Read saamia 2 Petero 3 Bible Online

2 Petero 3 - saamia bible

2 Petero 3

¹Basyaange baheerwa, yino bulaanu niyo ebbarwa yaange yohubiri yi mbaandiikira. Mu bbarwa choombi chino, ndeemereho ohubadinya mube neende embaasa yitaalimo ohweebachirisa nimbeechulisa ebiindu bino.

²Ndaha mwiichulise emboosi chi banabbi boolerefu balomalomaho hale, neende elako litula eyiri Omwaami haandi Omuwonia bi batume beeng'we bababeresa.

³ Esitaangira, muhoyere mumanye muti, mu ndaalo chimaliirihayo chino, abaandu bachia ohubaao, ba obulamu bwaabwe butukwa neende ohwekoomba hwaabwe hubi. Abaandu abo bachia ohubacheha

⁴haandi bachia ohubateeba bati, “Haba siyabasuubisa ati achia ohwiicha? Nae bulaanu ali yeena? Bakuuka yeefwe boosi bamala ohufwa hale, nae buli siindu sisisiiri sa koti lu syali ohutula hu huloongwa hw'esyaalo!”

⁵ Baheengao sa ohuhola koti abataamanyire bati, hale Nasaae yalomaloma, mani ekulu neende esyaalo byaloongwa. Esyaalo syaaloongwa ohutula mu maachi mani nisiba akati w'amaachi.

⁶ Nae haandi amaachi k'ofwomboole niko akasihirisa esyaalo sihale.

⁷Emboosi ya Nasaae yeene eyo, niyo eyikera ekulu neende esyaalo byabaao bulaanu, mani niyibiliinda ohwoola lu byahasihiriswe neende omuliro. Byaliindwa ohwoola hu ludaalo lu baandu bateesa oluyaali mu Nasaae bahaheengerweho omusaango, mani basihiriswe.

⁸ Nae basyaange mutebiiriraanga esiindu silala sino! Eyiri Nasaae yibulayo engabuhana akatikaati w'oludaalo lulala neende emyaaka elifu ndala; eyiri Nasaae ebiindu bino byaakana.

⁹Omwaami sahindaanga ohuhola esiindu si yamala ohusuubisa koti abaandu baandi babaasa. Ohutusaho abeesimiirisira, olwohuba haba saadaha omuundu yeesi asihiriiswe, nae adaha buli muundu anyale ohweyolobya ebyonoono byae.

¹⁰ Nae Oludaalo lw'Omwaami luchia ohwiicha koti omwiibi. Hu Ludaalo olwo, ekulu lichia ohukotao neende ohududuma huungi; ebiindu biri aakulu muukulu bicha ohuya bisihiriswe, haandi esyaalo neende ebiindu birimo byoosi bicha ohusihiriswa.

¹¹Mani koti lu biindu bino byoosi bicha ohusihiriswa mu ngira yino, muhoyeere ohuba abaandu bafwaana batye? Obulamu bweeng'we buhoyere ohuba obwoolerefu haandi obutya Nasaae,

¹²nimusiliindiriire Oludaalo lwa Nasaae, haandi muteemeho ohuhola lwiiche bwaangu. Oludaalo olwo, ekulu lichia ohusaambwa mani lisihiriswe, haandi ebiindu biri muukulu byoosi bicha ohusaanguluha hulw'obubafu.

¹³Nae huliinda esiindu si Nasaae yasuubisa. Yasuubisa Ekulu yaaha, neende esyaalo siyaaha, yi buluungifu bucha ohumenya koti obuli mu daala lyabwo.

¹⁴Sakira basyaange, nimusiliindire Oludaalo olwo, teemeho koti lu munyala ohuba abaluungifu bataaliho esyonoono syoosi mu moni wa Nasaae, nae abali mu muleembe nae.

¹⁵Mumanye muti ohwesimiirisa hw'Omwaami weefwe hweekesa huti bababeresa obweyaango bwohuwonisibwa, koti lu wasyeefwe Paulo yaheera ohubaandiikira niyehoonyera amakesi ka Nasaae yamuberesa.

¹⁶Sino nisyo sy'aboola mu bbarwa chae choosi n'alomaloma hu siindu esyo. Biriwo ebiindu biindi mu bbarwa chae ebidinyu byohumanya, bi baandu bataamanyire haandi abataali abomiifu mu fukiirira beekesa bubi, koti lu bahola mu bituundu biindi by'ebyandiiko byoolerefu. Mu ngeri eyo abeene beleetera ohusihirira.

¹⁷Nae eng'we, basyaange, mwamala ohumanya sino. Bulaanu mweliinde mutakoswa neende enjekesa ch'obubacha ech'abaandu bahola-mbi mani mwaakwa ohutula mu bwiihalo bweeng'we bulai.

¹⁸Nae mwemeeda ohuhula nimuli neende embabaasi, neende ohumanya Omwaami haandi Omuwonia weefwe Yesu Kristo. Oluyaali lube olwae bulaanu neende endaalo choosi. Amiina.