Read saamia Abakayi 19 Bible Online

Abakayi 19 - saamia bible

Abakayi 19

¹Mu ndaalo echio, Yisiraeli ni syali nisitaaba neende omutuki mwiihase, yaliwo Omuleefi wali niyamenya ematyeelo mu syaalo sy'ebigulu-gulu esya Efuraimu. Oyo yeemao yadeehya omuhasi ohutula mu Bbetilehemu mu Yuda ohuba omuhasi wae w'erwaanyi.

²Nae omuhasi oyo yamunyoolerera, mani yaaloba yaakobolayo ena daala wa laatang'ene mu Bbetilehemu, mani yehalayo ohumala embaka y'emyoosi kine emilaamba.

³Ao bulaanu wamwe yaheengao ohumuloondaho achie amuserere anyale ohumukobolaho. Yabukula omuhalaabani wae mulala, alala neende esuhiri chibiri mani yachaayo. Niyoolayo, omuhasi oyo yeekesa Omuleefi oyo ati yeengire mu nyuumba bweene. Mani laatang'ene niyeecha yamuubbyaho sa emoni ati, yamuheesa neende amaofu muno.

⁴Simwaana oyo yamwekweeda ati adoong'e sa ebweene eyo, mani yesi yaakanya ohwiihala nabo hulw'embaka y'endaalo chidatu. Omuleefi oyo neende omuhasi oyo boombi baliraanga sa alala ebyohulya haandi bakonaanga alala.

⁵Mani echuli-chuli y'oludaalo lwali olwae lwohune ohumala eyo, bewuunira ohusiingira nibeetekeha ohuwaao. Nae laatang'ene muhasi oyo yaboolera omuleefi oyo ati, “Liindaho mberi olyeeho esiindu hu mumale muweeo. Ao oba ochia ohweulira bulai ohuhirahoo, hu munyale luunyuma ohuwaao.”

⁶Mani katyo abasaacha abo boombi beemao beehala alala mani baalya, haandi baamala baang'wa. Nibamala batyo, laatang'ene muhasi oyo yamuboolera ati, “Ewe nookanya, kona sa haandi ano mani wemeede sa ohwesangasaanga.”

⁷Nae Omuleefi oyo yeecha yasiingira sa ati aweo, nae laatang'ene muhasi wae oyo yemeeda sa ohumwekweeda ati adoong'e sa, mani yeesi yeemao yaakanya sa, yeeyalisa eyo oludaalo luundi.

⁸Mani nibwahya echuli-chuli y'oludaalo lwa hataanu, yasiingira yachaaka okukeendo lw'ohuwaao, nae haandi laatang'ene muhasi wae oyo yaboola ati, “Haandi kanya olyeeho esiindu mberi. Liindaho siyalale mberi.” Haandi abasaacha abo boombi baakanya badoong'a baliira alala.

⁹Mani omusaacha oyo, omuhasi oyo, alala neende omuhasi w'erwaanyi oyo, beemao haandi bachaaka olukeendo ohuwaao, nae haandi saabwe oyo yaboola ati, “Boneho, ngaandi mbano bumalire ohwiira hane; munyala sa haandi mweeyalisa ehabi liindi. Ngandi bwiicha ohwiira sa bwaangu; doong'e ano mwemeede ohwesangaasa sa. Mani muchuli munyala mwawuuna ohusiingira, mani mwetaaho olukeendo lweeng'we mwaakobola engo.”

¹⁰Nae Omuleefi oyo yahaya ohukona ehabi liindi ao; yasiingira sa yaamala yeweerao, yakeenda ohwoola lu yoola abuundu atiingaalire Yebbusi (mbwe Yerusalemu). Yali asisiiri sa neende esuhiri chae chibiri chira echakingaanga ebiindu byae, naali neende omuhasi w'erwaanyi wae oyo.

¹¹Mani nibali nibasuda ohwoola aambi neende Yebbusi, oludaalo lwali nilumalire ohuweerera elalira, mani omuhalaabani oyo yaboolera omwaami wae oyo ati, “Ewe bulaanu, yicha hukabuhe hwiingire mu siko sino esy'Abayebbusi, mani hunyalirwe ohukona mu bweene omwo.”

¹²Nae omwaami wae yaamuboolera ati, “Efwe haba sihuchia ohukabuha hwiingire mu siko sy'abaandu bateende abo, abataali balala hu baandu ba Yisiraeli daawe; nae huchia ohwemeeda mu moni, ohwoola lu huchia ohwoola mu Gibbeya.”

¹³Nae yaboolera omuhalaabani wae oyo ati, “Ewe yicha sa, mani husude abuundu ano, mani hunyale ohukona mu Gibbeya, oba mu Rama.”

¹⁴Mani katyo, beecha baabita aambi neende Yebbusi, mani bemeeda ohukeenda nibawaao sa. Elyuuba lyali nilimalire ohukwa, nibanyala ohwoola mu Gibbeya mu situundu sy'esyaalo sy'enono ya Bbenjamini.

¹⁵Mani bakabuha baatula hu ngira, mani baachia bati bakone mu bweene omwo. Beecha baanyala ohwiingira mu siko omwo, mani baachia beehala mu sipaapi siwuluuhirwaangamo esy'omusiko omwo, nae abulao omuundu yeesi oweyaanayo obubasangaalira bachie engo wae bakoneyo esiro esyo daawe.

¹⁶Mani nibali bali abweene ao, omusaacha mukofu wuundi yaba koti obitira aambi ao owali n'ali koti owiinuha n'amalire omulimo kw'oludaalo olulaamba mu mukuunda okwo. Nae yali niyamenyaanga mu syaalo sy'ebigulu-gulu esya Efuraimu, nae esiha sino yali niyamenya mu Gibbeya. (Abaandu baandi bali nibamenya mu siko omwo bali nibatulaanga mu nono ya Bbenjamini.)

¹⁷Omusaacha mukofu wuno yeecha yamanyiirisa abaandu bakeesi bali nibali mu sipaapi muno mani yaabateeba ati, “Eng'we mutula yeena bweene? Nae muchia yeena bweene?”

¹⁸Omuleefi wuno nae yamukobolamo ati, “Efwe hubereenge nihuli mu Bbetilehemu mu Yuda, nae bulaanu huli hu lukeendo lweefwe hukobola engo weefwe, emwaalo bweene mu syaalo sy'ebigulu-gulu sya Efuraimu. Nae abulao omuundu yeesi onyalire ohukanya ohutukonia kata esiro silala syoong'ene,

¹⁹kata neende nihuli neende enyaasi neende ehaanja by'esuhiri cheefwe abeene, haandi neende emigaati alala neende efiini, eby'omuhasi waange, naange neende omuhalaabani waange mweene. Huli neende buli siindu syoosi esy'ohwehoonyera fweesi.”

²⁰Nae omusaacha mukofu oyo yaboola ati, “Ese naange mbasangaalira engo waange! Njia ohubaliinda bulai; mani haba simuhoyere ohumala esiro syoosi mu sipaapi syomu siko muno sino sa.”

²¹Yababukula yaabayira engo wae, mani yaanyala ohuliisa esuhiri chaabwe echio, choosi. Abakeni bae abo nabo beecha baanyala ohweyosaho amakulu, baamala baalya neende ebyohulya byeene.

²²Bulaanu bali nibali ohwesangasaanga, abaandu bali nibanala obuyiranaanga ohutula mu siko bweene omwo, nibabafuduhaho, nibamalire ohwebodoohania enyuumba eyo yoosi, mani nibachaaka ohuhong'oonda hu lwiiki. Babooleraanga omusaacha mukofu oyo bati, “Tusa erwaanyi bwaangu omusaacha wiichire nawe oyo! Hudaha ohumukona!”

²³Nae omusaacha mukofu oyo yaatula sa erwaanyi mani yaababoolera ati, “Haba bbe, beecha baange nibo! Muhole obukanye! Mutahola esiindu sibi syakiire ao sityo, esiindu sy'omukwoobo esyo! Omusaacha wuno mukeni waange niye.

²⁴Mani boneho! Omuhasi wae w'erwaanyi nguno ali ano alala neende omuhaana waange otamanyireho eby'abasaacha. Leha njie mbatuse erwaanyi bambaleetere, mubakone. Mubahole koti lu mudaha abeene. Nae mutaholaho omusaacha wuno esiindu sibi syakiire ao sityo!”

²⁵Nae abasaacha abo haba sibamutekeeresaho kata nabudiidi. Mani Omuleefi oyo yeecha yaatusa omuhasi wae w'erwaanyi oyo mani yaababeresa. Beecha mani baakwa hu muhasi oyo, bamusaandya esiro syoosi, baahaya ohuleheraho ohwoola lu bwahyeera elalira echuli.

²⁶Mani mu mabwiibwi, omuhasi oyo yaakwa aasi mu mulyaango kw'omusaacha mukofu oyo, abuundu yi mwaami wae yali naali. Mani yaba abweene ao ohwoola lu lyuuba lyaatula.

²⁷Mani wamwe oyo yasiingira echuli eyo, mani yeekulao olwiiki ohuwaao, yakaana omuhasi wae w'erwaanyi oyo naakonere mu moni w'enyuumba eyo, amahono kae nikadiirire hu lwiiki.

²⁸Yaboola ati, “Ewe siingira weeme. Leha sa huweeo.” Nae haba siyawuliraho omuundu yeesi n'amukobolamo. Yakiinga omubiri kw'omuhasi wae w'erwaanyi okwo, yaakwaalisa hu mukoongo kw'esuhiri yae ndala, yaachaaka olukeendo lukobola engo wae.

²⁹Niyoola engo, yaachia yeengira mu nyuumba yae, yaabukula ehaande. Yabukula omubiri kw'omuhasi wae w'erwaanyi okwo, mani yaakudonyadonyamo ebituundu ehumi neende bibiri, mani yaakaba buli situundu silala, buli nono y'enono ehumi neende chibiri echa Yisiraeli.

³⁰Mani buli muundu wabonaangaho esituundu esyo yaboolaanga sa ati, “Efwe haba sihuwuliraangaho esiholwa sifwaana siti daawe! Abulao esiholwa sifwaanaho siti esyaholehanaho ohutula Abaisiraeli nibatula mu Misiri! Mani huhoyere ohuholaho esiindu fweesi hu siholwa sino! Nae hunaahole siholwa siina syeene?”