Read saamia Abakayi 20 Bible Online

Abakayi 20 - saamia bible

Abakayi 20

¹Abaandu boosi aba Yisiraeli, ohutulira elalira hu Daani emukulu bweene, ohwoola hu Bberisebba emwaalo bweene, haandi ohutulira elalira hu syaalo sya Gileadi ebukwe bweene, bakobolamo omulaanga okwo. Bebuusa alala koti esitole silala mu moni w'Omwaami mu Misipa.

²Abeemirisi b'enono choosi echa Yisiraeli chaliwo muluhung'aano luno olw'abaandu ba Nasaae, mani boola abanamaye bakeenda neende amakulu, elifu emia chine (400,000).

³Esiha syeene sino, abaandu ba Bbenjamini bosi beecha baawulira bati, Abaisiraeli baandi basyaabwe boosi bali nibahung'aniire mu Misipa. Mani Abaisiraeli bano beteeba bati, “Ewe tuboolereho, obusuku buno bweecha bwoola ohuholehana buti butye?”

⁴Mani Omuleefi mweene omuhasi w'erwaanyi owoola yeetwa yaakobolamo ati, “Omuhasi w'erwaanyi waange wuno alala naange, hwachia mu Gibbeya mu syaalo sya Bbenjamini ohukonayo.

⁵Abasaacha ba Gibbeya bebuusa alala baanjichira ohuumbukula, beebodoohania enyuumba yi ndalimo esiro esyo. Bali nibaanjichiire ohuunjita-bwiita; nae, baakwa hu omuhasi w'erwaanyi waange oyo, mani boola ohumwiita.”

⁶Mani ese omweene ndabukula omubiri kw'omuhasi waange w'erwaanyi, mani ndaakudonya-donyamo ebituundu, mani ndaakaba buli situundu silala buli nono ndala hu nono ehumi neende chibiri echa Yisiraeli. Mani abaandu bano batuholamo esiindu sy'omukwoobo muno, haandi esyonoono sibitiirifu.

⁷Eng'we mweesi abali ano, muli Abaisiraeli beene liita. Mani siindu siina syeene si efwe hunyala hwaahola esichiira hu siholwa sino?

⁸Abaandu abo boosi mani baaluuluha basiingira beema mani baboolera alala bati, “Abulao omuundu kata mulala hu efwe, oba owamenya mu yeema sa oba mu nyuumba enyoombahe, ochia ohukobolayo engo wae daawe.

⁹Mani sino nisyo esiindu sihuchia ohuhola: huchia ohuubba eha mani hunyale ohudoola abasaacha ababa bachia ohuseeta Gibbeya.

¹⁰Silala sy'ehumi esy'abasaacha bali mu Yisiraeli bachia ohuubba ebyohulya by'eye, nae abadoong'ereo boosi nibo abachia ohusaandya Gibbeya hulw'esiholwa sy'omufuto syakiire ano siti, sibaaholere mu Yisiraeli.”

¹¹Mani abasaacha boosi mu Yisiraeli beemao beehung'aania alala neende esichiiririrwa silala syoong'ene, ohuseeta esiko esyo.

¹²Enono ch'Esiyisiraeli cheemao chaatuma bawamwaanda ohuchia ohusalaanira mu syaalo sy'enono ya Bbenjamini syoosi ohuboolaanga bati, “Butemo siina buno bu eng'we mwoola ohuhola?

¹³Mani bulaanu mukisuleyo muyaaneyo abasaacha abakosoobania enjirana boosi abali mu Gibbeya, hunyale ohubeeta, hu humale esyonoono sino hu Yisiraeli.” Nae abaandu ba Bbenjamini nabo haba sibadeebayo hooho hu Baisiraeli basyaabwe abo daawe.

¹⁴Ohutula mu biko byoosi ebya Bbenjamini, abaandu boosi beeyiha baatulayo beecha mu Gibbeya ohulwaania abaandu ba Yisiraeli.

¹⁵Beecha bahung'aania abanamaye elifu amahumi kabiri neende chisaasaba (26,000), ohutula mu biko ebyo ludaalo olwo.

¹⁶Haandi ohumeeda ohwo, abaandu ba Gibbeya banyala ohuhung'aania abanamaye badoolwa nibeehaliiriswa, emia chitaanu-na-chibiri (700), abemihono mikaada. Buli mulala hu beene bano yali omusaacha onyala yaalasa ekina neende omuruuta, yaanyala ohuhuya olufwiiri lulala lwoong'ene yaahaya ohusuba daawe.

¹⁷Haandi nootabaliireho enono ya Bbenjamini, enono cha Abaisiraeli cheemao chaahung'aania alala ab'amaye bahahaswa elifu emia chine enaamba (400,000).

¹⁸Abaisiraeli beemao baachia abuundu wohwiinamiraangamo Nasaae mu Bbeteli, mani baanyala ohuteeberayo Nasaae bati, “Nono siina yeene eyihoyeere ohutaangira ohuseeta Ababbenjamini?” Nae Omwaami yabakobolamo ati, “Ngaandi ni enono ya Yuda sa.”

¹⁹Mani nibwahya muchuli, Abaisiraeli batula mani baachia boombaha ekaambi yaabwe aambi neende esiko sya Gibbeya.

²⁰Bali nibachiire ohuseeta eye lya Bbenjamini, mani baatekeha abanamaye abuundu alingalaane neende esiko esyo.

²¹Mani eye lya Bbenjamini lyeecha lyaatula mu siko omwo, mani kata oludaalo nilwali nilutaawa, bali nibamalire ohwiita abalwaani Baisiraeli elifu amahumi kabiri (20,000).

²²Nae kata katyo, abasaacha ba Yisiraeli, baanyala ohwomiira, haandi baanyala ohuta esilwaaniro abuundu bweene ao, yi bali nibateere oludaalo lwachaaka.

²³Haandi abaandu ba Yisiraeli bachia mani baalirira mu moni w'Omwaami ohwoola elyuuba lu lyakwa; mani haandi beteeba eyiri Omwaami bati, “Mani haandi hunyala hwaachia aambi neende abaana beefwe bano Ababbenjamini mbwe hulwaane nabo ehabi liindi, kose?” Haandi Omwaami yabakobolamo sa n'aboola ati, “Eng'we muchie-buchia mubalwaanie.”

²⁴Mani abaandu ba Yisiraeli baseeta ehabi lyohubiri eye ly'Ababbenjamini.

²⁵Haandi ehabi lyohubiri, Ababbenjamini batula mu Gibbeya, nae hu luno baanyala ohwiita abalwaani bahahaswa Abaisiraeli elifu ehumi neende chitaanu-na-chidatu (18,000).

²⁶Mani haandi abaandu ba Yisiraeli baachia baniina ohwoola mu Bbeteli mani baalirira ebweene eyo. Bachia mani beehala mu moni w'Omwaami mani baahaya ohulya ohwoola lu bwiire bweera. Beecha baanyala ohuyaanayo ebiyaanwa by'ohukobola alala, haandi basaamba ebiyaanwa biindi ebilaambiriire bino byoosi nga babiholera mu moni w'Omwaami bweene sa.

²⁷Mani haandi abaandu ba Yisiraeli beteebaho haandi eyiri Omwaami (olwohuba endaalo echio, Esanduuku ly'Endagaano lya Nasaae lyali niliri ebweene eyo,

²⁸Finehaasi omwaana wa Eliasaari, omwaana wa Arooni, yali niye owali n'ahalaabaniraanga mu moni walyo mu ndaalo echio), mani n'aboola ati, “Haandi efwe hunyala hwaachia ehabi liindi hwalwaania abaana beefwe bano Ababbenjamini, kose hwaakamire ao?” Nae Omwaami yaboola ati, “Eng'we muchie-buchia; olwohuba muchuli, njia ohuyaana abeene abo mu mahono keeng'we.”

²⁹Mani Abaisiraeli baanyala ohukisa abalwaani baandi aambi neende Gibbeya.

³⁰Mani haandi hu ludaalo lwa hadatu lw'ohulwaaniraho, batula baachia ohuseeta eye lya Bbenjamini, mani baatekeha abalwaani baabwe bulai abuundu atingaalire Gibbeya, koti lu baholaanga sa buli lu bachichaanga.

³¹Ababbenjamini haandi batula mani baachia ohulwaana, mani baayirwa eyale muno ohutula mu siko syaabwe. Mani koti sa lu baholaanga, bachaaka ohwiitira Abaisiraeli baandi mu syaalo sy'esipaapi, hu ngira yichia mu Bbeteli, haandi hu ngira yichia mu Gibbeya. Beeta Abaisiraeli amahumi kadatu boong'ene.

³²Haandi Ababbenjamini bano beemao bachaaka ohuboola bati, “Ngandi haandi hunyalire sa ohubayiingira koti buli ludaalo.” Hane nae Abaisiraeli bali nibatekeehe ohweseenda mani banyale ohuhweesa Ababbenjamini ohubatusa mu siko syaabwe banyale ohubayira hu makira sa.

³³Mani eye ehuluundu lya Abaisiraeli nilyeecha mani lyehweesa lyaakobolayo enyuma mani lyaanyala ohwebuusira alala haandi mu Bbalitamari, abasaacha bali nibeekisire nibebodoohaanie Gibbeya baaluuluha mani beekisula beeruha nibatula yi bali nibeekisireenge mu syaalo sy'enyaanda esibodoohaanie esiko esyo.

³⁴Mani abasaacha beene elifu ehumi (10,000) abali nibadoolerwe ohutula mu Yisiraeli yoosi, bachia baaseeta Gibbeya, mani ohulwaana hwoomerana muno. Ababbenjamini haba sibeecha bamanyaho bati hane bali nibali aambi ohusihiriswa.

³⁵Omwaami yaberesa Abaisiraeli ohuyiingira mani bayiingira eye lyoosi elya Bbenjamini. Abaisiraeli hu luno banyala ohwiita abasuku baabwe bano elifu amahumi kabiri neende chitaanu (25,000),

³⁶mani Ababbenjamini boomiisa bati hane bali nibamalire ohuyiingirwa hale. Esituundu sihuluundu sy'eye ly'Abaisiraeli lyaanyala ohweseenda ohutula hu Ababbenjamini olwohuba bali nibeesikire abasaacha balwaani ba bali nibamalire ohukisa nibamalire ohwebodoohania Gibbeya.

³⁷Mani abasaacha bano nibo abaanguya ohwiiruha bwaangu nibachoomere mu Gibbeya; mani baachia baanyala ohusalaanira mu siko omwo baanyala ohwiita buli muundu yeesi owali naalimo.

³⁸Eye ly'Abaisiraeli ehuluundu neende abasaacha bali nibeekisire, beecha bataao ahalolero. Mani nibeecha baabona esireesi sihoongo esy'omwoosi nikuniooha nikuniina aakulu nikutulira mu siko omwo,

³⁹Abaisiraeli bali nibali mu sipaapi sy'ohulwaaniramo bali nibahoyere ohukaluuhana. Ohwoola esiha esyo, Ababbenjamini bali nibamalire ohwiita Abaisiraeli bala amahumi kadatu. Bachaaka ohweboola mbwe, “Ngandi haandi hane mbao humalire ohubayiingira sa koti endaalo chiindi ch'enyuma.”

⁴⁰Abweene ao niwo yi halolero aho haabonehera; esireesi sy'omwoosi syachaaka ohuniooha nisidumuuha nisiniina aakulu nisitulira mu siko omwo. Ababbenjamini nibatingaala enyuma, mani besiinduha ohubona mbwe esiko syaabwe syoosi syeduhuulireho omuliro siya.

⁴¹Mani ao Abaisiraeli boosi nibeecha nibakaluuhana, mani Ababbenjamini baakwa sa mu luteengo, olwohuba bamanya sa mbwe bali aambi ohusihiriswa.

⁴²Bosi beecha bachaaka ohweseenda ohutula eyiri Abaisiraeli, mani nibachaaka ohwiiruha nibachoomere mu syaalo sy'esipaapi, nae haba sibanyala ohweonia daawe. Badiiywa akatikaati w'eye ehuluundu neende abasaacha bali nibamalire ohusaamba esiko nibeeruha nibatuliremo nibeecha ohwaabina eye ehuluundu, mani baasihirisirwa abweene ao.

⁴³Abaisiraeli beemao baabona bati hane omusuku waabwe yali n'amalire ohudiiswa, baahaya ohweema, mani bemeeda sa ohuboongaho ohwoola abuundu w'ebukwe bweene ewa Gibbeya, nibabeeta nibachianakana nabo.

⁴⁴Elifu ehumi neende chitaanu-na-chidatu (18,000) echa abalwaani bahiramo obulai ab'Ababbenjamini boosi beetwa.

⁴⁵Abaandu badoong'ao bakaluuhanaanga mani nibamala nibeeruhaanga nibachoomere esyaalo sy'esipaapi sy'Olwaanda lwa Rimoni. Elifu chitaanu (5,000) beeterwa hu makira ako sa. Abaisiraeli bemeeda sa ohwoongaanga hu baandi bali nibadoong'ere ohwoola lu babosaanga mu Gidomu, haandi nibamalire ohubeetamo abalwaani elifu chibiri enaamba (2,000).

⁴⁶Ohuyirira alala, abalwaani balulu bahaya, elifu amahumi kabiri neende chitaanu (25,000). Ababbenjamini nibo abeetwa hu ludaalo luno lwoong'ene.

⁴⁷Nae abasaacha emia chisaasaba (600) boong'ene nibo abanyala ohwiiruhira mu syaalo sy'esipaapi sy'Olwaanda lwa Rimooni, mani baanyala ohuwonamo, baamenya ebweene eyo ohumala embaka y'emyoosi kine emilaamba.

⁴⁸Abaisiraeli beemao baakaluuhanira Ababbenjamini bali nibadoong'ereo baabeeta boosi, abasaacha, abahasi, neende abaana beene, neende ebisolo byeene byosi. Basaamba buli siko syoosi syali mu situundu esyo.