Read saamia Yakobbo 2 Bible Online

Yakobbo 2 - saamia bible

Yakobbo 2

¹Basyaange baheerwa, mu bulamu bweeng'we koti abafukiiririra mu Omwaami weefwe Yesu Kristo, Omwaami w'oluyaali, haba simuhoyere ohwesuunga mu baandu nimweema hu huboneha hwohumukulu hweeng'we.

²Niwiichuhana omuundu muyiinda wefwaalire engila y'esaabbu neende engubo nyirifu yeechia yi mwebusiire, mani omuundu wuundi omumanani wefwaalire ebicheere yesi yeecha,

³mani mwaberesa omuundu muyiinda oluyaali, nimumuboolera muti, “Yihala hu sisaala silai muno sino,” nae mwaboolera omumanani muti, “Yema ala, oba muti, yihala aasi hu loba mu makulu kaange ano,”

⁴ao muba muteereo ohwesuunga akatikaati weeng'we mani mweehola koti abaheengi b'emisaango bali neende embaasa mbi.

⁵Basyaange mutekeerese! Mubaasa muti Nasaae haba siyadoola abamanani bohu syaalo ohuba abayiinda mu fukiirira haandi ohunyoola Obwaami bu yasuubisa abaandu bamuheera?

⁶Nae eng'we mulekeresa abamanani. Abaandu bayiinda haba sinibo ababafwiinyiriranga nibabahwehweesa nibabayira mu biina?

⁷Haba sinibo abalomalomaanga bubi hu liita ly'oluyaali li mwanyoola?

⁸ Nimwooseresa bulai amalako k'obutuki akali mu byandiikwa byoolerefu kaboola kati, “Heraanga owaasyo koti lu weeheera omweene,” ao muba muhola esiindu silai.

⁹Nae nimukabuhaniamo abaandu ohweema hu huboneha hwaabwe hwohumukulu, ao muba muhola esyonoono, haandi ao babayira koti abahalaki b'Amalako ohweema hu Lako liruwo.

¹⁰Olwohuba omuundu yeesi ohalaka kata elako lala, aba koti ohalaake amalako koosi.

¹¹ Olwohuba omuundu waboola ati, “Otayiranaanga,” niye yesi owaboola ati, “Otetaanga.” Kata n'otayiranaanga, nae weeta omuundu, ao oba omalire ohweehola omuhalaki w'amalako.

¹²Mani lomalome haandi holeenge ebiindu koti abaandu bachia ohuheengerwa omusaango ohweema hu lako lileeta omuleembe.

¹³Olwohuba Nasaae haba saachia hukwiira esisa omuundu otakwiira owaasye esisa n'amuheengera omusaango.

¹⁴Basyaange, silai siina si muundu ali nasyo n'aboola ati, “Ndi neende efukiirira”, nae ebiholwa byae haba sibyekesaho bityo? Efukiirira yae eyo yoong'ene yinyala ohumuwonia?

¹⁵Koti esyohuboneraho, niwiichuhira yabaao owasyeeng'we musaacha oba omuhasi, otaaliho neende esy'ohwefwaala oba ebyohulya bimala,

¹⁶bimuhoonya siina mulala hweeng'we n'amuboolera ati, “Nasaae ahuberese ehabi! Ba bilai, haandi olye bilai,” n'atamubereese syaaba n'adaha mu bulamu bwae?

¹⁷Nilwo lu siri neende efukiirira: niyiba yoong'ene ataali ebiholwa biyisiira, efukiirira eyo yiba efu.

¹⁸Nae owuundi hweeng'we niyeecha yaboola ati, “Ewe oli neende efukiirira, nae ese ndi neende ebiholwa.” Mba ndakobolamo endi, “Njekeseho koti lu onyala ohuba neende efukiirira ataali ebiholwa. Nae ese njia ohuhweekesa efukiirira yaange ohweema hu biholwa byaange.”

¹⁹Mufukiirira muti Nasaae aliwo mulala yeeng'ene? Esyo silai! Kata emisaambwa kyosi kifukiirira kityo, haandi chitengereha neende obuti.

²⁰Omusiru ewe! Odaha bahweekese bati efukiirira yibulamo ebiholwa yibula obuhoonyi?

²¹ Abburahamu kuuka yeefwe yeehola omuluungifu mu moni wa Nasaae atye? Byali ohweema hu biholwa byae, koti lu yayaanira Nasaae Yisaka omwaana wae hu alutaari.

²²Ao onyala ohubona oti, efukiirira yae neende ebiholwa byae biholera alala; haandi efukiirira yae yomiiswa neende ebiholwa byae.

²³ Haandi ebyandiiko byoolerefu byoolerera abweene ebiboola biti, “Abburahamu yafukiirira mu Nasaae haandi ohweema hu fukiirira yae, Nasaae yamubala ohuba omuundu muluungifu.” Haandi Nasaae yalanga Abburahamu ati omwiicha wae.

²⁴Sakira omuundu aholwa ohuba omuluungifu neende Nasaae ohweema hu biindu bi ahola ataali ohweema hu fukiirira yoong'ene.

²⁵ Nilwo lu byali neende Rahabbu omuhasi mucheke wekusa. Nasaae yamuhola ohuba omuluungifu nae ohweema hu biholwa byae, koti lu yaakaanira Abaisiraeli bahemeresi mani yaabahoonya ohwiiruha nibabitira hu ngira yiindi.

²⁶Mani koti lu mubiri kubulamo omwooyo kuli omufu, nilwo lwosi lu fukiirira yibulamo ebiholwa yosi yiri efu.