiirira.

⁸Mani bulaanu esirabo sy'obuluungifu siniindire, si Omwaami, omuheengi w'emisaango w'obwadyeeri, achia ohundiisa hu Ludaalo olwo haandi haba si ese syeng'ene, nae achia ohudiisa abo boosi abaliindiriire neende obuheeri ohwiicha hwae.

⁹Teemaho koti lu onyala ohwiicha yiindi bwaangu.

¹⁰ Olwohuba Deema, amalire ohuwambana obwiicha neende esyaalo, kata amalire ohuundeha achiire Tesalonika. Kireseni achiire Galatia. Nae Tito yacha Dalamatia.

¹¹ Luka yeeng'ene niye odoong'ere naange. Bukula Mariko mani wiiche nae; olwohuba anyala ohuhoonya ohuhalaabana.

¹² Ndatuma Tikiku ohuchia mu Efeso.

¹³ Niwiicha, ndeetere ekooti lyaange li ndalehera Karipo mu Turoasi; leeta neende ebitabo byosi, ohuhirira elalira eby'amaseero.

¹⁴ Alekisaanda omwiitaanyi w'emigasa, yaahola obubi muno; Omwaami mweene niye ochia ohumukaba omukabo kuchaana neende ebihole bi yahola.

¹⁵Wesi mweliinde, olwohuba ayiingania muno emboosi yeefwe.

¹⁶Abulao omuundu yeesi owahoonya lundataangira ohwewosaho. Boosi baanjiruha baandeha. Saba Nasaae ahaye ohubabaliraho esyonoono esyo!

¹⁷Nae Omwaami yaba naange, mani yamberesa amaani sakira ndanyala ohutuumbula emboosi choosi Abateende baawulira. Haandi yamonia yaandusa mu meeno k'edalang'i.

¹⁸Omwaami achia ohuhoonya mu bidinyu byoosi, mani yaamonie hu nyoole Obwaami bwo Muukulu. Oluyaali lube nae endaalo choosi. Amiina.

¹⁹ Heesa Purisiila neende Akwiila, neende edaala lya Onesiforo.

²⁰ Erasito yadoong'a Koriito. Nae Ndaleha Turofiimu Mileto olwohuba yali n'alwaala.

²¹Teemaho koti lu onyala ohwiicha endaalo ch'etoocho nichisiiri ohwoola. Yubbulu, Padeni, Lino neende Kilaudia babaheesa, haandi abafukiiriri boosi-boosi babaheesa.

²²Omwaami abe neende omwooyo kwao. Embabaasi cha Nasaae chibe naang'we mweesi.