Read saamia 1 Yowaana 4 Bible Online

1 Yowaana 4 - saamia bible

1 Yowaana 4

¹Basyaange baheerwa, mutafukiirisanianga neende buli muundu oboola ati ali neende Mwooyo wa Nasaae; mubateemeho hu mumanye neende obwadyeeri muti batula eyiri Nasaae. Olwohuba banabbi bobubacha baangi muno bamala ohusalaanira mu syaalo syoosi.

²Yino niyo engeri yi muchia ohunyaliramo omuundu oli neende Mwooyo wa Nasaae. Omuundu yeesi oboola ati Yesu Kristo yehola omuundu, oyo atula eyiri Nasaae.

³Nae omuundu yeesi okaana ati Yesu Kristo haba siyehola omuundu, haba saali neende Mwooyo otula eyiri Nasaae. Mwooyo yaali nae aba atula eyiri Omusuku wa Kristo, yi muwulira muti achia ohwiicha, mani bulaanu yamala ohwiicha ano mu syaalo.

⁴Baana baange, eng'we muli abaana ba Nasaae, haandi mwamala ohuyiingira abanabbi bobubacha olwohuba Mwooyo obalimo w'amaani muno ohuhira mwooyo womu syaalo.

⁵Abanabbi bobubacha abo balomaloma hu biindu by'ohusyaalo, mani sakira esyaalo sibadaha haandi syaabatekeeresa.

⁶Nae efwe huli aba Nasaae. Haandi omuundu yeesi omanyire Nasaae atutekeeresa. Nae omuundu yeesi otaali owa Nasaae haba saatuwulira. Yino niyo engira yi hunyala ohukabuhanisiramo Mwooyo w'obwadyeeri neende mwooyo w'obubacha.

⁷Basyaange baheerwa, lehe huheerane abeene-na-beene, olwohuba obuheeri butula eyiri Nasaae. Omuundu yeesi oli neende obuheeri aba ali omwaana wa Nasaae haandi omanyire Nasaae.

⁸Omuundu otaali neende obuheeri, oyo akoterwe Nasaae, olwohuba Nasaae buheeri nibwo.

⁹Yino niyo engeri yi Nasaae yatweekeseramo obuheeri bwae: Yatuma Omwaana wae mudeerwa yeeng'ene mu syaalo hu hunyale ohunyoola obulamu ohumubitiramo.

¹⁰Buno nibwo obuheeri. Haba si neefwe abataangira ohuheera Nasaae, ohutusaho Nasaae niye owataangira ohutuheera, hu yaatutumira Omwaana wae ohuba esiyaanwa simalao ebyonoono byeefwe.

¹¹Basyaange baheerwa, nisiri siti Nasaae yatuheera atyo, mani fwesi huhoyere ohuheerana.

¹² Abulao omuundu yeesi owamala ohubonaho Nasaae, nae nihuheerana, ao Nasaae aba ali mweefwe, haandi obuheeri bwae buli mweefwe bucha ohwolerera elalira.

¹³Sino nisyo esyomiisa bulai siti huli mu Nasaae, haandi yeesi ali mweefwe, olwohuba yatuberesa Mwooyo wae mweene.

¹⁴Haandi efwe abeene hwabona, mani bulaanu huboolera abaandu baandi huti, Seefwe yatuma Omwaana wae ohuba omuwonia w'esyaalo.

¹⁵Omuundu oboola ati Yesu ni Omwaana wa Nasaae, Nasaae amulimo haandi yeesi ali mu Nasaae.

¹⁶Haandi efwe abeene hwamanya haandi hwaafukiirira obuheeri bu Nasaae yatuheereramo. Nasaae buheeri nibwo, mani omuundu oli mu buheeri ali mu Nasaae, haandi Nasaae yeesi amulimo.

¹⁷Mu ngeri yino, obuheeri bwatwolereramo elalira. Mani huchia ohuba neende obwomiifu hu Ludaalo lw'ohuheengeraho emisaango. Olwohuba obulamu bweefwe bwohu syaalo huno bufwaana koti obwa Kristo.

¹⁸Mu buheeri mubulamo ohutya; nae obuheeri bwiichufu bumalaangao obuti bwoosi. Olwohuba ohutya hudiirana neende ohusaandisibwa, haandi omuundu otya haba saaba ali neende obuheeri bweene mu mwooyo kwae.

¹⁹Lehe hube neende obuheeri olwohuba Nasaae niye owataangira ohutuheera.

²⁰Omuundu n'aboola ati, “Ndaheera Nasaae” nae esiha syeene asihayaane neende owaasye, oyo aba omubacha, olwohuba saanyala ohuheera Nasaae yasisiiri ohubonaho, nasiihayirwe ohuheera owaasye yaabona.

²¹Sakira sino nisyo esilagiro si Kristo yatuberesa. Yaboola ati, omuundu oheera Nasaae, ahoyere ohuheera owaasye yeesi.