Read saamia 1 Yowaana 5 Bible Online

1 Yowaana 5 - saamia bible

1 Yowaana 5

¹Omuundu yeesi ofukiirira ati Yesu niye Kristo, oyo aba ali omwaana wa Nasaae. Haandi omuundu oheera omwiibusi ahoyere ohuheera omwaana yeesi.

²Sino nisyo esyeekesa siti hwaheera abaana ba Nasaae. Nihuheera Nasaae haandi hwaawulira ebilagiro byae.

³ Kano niko amahuluundu k'ohuheera Nasaae, ohuwulira amalako kae. Haandi amalako kae haba simadinyu,

⁴olwohuba buli mwaana wa Nasaae yeesi ayiingiraanga amaani k'esyaalo. Yino niyo engeri yihuyiingiriramo amaani kohu syaalo, huyiingira neende efukiirira yeefwe.

⁵Abulao omuundu onyala ohuyiingira amaani kohu syaalo ohutusaho omuundu ofukiirira ati Yesu ni Omwaana wa Nasaae.

⁶Yesu Kristo niye omuundu weecha neende amaachi kabatiisa, neende amabaanga kae. Haba siyeecha neende amaachi koong'ene, nae amaachi neende amabaanga. Haandi Mwooyo Mwoolerefu mweene yomiisa obwadyeeri buno, olwohuba Mwooyo Mwoolerefu bwadyeeri nibwo.

⁷Baliwo abaloli badatu abomiisa obwadyeeri buno:

⁸Mwooyo, amaachi, neende amabaanga. Haandi badatu bano boosi bafukiirisania.

⁹Nikali mbwe hufukiirira emboosi ch'abaandu, echomiiswa neende obwadyeeri bwoosi, ao huhoyere ohufukiirira echa Nasaae chihiramo amaani, haandi niyo emboosi yi Nasaae yomiisa hu Mwaana wae.

¹⁰Omuundu yeesi ofukiirira Omwaana wa Nasaae oyo aba yomiisa obwadyeeri buno mu mwooyo kwae; nae omuundu otafukiirira Nasaae, oyo aba amuhola omubacha, olwohuba haba saafukiirira bi Nasaae yaboola niyomiisa obwadyeeri budiira hu Mwaana wae.

¹¹ Mani yino niyo emboosi yomiisa obwadyeeri yiti, Nasaae yamala ohutuberesa obulamu butaakama, haandi obulamu buno bunyoolehana mu Mwaana wae.

¹²Omuundu yeesi oli neende Omwaana wa Nasaae oyo niye oli neende obulamu buno, nae omuundu yeesi obula Omwaana wa Nasaae oyo abula neende obulamu.

¹³Mbaandiikira sino, eng'we abafukiiririra mu liita ly'Omwaana wa Nasaae munyale ohumanya muti muli neende obulamu butaakama.

¹⁴Sino nisyo esikera hwaaba neende obwomiifu mu moni wa Nasaae, hwomiisa huti achia ohutuberesa esiindu syoosi nihumusaba koti lu yeenya.

¹⁵Haandi nihumanya huti atuwuliraanga nihumusaba esiindu syoosi, ao humanya haandi huti, achia ohutuberesa buli siindu sihumusaba syoosi.

¹⁶Omuundu naabona owaasye naahola esyonoono sitaleeta ohufwa, ahoyere ohulaama mani Nasaae achia ohuberesa omuundu oyo obulamu. Mboola esyo ohudiira hu baandu bahola esyonoono sitaleeta ohufwa. Nae aliwo esyonoono sileeta ohufwa. Mani haba simboola endi muhoyere ohulaama Nasaae ebidiira hu syonoono esyo.

¹⁷Ebiholwa byoosi ebitaali ebiluungifu bibi nibyo, nae aliwo ebyonoono biindi bitaleeta ohufwa.

¹⁸Humanyire huti, omwaana wa Nasaae haba siyemeeda ohwonoona, olwohuba Omwaana wa Nasaae amuliinda bulai, haandi omusuku Sitaani saanyala humuholaho esyonoono syoosi.

¹⁹Humanyire huti huli abaandu ba Nasaae, haandi esyaalo syoosi siri mu bunyala bw'omusuku Sitaani.

²⁰Humanyire huti Omwaana wa Nasaae yamala ohwiicha, haandi yatuberesa amakesi kakera hwaamanya omuundu wadyeeri. Humenya mu bulala neende Nasaae wadyeeri mu bulala, neende Omwaana wae Yesu Kristo. Wuno niye Nasaae waadyeeri mweene, haandi niye obulamu butaakama.

²¹Baana baange, mutule hu banasaae bobubacha.