Read saamia Abakayi 18 Bible Online

Abakayi 18 - saamia bible

Abakayi 18

¹Endaalo echio, yali n'abulao omutuki yeesi mu Yisiraeli. Esiha esyo, enono ya Daani, yali niyikonyaanga sa esituundu sy'esyaalo siyinyala syaabukula syaanyala ohumenyamo sa olwohuba bali nibasisiiri ohubereswaho esituundu sy'eloba syoosi ohuba esyaabwe, mu nono cha Yisiraeli choosi koti lu chali nichaakiriire.

²Mani katyo, abaandu ba Daani bano badoolamo abasaacha bataanu ohutula mu madaala koosi mu nono eyo, mani nibamala batyo, baabatuma ohutula mu biko bya Soora neende Esitaoli, neende ebilagiro ohuchia balambuule esyaalo esyo mani basihemerese. Mani niboola mu syaalo sy'ebigulu-gulu sya Efuraimu, bachia beehala mu nyuumba ya Miika.

³Mani nibali nibasiiri ebweene eyo, beehaliirisa etuumbula y'emboosi y'Omuleefi muyere oyo, mani baasuda yali bamuteeba bati, “Siindu siina syeene syooli ohuholaanga ano? Wiina mweene owahuleeta ano?”

⁴Nae yaabakobolamo ati, “Ese, aliwo endekeha yiindi nayo neende Miika, owungabanianga hulw'ohumuhalaabaniraanga koti omulaamisi wae.”

⁵Nabo bamuboolera bati, “Mani nooba nookanya, teebaho Nasaae nikali mbwe efwe huchia ohubitamo hu lukeendo lweefwe luno.”

⁶Nae omulaamisi wuno yabakobolamo ati, “Eng'we haba simuliho neende esiindu syoosi esihoyere ohubelalihirisa daawe. Omwaami niye obaliindire hu lukeendo lweeng'we luno.”

⁷Mani abasaacha abo bataanu, baatula ao, baachia mu siko sya Laisi. Beemao baabona koti lu baandu bali ebweene eyo bamenyaanga mu buliindi buli koti obw'Abasidoni. Bali abaandu b'omuleembe, abayenjeefu, abataali neende amayiingi koosi neende omuundu yeesi; haandi bali neende buli siindu sibali nibadaha. Bali nibamenya eyale muno ohutula eyiri Abasidoni, haandi haba sibaliho neende eholegana yoosi neende abaandu baandi boosi daawe.

⁸Mani abasaacha bataanu abo nibakobolayo mu Soora neende mu Esitaoli, mani abaandu baabateeba ebiindu bi bali nibanyalire ohubonayo.

⁹Nabo baabakobolamo bati, “Eng'we mwiiche sa. Lehe huchie huseete-buseeta Laisi. Hwachiire hwaanyala ohulambuula esyaalo esyo, hwaabona huti, silai muno! Mani muchie-buchia, mani mwiingire musiwaambe!

¹⁰Nimuchia mwaanyala ohwoola ebweene eyo, muchia ohweboneraho abeene muti abaandu abo haba saaliwo esiindu syoosi sibabaasirisiramo daawe. Syaalo sihoongo muno nisyo; sirimo buli siindu syoosi si muundu yahekoombere, nae Nasaae mbao amalire ohusibaberesa.”

¹¹Mani abasaacha emia chisaasaba (600) ohutula mu nono ya Daani, beecha baatula mu Soora neende Esitaoli, nibeetekeehe ohulwaana ebiita.

¹²Baniina baachia, mani baata ekaambi emuumbo wa Kiriati Yearimu mu Yuda. Mani esyo nisyo esikera abuundu ao nasiilaangwa Ekaambi ya Daani.

¹³Haandi beecha baatula ao mani bemeeda ohuchianakana neende esyaalo ohwoola lu boola hu nyuumba ya Miika eyali mu syaalo sy'ebigulu-gulu esya Efuraimu.

¹⁴Mani bulaanu abasaacha bataanu bala abali ni bachiayo ohuhemeresa esyaalo syali nisyebodoohania Laisi beemao baaboolera abasyaabwe abo bati, “Mani eng'we mumanyireho muti abuundu ano mu nyuumba ndala hu chino mulimo esiloongaloongwe syabaachwa mu mbaao haandi esyaomwaho efeesa? Haandi mulimo neende ebiloongaloongwe biindi, haandi kata neende engubo ehiiha? Mani aliwo hooho esiindu si mubaasa muti hunyala ohuholaho?”

¹⁵Mani bachia beengira mu nyuumba ya Miika, yi Muleefi muyere wula yali niyamenyamo, mani baateeba Omuleefi oyo koti obulamu bwae bwali ni bumuchiira.

¹⁶Nae esiha syeene esyo, Abadaani abanamaye bala emia chisaasaba (600), abali nibetekeheere ohulwaana ebiita, bali nibeemere hu siruwa nibeliindiriire sa ohulwaana.

¹⁷Abahemeresi bala bataanu, beemao baachia bachooma enyuumba eyo, mani nibamala nibabukula esiloongaloongwe sy'embaao esyo, esyali nisyaomwaho efeesa, alala neende ebiloongaloongwe biindi bira, haandi engubo hiiha yira yosi, nae omulaamisi n'asisiiri ena siruwa n'ali alala neende abasaacha bala emia chisaasaba (600) abali neende ebilwaaniso.

¹⁸Mani abasaacha abo beecha beengira mu nyuumba ya Miika, mani baabukulamo ebiindu byoolerefu ebyo, omulaamisi oyo mani yaabateeba ati, “Eng'we, siindu siina syeene esyo si muli ohuhola?”

¹⁹Nabo bamuboolera bati, “Ewe nyita chi. Otalomalomaho emboosi yoosi. Yicha huchie nawe mani obe omulaamisi weefwe, haandi omukeraki weefwe. Ewe haba s'obaasa oti wahahoyere ohuba omulaamisi w'oluyia lwa Yisiraeli lwoosi ohuhiraho ohuba omulaamisi w'edaala ly'omuundu mulala yeeng'ene?”

²⁰Sino syeecha syasangaasa muno omulaamisi oyo, mani yeecha yaabukula ebiindu byoolerefu ebyo yachiana nabo yawaao.

²¹Beecha baakaluuhana bachaaka olukeendo luwaao, neende abaana baabwe, ebituke byaabwe byoosi, haandi alala neende ebiindu byaabwe byoosi nibibemisiiremo.

²²Mani bano nibaba nibahamala ohwooloberera neende olukeendo lwaabwe ohutula hu nyuumba eyo, ao niwo yi Miika yeechera mani yalaangira abaandu bali nibasibiraane nae ohutula bachie balwaane ebiita. Bachia baloonda hu Abadaani mani baabaakaana

²³mani bachaaka ohubaayuhiraho. Abadaani bano bosi bakaluuhana mani bateeba Miika bati, “Siina syeene sino? Esidiiyiha sino syoosi syasiina syeene?”

²⁴Miika nae yabakobolamo ati, “Naang'we mudaha mutye, ‘Sidinyu siina syeene?’” Eng'we mwiicha sa ano nimubukula omulaamisi waange alala neende banasaae bandeeholera omweene, nimumala mweehumbira mweweerao sa, siindu siina siimba nindoong'iisye enyuma?

²⁵Abadaani nabo bamuboolera sa bati, “Ewe syahabeere esilai sihiramo obutalomalomaho esiindu syoosi, ohutusaho nooba noodaha oti abasaacha bano boosi basinyiihe mani bahuseete bahulwaanie. Ngandi ewe mweene alala neende edaala lyao lyoosi muba muchia ohufwa muwe sa ebihaya.”

²⁶Mani Abadaani bano nibemeeda sa ohuwaao. Miika bulaanu yesi yabona ati hane abasaacha bano boosi bali nibali ab'amaani amaangi ohumuhira, mani omweene yeekaluuhanira yekobolerayo engo wae.

²⁷Mani batyo, nibanyala ohuwaao neende ebiindu bi Miika omweene yali niyeholeere, alala neende omulaamisi wali naali owae hu bwae. Abadaani bano baachia mani baseeta Laisi, esiko esyo esyali esy'abaandu b'omuleembe haandi abayenjeefu, mani babeeta neende engaanga, haandi baamala basaamba esiko esyo syoosi neende omuliro.

²⁸Mani yali n'abulao oyo yeesi owali naanyala ohubawonia olwohuba syali siri eyale muno neende Sidoni, haandi bali haba sibaholeganaangaho neende omuundu wuundi yeesi. Syali nisiri mu hooho lyali elya Bbeetirehobbu. Mani boombaha buyaaha esiko esyo baasimenyamo.

²⁹Bakaluuhania eliita lyasyo ohutula hu Laisi lyaaba Daani, ohweema hu Daani kuuka yaabwe, owali omwaana wa Yakobbo.

³⁰Bulaanu Abadaani bano beemao boombaha esiloongaloongwe esyo, mbwe sibe nisyo si bahoyere ohwiinamiraanga, mani Yonatani, omwaana wa Gerisoni haandi omwiichuhulu wa Musa, yaaba niye owaholaanga koti omulaamisi w'Abadaani, mani abeechuhulu bae nibo bosi abaholaanga koti abalaamisi baabwe, ohwoola esiha si baandu abo beecha baawaambwa, mani baachia ohumenya mu buwaambe.

³¹Mani esiloongaloongwe sya Miika sino nasyo syadoong'a sa abweene ao esiha syoosi si Yeema li Nasaae yenamirwaangamo lyadoong'a niliri mu Silo.