Read saamia Abakayi 10 Bible Online

Abakayi 10 - saamia bible

Abakayi 10

¹Luunyuma lw'ohufwa hw'Abbimeleki, Toola omwaana wa Puwa, haandi omwiichuhulu wa Doodo, yatulayo yaachia yaanunula Yisiraeli. Yali naatula hu nono ya Yisakari, mani yali niyamenya mu Samiri mu syaalo sy'ebigulu-gulu esya Efuraimu.

²Yanyala ohuba omutuki wa Yisiraeli hu mbaka y'emyaaka amahumi kabiri neende kidatu. Yafwa, mani yasiihwa mu Samiri.

³Toola niyatulayo, Yairi niye oweechao naatula mu Gileadi. Yeemao yaanyala ohwiimirira Yisiraeli ohumala emyaaka amahumi kabiri neende kibiri.

⁴Wuno yali neende abasyaani amahumi kadatu abakeenderaanga hu suhiri amahumi kadatu. Bano boosi banyala ohuba neende ebiko bihunuufu byosi amahumi kadatu mu syaalo sya Gileadi, ebisiilaangwa ohwoola leero mbwe engoongo cha Yairi.

⁵Yairi wuno yesi yaafwa, mani yaasiihwa mu Kamoni.

⁶Haandi ehabi liindi, Yisiraeli yeemao yonoonera Omwaami, niyibitira mu hwiinamiraanga ba Bbaali neende ba Asitarooti, haandi neende banasaae ba Siria, aba Sidoni, aba Moabbu, Abaamooni, haandi neende Abafilisiti. Beecha baajwaang'a Omwaami, mani baakama ohumwiinamiraanga.

⁷Mani Omwaami yesi yanyoolerera Abaisiraeli abo, mani yaaleha Abafilisiti neende Abaamooni baabayiingira.

⁸Mani hulw'embaka y'emyaaka ehumi neende kitaanu-na-kidatu, abo banyala ohufwiinyirira haandi neende ohusandyaanga Abaisiraeli boosi abali nibamenya mu syaalo sy'Abaamoori ebukwe w'Omwaalo kwa Yorodaani mu Gileadi.

⁹Abaamooni kata haandi bosi beemao baanyala ohwaambuhaanga Yorodaani nibachichaanga ohulwaania enono cha Yuda, Bbenjamini, kata sa neende Efuraimu. Yisiraeli yaaba mu sibeera siingi muno.

¹⁰Mani ao, Abaisiraeli haandi beecha baanyala ohuubbira Omwaami wuuwi nibaboola bati, “Efwe abeene niifwe abonoona mu moni wao, olwohuba niifwe abahutulaho, ewe Nasaae weefwe, mani hwaachia hweenamiraanga ba Bbaali.”

¹¹Nae Omwaami yabakobolamo ati: “Abamisiri, Abaamoori, Abaamooni, Abafilisiti,

¹²Abasidoni Abamaleki, neende Abaamooni, boosi beechaanga boola ohubafwiinyiriraanga hale, mani eng'we ni mwichaanga ni muundiriraanga. Mani ese ndahayaho ohubawoniaanga mbatusa hu beene abo?

¹³Nae kata katyo, eng'we abeene niing'we abandulaangaho, muuchaaka ohwiinamiraanga banasaae baandi, mani ese leero luno, haba siinjia ohukanya ohubanunula haandi daawe.

¹⁴Eng'we muchie sa mulirire banasaae ba mwedoolera abeene abo. Lehe abeene abo babanunuleenge buli lu munakwiichaanga mu bidinyu byoosi.”

¹⁵Nae abaandu ba Yisiraeli mani beemao baboolera Omwaami bati, “Efwe abeene niifwe abonoona. Ewe onyala ohutuhola esiindu syoosi sy'oba n'odaha, nae kanya, otuwonie haandi luno.”

¹⁶Mani beetusamo banasaae baabwe bakeni abo, mani bachaaka ohwiinamiraanga Omwaami; mani yesi yachuunwa muno neende esibeera sya Yisiraeli.

¹⁷Bulaanu eye ly'Abaamooni lyeetekeha ohulwaana ebiita, mani niliicha ni lyoombaha ekaambi mu Gileadi. Abaandu ba Yisiraeli bosi beemao beebuusa alala mani beecha bosi boombaha ekaambi mu Misipa mu Gileadi.

¹⁸Nibali ebweene eyo, niyo yi baandu sa, haandi neende abeemirisi b'enono cha Yisiraeli bachaaka ohweteebanaho abeene-na-beene bati, “Wiina mweene onaanyale ohutwiimirira ni hulwaania Abaamooni bano? Oyo yeesi onanyala ohuhola atyo, niye oba anaba omwiimirisi wa buli muundu yeesi mu Gileadi muno.”