Read saamia Abakayi 14 Bible Online

Abakayi 14 - saamia bible

Abakayi 14

¹Ludaalo luundi, Samusoni yatula yaachia yeehirira mu Timuna, yi yabonana neende omuhasi Mufilisiti muraaga.

²Niyakobolayo engo, yaboolera laatang'ene neende ng'ina ati, “Aliwo omuhasi Mufilisiti wuundi emwaalo eyomu Timuna yi moni chaange chihayiireho. Mani muchie mumuundeteere; ndaha ohumudeehya.”

³Nae laatang'ene neende ng'ina bamuteeba bati, “Siina syeene esikera watula ano, wachia eyiri Abafilisiti bakafiiri abo, ohubatusamo omuhasi? Ewe haba soonyala ohunyoola omuhasi yeesi ohutula mu nono yeefwe yeene yino, mu baandu beefwe beene bano?” Nae Samusoni yaboolera laatang'ene ati, “Oyo niye yi ese ndaha sa eng'we mumundeetere. Ese oyo niye yiindaha.”

⁴Abeebusi bae abo haba sibali nibamanyire bati hane yali naali Omwaami niye owali n'ali ohwiimiriraanga Samusoni ohuhola esiindu sino siti, olwohuba Omwaami hane yali naali ohukoonyaanga ehabi alwaanie Abafilisiti abo. Olwohuba esiha syeene sino, Abafilisiti nibo abali nibali ohutukaanga Yisiraeli yoosi.

⁵Mani Samusoni yeemao yaatula ao, yeehirira yaachia yaahalakania mu mikuunda ky'emifini ekyali nikiri eyo, yi yeecha yawulirira edalang'i njere niyiwuuchuha.

⁶Abweene ao, amaani k'Omwaami nikamwiihaho, mani nikakera Samusoni naaba neende amaani maangi muno, akamunyalisa ohudiira edalang'i eyo mani yaanyala ohuyitaandulamo neende amahono kae koong'ene, koti sa lu yahataandulamo embusi emeeme. Nae haba siyeecha yabooleraho abeebusi bae esiindu si yali n'aholere daawe.

⁷Haandi yatula yachia yaserera omuhaana oyo, mani yemeeda sa ohumusiima.

⁸Endaalo endiidi nichali nichimalire ohubitao, Samusoni yakobolayo yaanyala ohudeehya omuhaana oyo. Nae nibali hu ngira, nibeecha engo, Samusoni yatulaho hu ngira mani yakodohaho mu siino ohuchia ohwewuunjaho edalang'i yi yali niyeetere, mani yesiinduha muno, ohwakaana olwiisi lw'enjuhi, haandi neende obuuhi bweene nibiri mu dalang'i yafwa eyo.

⁹Yachaaka sa ohuyooya obuuhi obwo, mani naabuta mu mahono kae, yabulichaanga n'akeenda hu ngira. Niyamala atyo yasiingira yachia eyiri laatang'ene neende ng'ina, mani bosi yababeresaho obuuhi buundi. Bosi baabulya, nae Samusoni haba siyababooleraho ati hane yali n'abahuule obuuhi obwo ohutula mu mulaambo kw'edalang'i.

¹⁰Simwaana yesi yasiingira yaachia mu nyuumba ewaabwe omuhaana oyo, mani Samusoni yaanyala ohukabulira ebweene eyo esidyaalo. Kuno nikwo okwali omunalo okwalichiingi mu basyaani.

¹¹Abafilisiti nibamuhubbyaho sa emoni bati, bamutumira abasyaani amahumi kadatu amalaamba ohumenya nae.

¹²Samusoni yababoolera ati, “Eng'we leheho mboobbereho omunae; mani nimuchia ohunyala ohuumboolera amahuluundu kakwo mu ndaalo chitaanu-na-chibiri ech'esidyaalo sino, mani mwaakamanya, njia ohubaberesa ebyefwaalo by'elaasi amahumi kadatu amalaamba, haandi neende eby'efwaalo by'ebidyaalo byosi amahumi kadatu;

¹³nae nibibahaya ohumboolera amahuluundu kakwo, eng'we bulaanu niing'we ababa nimuchia ohuumberesa eby'efwaalo by'elaasi amahumi kadatu amalaamba, haandi neende eby'efwaalo by'ebidyaalo bitio amahumi kadatu.” Mani bosi nibamuboolera bati, “Ewe hubba-bu-hubba omunae okwo, hu kuwulire.”

¹⁴Mani yaababoolera ati, “Mu simira-baandu, mwatulamo esiindu siriibwa; Mu siindu sy'amaani, mwatulamo esiindu sinyunyuula.” Luunyuma lw'endaalo chidatu ohuwa, bali nibasisiiri ohufuumbula amahuluundu k'omunae okwo.

¹⁵Mani hu ludaalo lwa hane, beecha eyiri omuhasi wa Samusoni mani bamuboolera bati, “Hemeresaho wamwo oyo, onyale ohutubooleraho amahuluundu k'omunae kuno. Nae nootahola otyo, efwe huchia ohutubula omuliro hu nyuumba ya lataao, mani hwiiche huhubukule huhusaambiremo. Eng'we mweembi hane, mutulaangire hwiiche hu munyale ohutunyaka da?”

¹⁶Mani omuhasi wa Samusoni yesi yeemao yaachia yaali nahuhumula amasika mani n'aboola ati, “Ewe hane haba si waheera daawe! Ewe hane waasyuula-busyuula sa! Ewe ochiire mani woobbera abeecha baange omunae mani kata waahaya ohumbooleraho amahuluundu kakwo!” Nae yaboola ati, “Eng'we boneho sa, ese haba kata sindabooleraho kata laata yaange, kata neende maama yesi. Siina syeene esikera ese ndaahutuumbulira?”

¹⁷Yalirira esiindu sino embaka y'endaalo chitaanu-na-chibiri, Nae hu ludaalo lweene nilwo lu yeecheraho mani yaanyala ohutuumbuliraho omuhasi wae amahuluundu k'omunae okwo, olwohuba yali namwesisiinieho luleeyi. Mani omuhasi oyo yeecha yaaba niye owatuumbulira Abafilisiti bano.

¹⁸Mani sakira hu ludaalo lwa hataanu-na-habiri, Samusoni niyali nateengira mu siseenge sy'ohukonamo, abasaacha bomu siko omwo beecha baamuboolera bati, “Siindu siina syeene esinyala syaaba esinyunyuula ohuhiraho obuuhi? Siindu siina syeene esinyala ohuba neende amaani ohuhiraho edalang'i?” Nae Samusoni yaakobolamo ati, “Tabula eng'we mwaaba mbwe niing'we abalimyaanga eng'oombe chaange edwaasi, haba simwahabeere nimumalire ohufuumbula esikobolwamo syeene bulaanu buti.”

¹⁹Abweene ao, amaani k'Omwaami keecha kamwiihaho, mani kaamuhola yaaba neende amaani maangi muno, mani niyeehirira naachia mu Asikelooni, yi yeetera abasaacha amahumi kadatu yeeng'ene, mani haandi yaamala yaabafwaalulamo eby'efwaalo byaabwe byoosi, mani naamala n'achia naakaba omutuulu kwaabwe, okw'eby'efwaalo by'elaasi, abasaacha bali nibanyalire ohutuumbula amahuluundu k'omunae okwo. Esyo nisyawa, yakobolayo engo, naabira etima ohweema hu siindu syali nisiholehaane,

²⁰mani omuhasi wae oyo yaabereswa omusaacha wali omusibirisa wae mu bugole bwae.