Read saamia Abakayi 1 Bible Online

Abakayi 1 - saamia bible

Abakayi 1

¹Luunyuma lw'ohufwa hwa Yosua, abaandu ba Yisiraeli bateeba Omwaami bati, “Nono siina cheene hu nono cheefwe chino echihoyere ohuba echichia ohutaangira ohuseeta Abakanani?”

²Nae Omwaami yabakobolamo ati, “Enono ya Yuda niyo eyichia ohutaangira ohuseeta. Ese njia ohubaberesa obunyala banyale ohuwaamba esyaalo sino.”

³Mani abaandu ba Yuda beemao baboolera abaandu ba Simeoni bati, “Eng'we mweesi mwiiche huchie naang'we mu situundu sy'esyaalo situbereeswe mani huhoonyane ohulwaania Abakanani. Mani ao huba huchia ohunyala ohuchia naang'we mani hwiingire mu situundu sy'esyaalo sibabereeswe.” Mani ao, enono cha Simeoni

⁴neende Yuda, cheemao chaatula chachaana nabo mu biita. Omwaami yeemao yaababeresa amaani mani baanyala ohuwaamba Abakanani haandi neende Abaperisi, mani olwo baanyala ohuyiingira abasaacha elifu ehumi (10,000) nibali Bbeseki.

⁵Beecha baanyoola Adonibbeseki ebweene eyo, mani baamulwaanisirayo.

⁶Adonibbeseki yeecha yeeruha, nabo bamwoongaho sa, bamudiira, mani baamuheenga enjala chae ch'amahono, neende ech'amakulu.

⁷Adonibbeseki yaboola ati, “Abatuki amahumi kataanu-na-kabiri, abaheengwaho enjala chaabwe esaacha ech'amakulu neende ech'amahono beechere badoolaanga ebihuuhumuha aasi w'emeesa yaange. Nasaae nguno bulaanu buti yesi yeechere yaahola sa koti lu ndahola abo.” Yayirwa mu Yerusalemu yi yeecha yafwiira.

⁸Abaandu ba Yuda baseeta Yerusalemu mani nibamala nibayiyaamba. Beeta abaandu balimo boosi mani nibayitaaho omuliro.

⁹Nibamala batyo, bemeeda sa neende ohulwaania Abakanani abali nibamenya mu syaalo sy'ebigulu-gulu, mu nandaalira w'ebigulu ebyo, haandi baamala baachia mu syaalo syooma kurururu, ohwoola emwaalo bweene.

¹⁰Bahuumba nibachoomere Abakanani abali nibamenya mu siko sya Hebburoni, esyalichiingi nisilaangwa Kiriati Aribba. Niboola omwo, bayiingira enono cha Sesai, Ahimaani, neende Talimai.

¹¹Ohutula ao, abasaacha ba Yuda bahuumba nibachoomere esiko sya Debbiri, esiha esyo esiko esyo esyali nisilaangwa mbwe Kiriati Seferi.

¹²Nae mulala hu nibo, owali n'alaangwa mbwe Kalebbu, yeecha yaboola ati, “Ese njia ohukaba omuhaana waange olaangwa mbwe Akasa adeehere omusaacha oyo yeesi ochia ohunyala ohuwaamba Kiriati Seferi.”

¹³Otinieli, omwaana wa mwaanang'ina Kalebbu omuyere olaangwa Kenasi, niye owanyala ohuwaamba esiko esyo, mani Kalebbu yesi yaamuberesa omuhaana wae oyo Akisa yaamudeehera.

¹⁴Hu ludaalo lw'obugole bwaabwe, Otinieli yekweeda omuhaana oyo, asabe laatang'ene omukuunda. Yeeha ohutula hu suhiri yae, mani Kalebbu yaamuteeba esiindu si yali naadaha.

¹⁵Mani omuhaana oyo yaamukobolamo ati, “Ese ndahaho amadiba k'amaachi. Eloba li ewe waamberesa, liri mu syaalo syooma kurururu.” Mani Kalebbu yaamuberesa amadiba k'aakulu neende aka aasi.

¹⁶Abeechuhulu ba Muhweeng'ene Musa, owali Omukeeni, bachiana neende abaandu ba Yuda ohutula Yeriko, esiko syali esy'eminaasi, mani baachia beengira mu syaalo sikuumba syeene esyali emwaalo wa Aradi mu Yuda. Niboola eyo, bamenya mu bweene omwo, mu baandu Abamaleki.

¹⁷Abaandu ba Yuda bosi alala neende aba Simeoni bachia balwaania mani baanyala ohuyiingira Abakanani abali nibamenya mu siko sya Sefati. Basitaaho esibwaabo, nibasisihirisa, mani nibeemao nibasikuliha Horima.

¹⁸Yuda syabukula Gasa syosi alala neende esituundu sy'esyaalo syahwo, haandi neende Asikelooni, alala neende esituundu sy'esyaalo syahwo, haandi neende Ekironi, alala neende esituundu sy'esyaalo syahwo.

¹⁹Haandi Omwaami yali sa neende Yuda, mani yaanyala ohubukula esyaalo sy'ebigulu-gulu syosi, nae haba siyanyala ohwiirusamo abaandu bali nibamenya mu syaalo syahwo sikwalaafu, olwohuba abo bali nibali neende ebigaari by'ebichuma.

²⁰Mani koti sa lu Musa yali niyalagira, Hebburoni syeecha syaabereswa Kalebbu, owanyala ohwiirusamo enono chidatu enaamba echali nichitulana hu Anaka.

²¹Nae abaandu bali ab'enono ya Bbenjamini haba sibanyala ohwiirusa Abaebbusi bali nibamenya mu Yerusalemu bawaamo, mani Abaebbusi bemeeda sa ohumenyaangamo alala neende abaandu ba Bbenjamini ohutula hu ludaalo olwo.

²²Enono cha Efuraimu neende Manaase cheemao chaatula mani chaachia ohuseeta esiko sihoongo sya Bbeteli esiha esyo esyali nisilaangwa mbwe Lusi. Omwaami yachia nabo yaabahoonya.

²³Enono ya Yosefu niyo eyatuma abaandu bachie bahemerese Bbeteli esyo.

²⁴Abahemeresi bano babona omuundu wuundi naatula mu siko omwo, mani baamusaba bati, “Ewe tuboolereho engeri yi hunyala ohwiingirira mu siko muno, mani haba sihuba nihuchia ohuhuholaho obubi bwoosi daawe.”

²⁵Mani omuundu oyo yeecha yabeekesa, mani abaandu ba Efuraimu neende Manaase, baachia beeta buli muundu yeesi owali niyamenya mu siko omwo, ohutusaho omusaacha wuno alala neende edaala lyae lyoosi.

²⁶Luunyuma lw'ebyo, omusaacha wuno yaachia mu loba ly'Abahiiti, mani yoombaha esiko ebweene eyo yasikuliha Lusi, elisisiiri eliita lyasyo ohwola enyaanga yino.

²⁷Enono ya Manaase haba siyeerusa yaamala abaandu boosi abali nibamenya mu biko bya Bbeeti Saani, Tanaaki, Doori, Ibbuleamu, Megido, haandi neende mu biko bidiidi-diidi ebyali nibisibiraneenge nabyo; Abakanani baandi bemeedaanga sa ohumenyaanga mu bweene omwo.

²⁸Abaisiraeli nibeecha bemeeda ohuba neende amaani maangi muno, baanyala ohuyikaanga Abakanani ohubaholeraanga sa emirimo, nae kata katyo haba sibaabeerusaanga nibabamaliramo elalira boosi daawe.

²⁹Enono ya Efuraimu yosi haba siyeerusa Abakanani boosi abali nibamenyaanga mu siko sya Geseri, mani katyo, Abakanani bano bosi bemeedaanga sa ohumenyaanga mu bweene omwo nabo.

³⁰Enono ya Sebbuluuni yosi haba siyeerusa abaandu balichiingi nibamenya mu biko bya, Kiturooni neende Nahalaali, mani katyo, Abakanani bemeedaanga sa ohumenyaanga mu bweene omwo alala nabo, nae nibayikwaanga ohubaholeraanga sa emirimo.

³¹Enono ya Aseri yosi haba siyeerusa abaandu balichiingi nibamenyaanga mu biko bya, Ako, Sidoni, Ahalabbu, Akisibbu, Helibba, Afeki, neende Rehobbu.

³²Abaandu ba Aseri bamenyaanga sa alala neende Abakanani buli nyaanga, koti lu bali nibateeruswa baatula boosi.

³³Enono ya Nafutaali yosi haba siyeerusa abaandu balichiingi nibamenya mu biko bya, Bbeeti, Semeesi, neende Bbetanaati. Abaandu ba Nafutaali bamenyaanga sa alala neende Abakanani ba buli nyaanga, nae nibabayikaanga sa ohubaholeraanga emirimo byoong'ene.

³⁴Abaamoori nabo bayikaanga abaandu b'enono ya Daani ohuchia mu syaalo sy'ebigulu-gulu mani baabakayira baahaya ohwiiha aasi eno mu syaalo sy'esipaapi.

³⁵Abaamoori bemeeda sa ohumenyaanga mu Aijalooni, Salibbiimu, neende Lugulu lwa Heresi, nae enono chia Efuraimu neende Manaase, babahayisira sa mu bunyala bwaabwe, haandi baanyala ohubayikaanga nibabaholeraanga sa emirimo.

³⁶Nae emukulu wa Sela, olwaaho lw'Abaedomu lwali niluhalakanianga Akirabbiimu Paasi.