Read saamia Abaibburania 3 Bible Online

Abaibburania 3 - saamia bible

Abaibburania 3

¹Bakristo basyaange, mwesi mwalaangwa neende Nasaae! Mubaaseho hu Yesu, yi Nasaae yatuma ohuba Omulaamisi Muhuluundu w'efukiirira yi hutuumbula.

² Yali omweesikwa eyiri Nasaae, owamudoola ohuhola omulimo kuno, koti lu Musa yesi yali omweesikwa mu mulimo kwae mu Nyuumba ya Nasaae.

³Koti omwombahi w'enyuumba anyoola oluyaali ohuhira enyuumba yeene, mu ngeri nasilala, Yesu ali neende oluyaali luungi muno ohuhira Musa.

⁴Buli nyuumba yoombahwa neende omuundu-nae Nasaae niye omwombahi wa buli siindu.

⁵Nae Musa yali omweesikwa mu Nyuumba ya Nasaae yoosi koti omuhalaabani, mani yalomaloma hu biindu bi Nasaae yali achia ohuhola mu ndaalo chiloondaho.

⁶Nae Kristo mweesikwa koti Omwaana wa Nasaae oliinda Enyuumba ya Nasaae. Huli enyuumba yae nihudoong'a buli ludaalo nihuli abagumu, haandi nihuli abomiifu mu siindu si husuubiramo.

⁷ Mani sakira, koti lu Mwooyo Mwoolerefu aboola ati, “Olwaleero, nimuwulira ekono lya Nasaae,

⁸mutoomia emyooyo kyeeng'we koti lu bakuuka yeeng'we bahola, bajeemera Nasaae, koti lu bali hu ludaalo olwo mu siparara, koti lu bamuteema.

⁹Eyo niyo yi bakuuka yeeng'we yi bateemera, kata nibaba nibamalire ohubona ebiindu bi ndahola mu mbaka y'emyaaka amahumi kane.

¹⁰Mani sakira ndeecha ndanyoolera nabo mani ndaboola endi, ‘Buli siha bahyaamu mu myooyo kyaabwe haandi bahaya ohuwulira amalako kaange’.

¹¹Sakira etima lyandiira mani ndeechuba nimboola endi: ‘Haba sibacha ohwiingira mu buwuluuhiro bwaange.’ ”

¹²Mani basyaange mweliinde awuleo omuundu yeesi mweeng'we oba neende omwooyo mubi okutafukiirira, ahaye ohutula hu Nasaae mulamu.

¹³Ohutusaho, muhoyere ohugumya abasyeeng'we emyooyo buli ludaalo, olwohubera emboosi “Olwaleero” mu byandiiko byoolerefu yitudiiraho, hu abuleo omuundu yeesi hweeng'we onyala ohubachiriswa neende esyonoono, mani yooma omutwe.

¹⁴Olwohuba fweesi hukabanira alala neende Kristo nihwomiisa obweesikwa bweefwe buhwachaaka nabo hwoola hu njakamo.

¹⁵ Sino nisyo si byandiiko byoolerefu biboola biti, “Olwaleero, nimuwulira ekono lya Nasaae, mutoomia emyooyo kyeeng'we koti lu bakuuka yeeng'we bahola, koti lu bajeemera Nasaae.”

¹⁶ Nae baandu siina abawulira ekono lya Nasaae mani baamala bamujeemera? Abo nibo abaandu boosi ba Musa yeemerera n'abatusa mu Misiri.

¹⁷Nae baandu siina ba Nasaae yanyoolerera hulw'embaka y'emyaaka amahumi kane? Nibo abaandu bahola ebyonoono, mani baakwa baamala bafwiira mu siparara.

¹⁸Nae Nasaae niyeechuba n'aboola ati, “Haba sibahengire mu buwuluuhiro bwaange,” yali alomaloma hu baandu siina beene? Yali alomaloma hu abo abali nibamujeemera.

¹⁹Bulaanu hubona huti, haba sibanyala ohwiingira mu buwuluuhiro bwae, olwohuba haba sibali neende efukiirira.