Read saamia Yakobbo 5 Bible Online

Yakobbo 5 - saamia bible

Yakobbo 5

¹Mani bulaanu eng'we mutekeerese! Mwelalihirire haandi mulire hulw'ebidinyu bicha ohuboolaho.

² Obuyiinda bweeng'we bwamala ohubola haandi embuungi chamala ohulya ebyefwaalo byeeng'we.

³Esaabbu yeeng'we alala neende efeesa byamala ohuubba emberebeende, haandi emberebeende chino chichia ohuba esyohuboneraho syeekesa ebibi byeeng'we; mani chichia ohulya emibiri kyeeng'we koti lu muliro kuhola. Mwehung'anisiiryeho obuyiinda mu ndaalo chimaliirihayo chino.

⁴ Mutekeerese, omusaara kumwahaya ohutuunga abahalaabani babahalaabanira mu ndalo cheeng'we, nguno kulira; haandi amaliro k'abaandu babakesera koolere mu matwi k'Omwaami w'Obunyala bwoosi.

⁵Obulamu bweeng'we hu syaalo bwali obwohwehoya neende ohwesangaasa abeene. Muhomeere ohwiitwa hu ludaalo lw'ohusiinjwa.

⁶Mwaheengera abaandu bataaliho esibi emisaango mani mwabeeta, kata bahaba nibatabayiinganianga.

⁷Sakira basyaange, mwesimiiriseenge ohwoola lu Omwaami yahakobolere. Bone koti lu balimi beesimiirisaanga nibaliindirira endalo chaabwe ohubaamira ebyaamo by'obuhoonyi. Beesimiirisaanga ohwoola lu bahanyoolere efula yitaangira neende eyimaliiriha.

⁸Mwesi mani mwesimiiriseenge. Mubechenge abomiifu olwohuba oludaalo lw'ohukobola hw'Omwaami luli aambi.

⁹Basyaange, mutekanyiirisaanga abasyeeng'we, mani Nasaae haba saachia hubaheengera omusaango. Omuheengi w'emisaango nguyo ali aambi yetekeehe ohwiingira.

¹⁰Basyaange yichulisenge abanabbi balomaloma mu liita ly'Omwaami. Mubabukuleenge ohuba koti esyohuboneraho esy'abaandu beesimiirisa mu biha by'ohusaanda.

¹¹ Hubalaanga huti b'ehabi olwohuba beesimiirisa. Mwawulira koti lu Yobbu yesimiirisa, haandi mumanyire esiindu si Omwaami yamuberesa muhumaliiriha. Olwohuba Omwaami yeechula esisa neende ohusaasira.

¹² Basyaange, esihirira elalira, mutechubaanga nimuhola esisuubise. Mutechubiraanga Ekulu oba esyaalo, oba esiindu siindi syoosi. Boolenge sa muti “Eee” nimudaha ohufukiirira, oba muti “Haba” nimudaha ohukaana, hu muhaye ohubaaho omusaango mu moni wa Nasaae.

¹³Aluwo omuundu yeesi hweeng'we oli mu sidinyu? Leha asabe Nasaae. Awuundi hweeng'we, aluwo oli mu sangaalo? Leha yeembe enyembo chifumia Nasaae.

¹⁴ Aluwo omuundu hweeng'we olwaala? Ahoyere ohulaanga abeemeresi b'abafukiiriri, bamusabireenge mani bamubaheenge amafuta mu liita ly'Omwaami.

¹⁵Mani ohusaba ohwo ohwichuule efukiirira huchia ohuwoniaanga omulwaae; Omwaami achia ohumukoboseraanga obulamu, haandi ebyonoono byaaba niyahola bichia ohumuleherwaangamo.

¹⁶Sakira, tumbuleenge ebyonoono byeeng'we eyiri abasyeeng'we, haandi musabireenge abasyeeng'we, hu munyale ohuwonisibwa. Esaala y'omuundu muluungifu yiri neende amaani maangi haandi yihola muno.

¹⁷ Elija yali omuundu koti efwe. Yasaba niyomiisa ati efula yihaye ohukwa, mani efula yaahaya ohudoonya hu loba ohumala embaka y'emyaaka kidatu neende esituundu.

¹⁸ Haandi yasaba, mani ekulu lyakaluuhana efula, eloba lyaama ebyaamo byaalyo.

¹⁹Basyaange, omuundu yeesi hweeng'we n'atula hu bwadyeeri, mani omuundu wuundi yamukobosa haandi,

²⁰ mwiichulise bino: omuundu yeesi okobosa omuundu mubi ohutula mu ngira chae ehyaamu, achia ohuwonia omwooyo kw'omuundu mubi oyo ohutula mu hufwa mani yaleeta ohuleherwamo ebyonoono biingi.