Read saamia Yakobbo 1 Bible Online

Yakobbo 1 - saamia bible

Yakobbo 1

¹ Ese Yakobbo, omuhalaabani wa Nasaae neende ow'Omwaami Yesu Kristo: Mbaheesa eng'we enono ehumi-na-chibiri ech'abaandu basalaanira mu syaalo syoosi.

²Basyaange, ebidinyu bya buli ngeri nibibakwaaho, mweeyireenge muti muli ab'ehabi.

³Olwohuba mumanyire muti efukiirira yeeng'we niyiteemebwa mani mwaahaya ohukwa, ao munyoola amaani k'ohwesimiirisa.

⁴Muboneenge muti muli neende ohwesimiirisa mu bulamu bweeng'we bwoosi, hu munyale ohweehola abaandu baluungifu haandi abeechufu, nimutaaliho esiindu syoosi si mwekoomba.

⁵Nae n'aliwo omuundu yeesi mweeng'we otaali neende amakesi, leha asabe Nasaae, ochia ohumuberesa amakesi; olwohuba Nasaae niye oberesaanga abaandu boosi ebiindu mu buungi.

⁶Nae oyo oba n'asaba, lehe asabe neende efukiirira, n'atakanaakana. Omuundu yeesi okanaakana ali koti efwiinda yomu nyaanja, yi muyaka kuhubba kwaayira eno neende era.

⁷Omuundu ofwaana atyo, otanyala ohuheengao esy'ohuhola,

⁸haba saacha ohunyoola esiindu syoosi ohutula eyiri Omwaami.

⁹Abakristo bamanani bahoyere ohwehoyanga Nasaae n'abaniinia aakulu,

¹⁰ haandi Abakristo bayiinda, bahoyere ohwehoyanga Nasaae n'abeesa aasi. Olwohuba abayiinda bachia ohumalwao koti esimuli syomu siino.

¹¹Olwohuba elyuuba nilitula neende obumemu bwalyo busimamula syooma; ebimuli byaahwo bikwa, mani obulai bwasyo bwaawa. Mu ngeri nasilala eyo nilwo lu bayiinda bachia ohusihiriswa nibasisiiri mu bunyahani bwaabwe.

¹²Ali neende ehabi omuundu womiirira mu fukiirira ebiteemo nibimwoolaho, olwohuba naaba n'amalire ohuyiingira amateemo, achia ohunyoola ekofia y'obutuki y'obulamu yi Nasaae yamala ohusuubisa abamuheera.

¹³Omuundu n'anyoola ebiteemo bifwaana bityo, ataboolaanga ati, “Amateemo kano katula eyiri Nasaae,” olwohuba Nasaae haba saanyala ohuteemwa neende esibi syoosi, haandi Nasaae mweene sateemaangaho omuundu yeesi.

¹⁴Nae omuundu yeesi anyoola ohuteemwa ebibaaso byae biba nibihweesa omwooyo kwae nibikuyira mu sibi.

¹⁵Mani obwekoombi bubi obwo buhula, mani bweebula esibi. Haandi esyonoono nisihulire siibula ohufwa.

¹⁶Basyaange baheerwa, mutabachwaanga!

¹⁷Buli siyaanwa silai haandi esiichufu, situla Muukulu; situla eyiri Nasaae Seefwe, owaloonga obulafu bwomu kulu, otakaluuhana-kaluuhana oba yaleeta esiirima n'akaluuhana.

¹⁸Ohweema hu hudaha hwae omweene, yatwiibula haandi n'abitira mu mboosi yadyeeri, hu hunyale ohuba ebyaamo bitaangira mu biloonge byae byoosi.

¹⁹Basyaange, mudiire emboosi chino bulai! Buli muundu ahoyere ohuba omwaangu mu huwulira, nae otaanguya ohulomaloma haandi otanyoolera bwaangu.

²⁰Olwohuba etima ly'omuundu sirimuhoonya ohwooseresa obuluungifu bu Nasaae adaha.

²¹Sakira, mwetuseho buli saambo mbi yoosi, neende ebiholwa bibi. Mweyaaneyo eyiri Nasaae haandi mufukiirire emboosi yi yataaka mu myooyo kyeeng'we, eyinyala ohubawonia.

²²Mutebachanga abeene nimutekeeresa emboosi; nae muyitechenge mu huhola.

²³Olwohuba omuundu owulira emboosi, mani yaahaya ohuyita mu huhola, afwaana koti omuundu weebona mu monero mani yaamanya koti lu afwaana.

²⁴Nae n'amalire ohweebona koti lu afwaana, atulao yawaao, mani bwaangu-bwaangu niyeebirira koti lu afwaana.

²⁵Nae niwehaliirisa bulai mu malako kawonia abaandu, mani wemeeda ohukabaasaho, ataali ohutekeeresaanga hwoong'ene mani waakebiirira, nae waakata mu hola, Nasaae achia ohuhuberesa ehabi mu by'ohola.

²⁶Omuundu yeesi n'abaasa ati w'efukiirira, nae saanyala ohutuka olulimi lwae, efukiirira yae yiba yibulamo obuhoonyi, haandi omweene aba yebachirisa.

²⁷Efukiirira yi Nasaae Seefwe ayira koti eyadyeeri eyiwumamo ohwebachirisa, niyo yino: ohuliindaanga abaana bafwiire, neende abahasi bafwiirwe mu bidinyu byaabwe, neende ohweliindanga esyaalo sitahunyaasa.