Read saamia Abakayi 12 Bible Online

Abakayi 12 - saamia bible

Abakayi 12

¹Abaandu ba Efuraimu beecha beetekeha ohuchia ohulwaana ebiita; mani baambuha omwaalo kwa Yorodaani, mani baachia mu Safoni baaboolera Yefuta bati, “Lwasiina ewe wahalakania olwaaho, wachia walwaana neende Abaamooni n'otatulaangireho hwaachia naawe? Mani bulaanu efwe huchia ohuhusaambiraho sa enyuumba yino!”

²Nae Yefuta yababoolera ati, “Ese neende abaandu baange, hwali n'obusoolo bululu neende Abaamooni. Mubwadyeeri bweene ese ndalaangaho eng'we, nae eng'we haba simwanyala ohwiicha ohutununula ohutula hu baandu abo daawe.

³Mani ese nindabona endi hane eng'we haba simuchia hwiicha, ese omweene ndeyaanayo obulamu bwaange, mani ndahalakania olwaaho olwo ohuchia ohubalwaania, mani Omwaami yesi yahoonya yaamba obunyala ndabayiingira. Mani lwasiina eng'we mwiicha ohunwaania bulaanu?”

⁴Mani Yefuta yeemao yachia yabuusa alala abasaacha boosi aba Gileadi, mani beecha balwaania abaandu ba Efuraimu, baabayiingira. (Abaefuraimu bali nibaboolere bati, “Eng'we Abagileadi abali mu Efuraimu neende mu Manaase, muli sa abeeruha hale ohutula mu Efuraimu!”)

⁵Hu banyale ohukayira Abaefuraimu ohweiba, Abagileadi banyala ohuwaamba ebituundu bi mwaalo kwa Yorodaani kunyala ohwaambuhibwamo. Mani Omuefuraimu yeesi niyalichiingi n'adaha ohweiba, byamuyikaanga ataangireenge mberi ohusaba obunyala bw'ohwaambuha, mani ao, abasaacha ba Gileadi niwo yibecheraanga nibamuteeba bati, “Ewe oli Omuefuraimu, kose?” Nae ni yabolaanga ati, “Haba,”

⁶ao niwo yi bamuyiikiraanga ohuboola ati, “Sibboleeti,” olwohuba haba si yalichiingi n'anyala ohutuumbula emboosi eyo bulai. Mani ao niwo yi banyaliraanga ohumukwaaho, nibamwiitira abweene ao hu bwaambuhiro bw'Omwaalo kwa Yorodaani. Esiha esyo, Abaefuraimu elifu amahumi kane (40,000) beetwa batyo.

⁷Yefuta yeemao yaanyala ohwiimirira Yisiraeli hulw'embaka y'emyaaka kisaasaba. Mani yeemao yesi yaafwa, yasiihwa mu siko sy'enadaala lyae mu Gileadi.

⁸Luunyuma lwa Yefuta, Yibbisani ohutula mu Bbetilehemu yeemirira Yisiraeli.

⁹Wuno yali neende abasyaani amahumi kadatu, haandi neende abahaana amahumi kadatu. Yeecha yaakaba abaana bae bahaana boosi mu malya erwaanyi w'enono yae haandi yaleetera abaana bae basyaani ohudeehya, abahaana bayere amahumi kadatu ohutula mu njia ch'erwaanyi. Yibbusaani yanyala ohwiimirira Yisiraeli hulw'embaka y'emyaaka kitaanu-na-kibiri emilaamba,

¹⁰mani yesi yeemao yaafwa, yaasiihwa mu Bbetilehemu.

¹¹Luunyuma lwa Yibbusaani neende Eloni ohutula mu Sebbuluuni yeecha yemirira Yisiraeli hulw'embaka y'emyaaka ehumi.

¹²Mani yesi yaafwa, mani yasiihwa mu Aijalooni mu situundu sy'esyaalo sya Sebbuluuni.

¹³Haandi luunyuma lwa Eloni, Abbudoni omwaana wa Hileeli ohutula mu Piratoni yeecha yeemirira Yisiraeli.

¹⁴Wuno yali neende abasyaani amahumi kane, neende abeechuhulu amahumi kadatu, abeerusaanga esuhiri amahumi kataanu-na-kabiri. Abbudoni yeemirira Yisiraeli hulw'embaka y'emyaaka kitaanu-na-kidatu,

¹⁵mani yesi yaafwa yasiihwa.