Read saamia 2 Petero 1 Bible Online

2 Petero 1 - saamia bible

2 Petero 1

¹Ese Simooni Petero omuhalaabani haandi omutume wa Yesu Kristo, mbaandiikira eng'we abanyoola efukiirira y'engaanga muno koti lu efwe hwanyoola mu bwoolerefu bwa Nasaae weefwe, neende Omuwonia weefwe Yesu Kristo.

²Lehe embabaasi neende omuleembe bibe ebyeeng'we mu bwiichufu ohubitira mu humanya Nasaae neende Omwaami weefwe Yesu Kristo.

³Obunyala bwa Nasaae nibwo obwatuberesa buli siindu syoosi si hwekoomba esiri mu bulamu bw'ohwiisa oluyaali mu Nasaae. Olwohuba humanyire oyo owatulaanga ohukabana hu luyaali neende mu bulai bwae.

⁴Mu ngeri yino, yatuberesa ebiyaanwa bihoongo haandi eby'engaanga y'aakulu muno bi yatusuubisa. Mani nihuba nihunyoolere ebiyaanwa bino, huchia ohuwonisibwa ohusihirira huli mu syaalo, ohuleetwa neende ohwekoomba hubi, hu munyale ohukabana hu bwanasaae bwae.

⁵Sakira mute omwooyo hu fukiirira yeeng'we; mumeedeho ebiima bilai, hu biima bilai byeeng'we, mumeedeho ohumanya;

⁶hu humanya mumeedeho ohweetuka abeene; hu hweetuka abeene mumeedeho ohwesimiirisa; hu hweesimiirisa, mumeedeho ohwiisa oluyaali mu Nasaae;

⁷hu hwiisa oluyaali mu Nasaae, mumeedeho ohuheerana koti abebulanwa; haandi hu hudahana koti abebulanwa, mumeedeho ohuheera abaandu boosi.

⁸Ebyo byoosi nimuba nabyo mani byemeede obuungi, byahabahole ohuba ab'obuhoonyi, haandi abahola ebiholwa bilai mu humanya Omwaami weefwe Yesu Kristo.

⁹Nae omuundu obula nabyo, ali koti obona amabuulyeesi, haandi yeebirira ati yamala ohulabiswa ohutula mu byonoono byae bya hale.

¹⁰Sakira basyaange, teemeho koti lu munyala ohwomiirirwa hu hulaangwa neende ohudoolwa hweeng'we. Nimuhola mutyo, haba simuchia ohukwa kata nabudiidi daawe.

¹¹Ao mani muchia ohwiingiswa neende oluyaali mu Bwaami butaakama obw'Omwaami haandi Omuwonia weefwe Yesu Kristo.

¹²Sakira njia ohubeechulisaanga ebiindu bino buli ludaalo, kata amwahaba nimwabimanya, haandi nimwomiirire hu bwadyeeri bu mwanyoola.

¹³Haandi mbaasa endi nisisiiri omulamu, silai ohubahubbirisa nimbeechulisa,

¹⁴olwohuba manyire endi ndi aambi ohutula mu mubiri kuno, koti lu Omwaami weefwe Yesu Kristo yamala ohunjekesa.

¹⁵Njia ohuteemaho koti lu nyala ohubona endi kata nimalire ohutula mu syaalo muno, muchia ohudoong'a nimwiichulisa ebiindu bino.

¹⁶Efwe ababeekesa obunyala bw'Omwaami Yesu Kristo neende ohwiichia hwae, haba sihweema hu ngano chi hwataao sa, nae oluyaali lwae hwalubonera elalira neende emoni cheefwe.

¹⁷ Hwaliwo koti lu Nasaae Seefwe n'amuberesa oluyaali neende ohukinisibwa muno, ekono nilyatula eyiri Nasaae Seefwe niliboola liti, “Wuno niye Omwaana waange muheerwa, yindehoyeramo.”

¹⁸Efwe abeene hwawulira ekono lino nililomaloma ohutula Muukulu nihuli neende Yesu hu lugulu lwoolerefu.

¹⁹Sakira huli neende obwomiifu bw'emboosi chi banabbi bayaala. Muhoyere ohuchitaaho ebibaaso byeeng'we, olwohuba chiri koti obulafu buhosa mu siirima ohwoola hu bwiire buhya, mani obulafu bw'esulwe buhosa mu myooyo kyeeng'we.

²⁰Nae ohuhira bino byoosi, manye muti abulao omuundu yeesi onyala ohunyonyola omweene hu bwae emboosi ch'obunabbi buli mu byandiiko byoolerefu.

²¹Olwohuba abulao omunabbi owali aholere omulimo kw'obunabbi niyedahiire omwene, nae abanabbi balomalomaanga ebitula eyiri Nasaae, Mwooyo Mwoolerefu n'abeeheremo.