Read saamia Abaibburania 6 Bible Online

Abaibburania 6 - saamia bible

Abaibburania 6

¹Lehe hwemeede neende enjekesa nyaangafu, hulehane neende enjekesa yataangira yidiira hu Kristo. Haba sihuhoyere ohuchaaka ohwombaha omusiingi kuundi, okw'ohukaluuhana ohutula hu mirimo chibulamo obuhoonyi, neende ohufukiirira mu Nasaae.

²Omusiingi kuundi okw'ohweekesa ebidiira hu embatiisa[1] kikabuhaane, neende ohwiisaho amahono, ebidiira hu husyuuha hw'abafu neende ohuheengerwa omusaango hutaakama.

³Lehe huchie mu moni! Mani sino nisyo sihucha ohuhola, Nasaae naakanya.

⁴Olwohuba binyaliha bitye, abaandu baba nibalehana neende efukiirira, ohukoboswa enyuma baanyala ohweyolobya? Olwohuba hale bali nibali mu bulafu bwa Nasaae; bahoombaho hu siyaanwa syo Muukulu, haandi banyoola omukabo kwaabwe okwa Mwooyo Mwoolerefu.

⁵Bali nibamanya bati emboosi ya Nasaae ndai niyo, haandi bamala ohumanya amaani k'endaalo chiicha.

⁶Mani beecha baalehana neende efukiirira yaabwe! Haba sisinyaliha ohubakobosa enyuma baanyala ohweyolobya ehabi liindi, olwohuba baba bali ohubaamba Omwaana wa Nasaae ehabi liindi, haandi ohumuyemula mu moni w'abaandu baangi.

⁷Nasaae aberesa ehabi eloba ling'wa amaachi k'efula yilikwaaho buli siha, haandi elibaaho ebimera biri neende obuhoonyi eyiri abaandu baliba nilyalimirwa.

⁸ Nae niliba nilimeraho sa amawa neende esiino, liba libula obuhoonyi; liba liri mu masira ka Nasaae ohubwaaba, mani lyasihiriswa neende omuliro.

⁹Nae basyaange, kata nihuba nihulomaloma huti, haba sihubeekanakanamo. Humanyire huti, mwanyoola ehabi chihiramo obulai, ech'obuwonia bweeng'we.

¹⁰Nasaae haba siyehubbira. Haba saacha hwiibirira omulimo kumwahola, oba obuheeri bu mwamala ohweekesa mu buhoonyi bumwatusa nimuhoonya abaandu bae, haandi bu musyemeeda ohuhoonya Abakristo basyeeng'we.

¹¹Ohudaha hweefwe huhiramo huli huti, buli mulala hweeng'we ahoya yaliinda amaofu k'ohuhola esiindu silai kae ohwoolera elalira hu njakamo, hu biindu bi muli ohusuubira binyale byoolerere abweene.

¹²Haba sihudaha eng'we mweehole abakata, nae mube koti abaandu bafukiirira haandi abomiifu mu myooyo, hu munyale ohunyoola esiindu si Nasaae yasuubisa.

¹³Nasaae niyahola esisuubise neende Abburahamu, yeeyama ohwooseresaanga esyo si yaba n'alakaanire. Mani koti lu yawumayo oyo yeesi owali n'amuhira oluyaali, yehoonyera eliita lyae omweene niyali n'ahola esyeyamo syae sino.

¹⁴ Yasuubisa n'aboola ati, “Njia ohuhuberesa ehabi, haandi hubeerese abeechuhulu baangi muno.”

¹⁵Abburahamu yali omwesimiirifu, mani sakira yanyala ohunyoola esiindu si Nasaae yali yamusuubisa.

¹⁶Abaandu nibahola obweyamo, bachwichwisiraanga eliita ly'omuundu obahiraho oluyaali, mani obweyamo obwobunyala ohumalao amayiingani koosi.

¹⁷Bulaanu Nasaae yadaha ohweekesa abo abachia ohunyoola si yasuubisa, esilai sihirao ati haba saacha hukaluuhania esichiiririrwa syae; mani sakira yameeda obweyamo bwae obwo huhulakana ohwo.

¹⁸Mani aliwo ebiindu bino bibiri, ebitanyala ohukaluuhana, haandi bi Nasaae atahanyala hubachaho. Mani sakira efwe abamala ohunyoola obwiiruhiro yaali, hugumisibwa muno ohwomiirira n'amaani hu sisuubise siri mu moni.

¹⁹ Esuubi lino nilyo eliri koti enaanga y'obulamu bweefwe. Haba siyikanwa-kanwa, haandi nyomiifu, haandi yicha niyibita mu pasya yihiinga yomu nyuumba ya Nasaae, yengirira elalira mu sabo ly'omuukati bweene.

²⁰ Yesu yatutaangirira ohutuchiira mukati bweene omwo, mani yaamala yeehola omulaamisi muhuluundu w'endaalo choosi, koti Melikisedeki.