Read saamia Abaibburania 1 Bible Online

Abaibburania 1 - saamia bible

Abaibburania 1

¹Hale, Nasaae yalomalomanga neende bakuuka yeefwe amahabi maangi haandi mu ngeri chikabuhaane n'abitira mu banabbi.

²Nae mu ndaalo chimaliirihayo chino, Nasaae alomaloome naafwe n'abitira mu Mwaana wae. Omwaana wae oyo niye yi Nasaae yadoola ohuba omusiha w'ebiindu byoosi, haandi Nasaae yabitira mu Mwaana wae oyo ohuloonga ebiindu byoosi.

³Omwaana oyo, niye obulafu bweekesa oluyaali lwa Nasaae, haandi niye efwaani ya Nasaae yeene, haandi niye oliinda ebiloonge byoosi neende emboosi yae y'amaani. N'amalire ohunyalira ebyonoono by'abaandu boosi ohuleherwamo, yeehala Muukulu hu muhono muluungi kwa Nasaae, Omweene bunyala bwoosi.

⁴Omwaana wa Nasaae yabeereswa oluyaali luhira olwa bamalaika, koti sa eliita li Nasaae yamuberesa lihira akaabwe oluyaali.

⁵ Olwohuba, abulao malaika yeesi yi Nasaae yabooleraho ati, “Niiwe Omwaana waange, enyaanga yino hwibuule” Oba haandi ati, “Njia ohuba Laatang'ene, haandi yesi abe Omwaana waange”

⁶ Nae ohumeeda hweebyo, Nasaae niyali aambi ohutuma Omwaana wae mwikulaanda mu syaalo, yaboola ati, “Lehe bamalaika ba Nasaae boosi bamwiinamire.”

⁷ Nae bino nibyo bi Nasaae yaboola ebidiira hu bamalaika ati, “Nasaae yahola bamalaika bae baaba emiyaka, haandi yaahola abahalaabani bae enjeserye ch'omuliro.”

⁸ Nae ebidiira hu Mwaana, Nasaae yaboola ati, “Obwaami bwao, Ewe Nasaae, bw'endaalo choosi, otuka abaandu neende obwadyeeri.

⁹Waheera obuluungifu nae wasyuula obuhyamu. Mani sakira Nasaae, Nasaae wao ahuloboole haandi yaahuba esangaalo ly'oluyaali luungi muno ohuhira lu yaberesa abaasyo.”

¹⁰ Nasaae haandi yaboola ati, “Ewe, Omwaami, muhuchaaka niiwe owaloonga esyaalo, haandi wahola ekulu neende amahono kao keene.

¹¹Ebiindu ebyo byoosi bichia ohusihirira, nae ewe ochia ohudoong'ao; byoosi bichia ohukofula koti engubo.

¹²Ochia ohubifuumba koti omukeeka, haandi bikaluuhanisibwe koti engubo. Nae ewe ochia ohudoong'a koti lu oli, haandi emyaaka chao haba sichicha hwaakama.”

¹³ Nae malaika siina yi Nasaae yabooleraho ati, “Yihala hu muhono kwaange muluungi ohwoola luundihola abasuku bao babe esiteeni sy'ohutaaho amakulu kao.”

¹⁴Bamalaika abo, haba sinibo emyooyo kihalaabanira Nasaae, chi Nasaae yatuma ohuhoonya abo abachia ohunyoola obuwonia?