Read saamia Abakayi 11 Bible Online

Abakayi 11 - saamia bible

Abakayi 11

¹Yefuta, owali omunamaye w'amaundu ohutula Gileadi, yali omwaana w'omuhasi mucheke. Nae laatang'ene owali alaangwa Gileadi

²yali neende abaana baandi neende omuhasi wali owae mweene, mani boosi nibahula, bayiika Yefuta ohutula mu lwaanyi lwaabwe. Beecha baamuboolera bati, “Ewe haba soochia ohunyala ohuyiraho esiindu syoosi esya seefwe wuno daawe; ewe oli omwaana w'omuhasi wuundi sa.”

³Yefuta yeemao yeeruha yatula hu bamwaanang'ina abo, mani yachia yaamenya mu loba lya Tobbu. Mani niyali naali ebweene eyo, yeecha yanyala ohweleetaho omukaanda kw'abasaacha bataali neende obuhoonyi mu syaalo, mani yabechaanga sa n'akeendanaanga nabo sa alala.

⁴Mani byali luunyuma muno, Abaamooni lu beecha baheengao ohulwaana ebiita neende Yisiraeli.

⁵Mani sino ni syakwaao, abeemirisi ba Gileadi beecha bachia ohukobosa Yefuta engo, atule mu loba lya Tobbu.

⁶Mani beecha baamuboolera bati, “Ewe yicha mani otwiimirire, hu hunyale ohuchia ohulwaania Abaamooni.”

⁷Nae Yefuta yabakobolamo ati, “Eng'we mwaasyula hale muno, ohwoola lu mwaanjika ndaatula mu daala lya laata yaange. Lwasiina bulaanu mwiicha yi ndi, mbwe nimuli mu bidinyu byoong'ene?”

⁸Nabo baboolera Yefuta bati, “Efwe esiha sino huli ohukaluuhana y'oli olwohuba hwenya ewe ochie naafwe alala mani hunyale ohulwaania Abaamooni, mani haandi hw'onyale ohwiimirira abaandu boosi aba Gileadi.”

⁹Yefuta nae yababoolera ati, “Mani nikali mbwe eng'we mudaha ohuungobosa engo mbwe njiche nwaanie Abaamooni, mani niwiichuhana Omwaami yaanyala ohuhoonya yaanyalira ohuyiingira, mani ese njia ohuba lwosi omutuki weeng'we.”

¹⁰Nabo bamukobolamo bati, “Efwe fweesi hufukiirira sa. Omwaami mweene oyo niye omuloli weefwe.”

¹¹Mani katyo, Yefuta yeecha yachiana neende abeemirisi ba Gileadi, mani abaandu baamuhola ohuba omutuki waabwe, haandi omwiimirisi waabwe. Yefuta yatuumbula ehola yino naali mu Misipa mu moni w'Omwaami.

¹²Mani bulaanu Yefuta yeemao yaatuma bawamwaanda ohuchia eyiri omutuki wa Abaamooni ohuboola bati, “Obusoolo bwao naafwe bweema hu siina syeene? Lwasiina osetere esyaalo syeefwe sino?”

¹³Omutuki w'Abaamooni nae yakobola mu bawamwaanda ba Yefuta ati, “Abaisiraeli nibatula mu Misiri, beecha ano mani banjaayaho eloba lyaange ohutulira elalira hu Mwaalo Arinooni, ohwoola hu Mwaalo Yabboki, haandi hu Mwaalo Yorodaani. Mani bulaanu, muhoyere ohuliingalusira kwa deembe.”

¹⁴Haandi Yefuta yakobosayo bawamwaanda bae eyiri omutuki w'Abaamooni

¹⁵neende esikobolamo sino siti: “Haba sisiri esyadyeeri mbwe, Yisiraeli yang'uula eloba lya Moabbu, kata sa eloba lya Abaamooni.

¹⁶Ohutusaho esiindu syaholehana syali siti: Abaisiraeli nibatula Misiri, baahalakania esyaalo sy'esiparara sy'Omusoma kwa Akabba, mani boola mu Kadesi.

¹⁷ Mani batuma bawamwaanda eyiri omutuki wa Edomu ohumusaba obunyala bw'ohuhalakania mu loba lyae. Mani katyo, nilwo lu Abaisiraeli beecha banyala ohwiicha ohumenya mu Kadesi.

¹⁸ Mani beemao haandi bemeeda ohuhalakania esiparara, ni beebodoohania eloba lya Edomu, haandi neende eloba ly'ebukwe wa Moabbu, hu luwaande luundi lula olw'Omwaalo kwa Arinooni. Bulaanu beemao boombaha ekaambi abweene ao, nae haba si baambuha Arinooni okwo olwohuba okwo nikwo okwali olwaaho lwa Moabbu.

¹⁹ Mani Abaisiraeli baatuma bawamwaanda ohuchia eyiri Sihooni, omutuki Omuamori owa Hesibboni, ohumusaba obunyala ohuhalakania mu situundu sy'esyaalo syae nibachia mu loba lyaabwe lyeene.

²⁰Nae Sihooni siyakanya Abaisiraeli ohuhola batyo daawe. Yabuusa eye lyae lyoosi alala, mani yaachia yoombaha ekaambi mu Yahasi, mani yaseeta Yisiraeli.

²¹Nae Omwaami, Nasaae w'Abaisiraeli, yanyala ohuberesa Abaisiraeli amaani baanyala ohuyiingira Sihooni neende eye lyae lyoosi. Ao niwo yi Abaisiraeli banyalira ohuwaamba esyaalo syoosi esy'Abaamoori abali nibamenya mu syaalo esyo.

²²Baamenya mu syaalo syoosi esy'Abaamoori ohutulira elalira hu Arinooni emwaalo bweene, ohwoola hu Yabboki emukulu bweene, haandi ohutulira hu siparara ebukwe, ohwoola hu Yorodaani emuumbo bweene.

²³Mani ao, Omwaami Nasaae wa Yisiraeli, niwo yi yanyalira ohwiirusamo Abaamoori hulw'Abaisiraeli abaandu bae.

²⁴Bulaanu ewe odaha ohuteemaho ohulyekobosaho, kose? Ewe onyala sa ohwedoong'esera ebyo byoosi bi Kemosi nasaae wao yahuberesa. Nae efwe huchia ohwedoong'esera buli siindu si Omwaami Nasaae weefwe, yeebukulira ohutuberesa.

²⁵ Ewe obaasa oti, ohira Bbalaki omwaana wa Sipori, omutuki wa Moabbu? Oyo haba siyanyala hutiisa-tiisa Yisiraeli kata nabudiidi, kose? Oyo mani yalwaanaho naafwe ebiita byeene?

²⁶Hulw'embaka y'emyaaka emia chidatu (300) emilaamba, Yisiraeli yali niyiri mu Hesibboni neende mu Aroeri, kata neende ebiko bidiidi-diidi byoosi ebyali nibibyebodoohanie ao, haandi kata neende ebiko byali nibyoombahwa hu magenya k'Omwaalo kwa Arinooni. Lwasiina ewe haba siwanyalaho ohubyekobosera esiha sino syoosi?

²⁷Haba daawe, ese haba sihuholereho esiindu sibi syoosi. Ewe niiwe oli ohuholaanga esyonoono nooli ohusiingisaangaho ebiita. Mani Omwaami niye omukayi mweene. Oyo niye ochia ohuheengao enyaanga yino esichia ohubaao akatikaati w'Abaisiraeli neende Abaamooni.”

²⁸Nae omutuki w'Abaamooni haba siyadeeba hu mboosi chino echitula eyiri Yefuta kata nabudiidi.

²⁹Ao mani Mwooyo w'Omwaami yeemao yeeha hu Yefuta. Yabita mu Gileadi neende mu Manaase mani n'akobola mu Misipa esyomu Gileadi, haandi yatula mu Misipa esyomu Gileadi, mani n'achia ohwoola mu Abaamooni.

³⁰Yefuta yasuubisa Omwaami ati, “Noochia ohunyalira ohuyiingira Abaamooni,

³¹mba njia ohuhusaambira omuundu yeesi ochia ohuba owaamberi ohutula mu nyuumba yaange ohuumbukaanira, niimba nindula ohuyiingira ebiita bino. Njia ohuyaana omuundu oyo yooli ohuba esiyaanwa syaange.”

³²Mani Yefuta yaambuha omwaalo yaachia ohulwaania Abaamooni mani Omwaami yesi yamuhoonya yayiingira ebiita.

³³Yabahubba ohutulira elalira hu Aroeri, ohwoola hu situundu siri aambi neende Miniiti, ebiko amahumi kabiri byoosi ohuyirira alala, haandi ohwoolera elalira hu Abbeli Keramiimu. Eyo yaliyo ohwiitana ohubitiirifu, mani Abaamooni boola bayiingirwa neende Yisiraeli.

³⁴Mani Yefuta niyali naafunya engo mu Misipa, eyo yaliyo omuhaana wae owali naatula erwaanyi ohwiicha ohumubukaanira, naahina haandi n'ali ohuubbaannga manyaanga. Omuhaana oyo niye owali n'ali omwaana wae yeeng'ene.

³⁵ Mani niyamuhubbyaho sa ati emoni, yataandula engubo chae choosi chaamuwaaho mu sibeera mani n'amala n'aboola ati, “Eee, omuhaana waange! Oli ohunjuuna muno mu mwooyo kwaange! Syahaba sitye siti ni ewe oli ohunjuuna mu omwooyo kwaange oti? Ese ndamala ohwechubira Omwaami hale, mani haba siinyala ndaahaya ohusyooseresa daawe!”

³⁶Omuhaana wae nae yamuboolera ati, “Ewe bbaabba, nikali mbwe wamala ohwechubira Omwaami, hola sa hweese esiindu syooba ni waboola oti ochia ohuuhola, koti lu Omwaami ali niye ohunyaliire ohwetuunga hu basuku bao, Abaamooni.”

³⁷Nae haandi yeemao yaasaba laatang'ene ati, “Laata, ewe taangira wuuholereho esiindu silala syoong'ene mberi. Ndeheho mbeo hulw'embaka y'emyoosi kibiri kiti kyoong'ene, nyale ohuchia neende abeecha baange ohung'alaalaho mu ngulu eyo, hu nyale ohwelira ohufwa nisisiiri ohumanyaho omusaacha.”

³⁸Yamukanya ohuchia, mani yaamulehuula achie abeeyo hulw'embaka y'emyoosi kibiri emilaamba. Omweene oyo alala neende abeecha bae bachia baniina beengira mu ngulu bweene omwo mani baalirira eyo koti lu yali naachia ohufwa natadeeha, haandi nateebulaho omwaana yeesi.

³⁹Mani luunyuma lw'emyoosi kibiri ekyo, yakobola eyiri laatang'ene. Yesi bulaanu yaahola esyo si yali niyalaka Omwaami wae, mani omuhaana oyo yaafwa n'asisiiri ohumanyaho omusaacha yeesi. Mani yino enjaako y'omunyira kuno okuli mu Yisiraeli

⁴⁰mbwe abahasi Baisiraeli bahoyera buli mwaaka ohutulaanga bachia erwaanyi eyo mani bamalayo endaalo chine enaamba ohuliraanga omuhaana wa Yefuta owa Gileadi.