Read saamia 1 Petero 4 Bible Online

1 Petero 4 - saamia bible

1 Petero 4

¹Koti lu Kristo yasaanda mu mubiri, fwesi huhoyere ohweyaanayo neende obwomiifu neende engeri y'embaasa yi yali nayo, olwohuba omuundu osaanda mu mubiri, oyo aba yamala ohukabuhanira elalira neende esyonoono.

²Mani sakira, ohutula bulaanu neende ohwemeeda mu moni, ohudaha hwa Nasaae nihwo ohutuka obulamu bwae bwomu syaalo muno bwoosi, ataali hu bwekoombi bw'omubiri.

³Mwamala ohwehoonyera ebiha biingi nimuhola bi bakafiiri baheera ohuholaanga. Obulamu bweeng'we bwali bwaweera mubucheke, ohwekoomba hubi, obumeesi, obwekoombi bw'okuliira, obumeesi bw'omubidyaalo, neende ohwiinamira emisaambwa hubi.

⁴Abakafiiri abo bawuka muno nimuteyambaania nabo mu huhola obwekoombi bubi buhiramo obwo, sakira babanyeka.

⁵Nae bachia ohwelomalomaho eyiri omuundu wetekeehe ohuheengera omusaango abaandu balamu neende abafwa.

⁶Sino nisyo esyakera bayaalira Emboosi Ndai eyiri abaandu bamala ohufwa bosi, kata neende nibahaheengerwa omusaango mu mubiri koti abaandu boosi, nae balamu mu mwooyo koti Nasaae.

⁷Enjakamo y'ebiindu byoosi yisudire aambi. Sakira mube mwaaywe, abeetuka abeene, mani munyale ohusaba.

⁸ Nae esihira byoosi, muheeraneenge neende obuheeri bwadyeeri, olwohuba obuheeri bubwiiha hu bibi biingi.

⁹Yakaanire abasyeeng'we mu madaala keeng'we ataali ohwekanyiirisa.

¹⁰Buli muundu hweefwe koti omuliindi mulai w'ebiyaanwa bya Nasaae ahoyere ohwehoonyera ebiyaanwa byoosi bi Nasaae yamuberesa n'ahoonya abaasye, niyehoonyera ebiyaanwa bikabuhaane neende obwadyeeri.

¹¹Omuundu yeesi oweekesa Emboosi ya Nasaae, ahoyere ohuyeekesa koti Emboosi ya Nasaae yeene; omuundu yeesi ohola emirimo ahole neende amaani ka Nasaae yamuberesa, mani hu mu buli siindu syoosi Nasaae anyoole efuma ohubitira mu Yesu Kristo, yi luyaali neende amaani bibe ebyae endaalo choosi. Amiina.

¹²Basyaange baheerwa, mutesinduhaanga hulw'ohuteemwa mubuchuuni bu musaandisirwamo, koti esiindu sikeni esiri ohubeeholehaho.

¹³Ohutusaho sangaale muti muli ohukabanaho neende Kristo mu husaanda hwae, hu munyale ohwichula esangaalo mu myooyo kyeeng'we luunyuma lw'oluyaali lwae ohweyekesa.

¹⁴Nimuli neende ehabi nibabanyeka hulw'ohwehoonyera eliita lya Kristo; amahuluundu kali mbwe Omwooyo kuli neende oluyaali, Omwooyo kwa Nasaae kuli mweeng'we.

¹⁵Nae abuleo omuundu yeesi mweeng'we osaanda koti omwiiti, oba omwiibi, oba omuundu ohola esibi sihoongo, oba yeyingiise mu mirimo ky'abaandi.

¹⁶Nae omuundu yeesi hweeng'we n'asaanda olwohuba ali Omukristo, atadiirwa esoni, nae yeebase Nasaae ati ali Omukristo.

¹⁷Olwohuba endaalo choolere ech'ohuheengeramo omusaango, nae haandi chichia ohuchaaka neende abaandu ba Nasaae beene. Nae nibichaakira hweefwe, byahabe bitye eyiri abo abatafukiirira Emboosi Ndai yitula eyiri Nasaae?

¹⁸ Olwohuba ebyandiiko byoolerefu biboola biti, “Nisiri esidinyu eyiri abaluungifu ohunyoola obuwonia bulaanu syahabe sitye eyiri abo abatatya Nasaae neende abahola-mbi?”

¹⁹Sakira abasaanda olwohuba Nasaae niye obadahisa basaande, bahoyere ohwemeeda ohweyaanayo eyiri Omuloongi waabwe omweesikwa, neende ohwemeeda ohuhola ebiindu bilai.