Read saamia Filimooni 1 Bible Online

Filimooni 1 - saamia bible

Filimooni 1

¹Ese Paulo, owaboywa hulwa Kristo Yesu, neende Timoteo omwaana weefwe. Hwandiikira ewe Filimooni omuhalaabani waasyeefwe muheerwa

² neende Afia mboocho yeefwe, neende Arikipo omusikaari waasyeefwe, alala neende Abakristo abebuusiraanga mu nyuumba yao.

³Nasaae Seefwe, neende Omwaami weefwe Yesu Kristo ababerese embabaasi neende omuleembe.

⁴Wasyaange Filimooni, buli ludaalo niihwiichulisa mu saala chaange, ndeebasaanga Nasaae waange,

⁵olwohuba mbuliranga ebidiira hu buheeri bwao eyiri abaandu ba Nasaae boosi neende efukiirira yooli nayo mu Omwaami Yesu.

⁶Saba Nasaae endi ohuholera alala hwao neende Abakristo baandi, huhuhoonye ohwemeeda ohumanya ebilai byoosi bi hunyoola mu bulala neende Kristo.

⁷Mwaanaama w'omwooyo, obuheeri bwao bundeteere esangaalo liingi muno, haandi bunyomiisire muno omwooyo! Olwohuba wasaangaasa emyooyo ky'abaandu ba Nasaae boosi.

⁸Hulw'esifune sino, ohoyere ohuba omumaliirifu. Koti mwaanaamaao mu Kristo, hulagira sa ohole esiindu sy'ohoyere ohuhola.

⁹Nae olwohuba ndahuheera, mbweene endi husabe sa. Ese Paulo, wamwaanda wa Kristo Yesu, nae bulaanu oli omuboye wae

¹⁰ hwekweeda hulw'omwaana waange Onesimo, yi ndeehola laatang'ene mu Kristo ni ndi mu jeela.

¹¹(Hale haba siyaba neende obuhoonyi yooli, nae bulaanu, wobuhoonyi bw'amaani yooli neende yi ndi.)

¹²Bulaanu ndi ohumutuma akobole yooli, haandi yeecha neende omwooyo kwaange.

¹³Ndahadahire adoong'e naange ano, anyale ohuuhoonya mu bweyaango bwao, ni ndi mu jeela hulw'Emboosi Ndai.

¹⁴Nae haba siindahire ohuhola endyo ewe nootaafukiriire; ohutusaho ndahire ewe omweene ohole otyo ohutula muhudaha hwao omweene, ataali ohuyiikwa.

¹⁵Awuundi sino nisyo esyakera Onesimo yaahukabuhaho hulw'esiha sidiidi, hwaanyale ohuhukoboserwa elalira.

¹⁶Olwohuba haba saali ohukobola koti omuwaambe sa, nae ohirira eyale omuwaambe; ali mwaanaamaao w'omwooyo mu Kristo. Ali neende obuhoonyi buungi muno hw'ese! Haandi achia ohuba neende obuhoonyi buungi yooli ohuhirao koti bulaanu ali omuwaambe haandi mwaanaamaao mu Omwaami.

¹⁷Sakira nikali mbwe wuumbaasaho oti ndi omuhalaabani waasyo, mubukaanire koti lu wahaanjakaaniire.

¹⁸Naabaao esiindu syoosi si yahukosera, oba nikali mbwe omubaanjaho esiindu syoosi, sibalire hu ese.

¹⁹Ese Paulo, nyandiika ebiindu bino neende omuhono kwaange kweene. Ese Paulo njia ohuhutuunga. Kata andahaba niimanyire endi obulamu bwao bwosi buliwo hulwaange.

²⁰Sakira wasyaange, hulw'Omwaami, ngwiire sa esisa. Koti mwaanaama mu Kristo saangaaseho noojama!

²¹Ndi omumaliirifu endi ochia ohuhola bi husabire, haandi ochia ohuhola ebihiraho bi husabire.

²²Ohumeeda hweebyo, ndekehereho ow'ohweeyalisa, olwohuba suubira endi, Nasaae achia ohukobolamo ohusaba hweeng'we mweesi mani yaangaluse yi muli.

²³ Epafura omuboye waasyaange mu Kristo Yesu, ahuheesa.

²⁴ Haandi Mariko neende Arisitariko, neende Dema, alala neende Luka abahalaabani baasyaange, bosi bahuheesa.

²⁵Lehe embabaasi ch'Omwaami weefwe Yesu Kristo chibe naang'we.