Read saamia Abakayi 21 Bible Online

Abakayi 21 - saamia bible

Abakayi 21

¹Mani Abaisiraeli nibeecha bahung'aanira mu Misipa, bali nibamala ohuchwichwiisa esisuubise eyiri Omwaami bati: “Abulao oyo yeesi mweefwe ochia ohukanyaanga Omusaacha Mubbenjamini yeesi ohudeehyaanga omuhaana weefwe yeesi.”

²Mani ao abaandu ba Yisiraeli bachia mu Bbeteli mani beehala ebweene eyo mu moni wa Nasaae ohwoola engoloobe. Balichiingi ebweene eyo nibalira nibehuuma neende esasaakisi ely'amaani bati:

³“Ewe Omwaami Nasaae wa Yisiraeli, lwasiina sino syeechere syakwaao siti? Lwasiina enono ya Bbenjamini yiri aambi ohusihirira ohuwa mu Yisiraeli?”

⁴Mani mu mabwiibwi nibwahya echuli, abaandu basiingira mani baachia boombaha alutaari abweene ao. Bayaana ebiyaanwa by'ohukobola alala, haandi basaambaanga ebiyaanwa biindi bilaambiriire.

⁵Beteebaanga bati, “Eng'we mani yirihooyo omukaanda kwoosi ohutula mu nono choosi echa Yisiraeli okuta nyalire ohuchia muluhung'aano lwali mu moni w'Omwaami mu Misipa, kose?” (Bali nibamala ohweechuba bati, oyo yeesi otaali naanyalire ohuchia mu Misipa, achia ohwiitwa-bwiitwa.)

⁶Nae abaandu ba Yisiraeli beecha bakwiira esisa Ababbenjamini abaana baabwe mani baboola bati, “Nyaanga yino Yisiraeli yinyalire ohufwiirwa enono yaabwe yiindi, ohutula hu nono chalwo chiindi echo.

⁷Hunaahole siina syeene hu hwaanyala ohufunira abasaacha ba Bbenjamini badoong'a abahasi ohudeehya? Efwe mbao hwamala ohuchwichwiisa esisuubise eyiri Omwaami huti haba sihuchia hukanya ohubaberesaho omuhaana weefwe yeesi ohudeehya.”

⁸Mani nibateeba ohumanya niyali naaliwo omukaanda kwoosi okutula mu nono cha Yisiraeli choosi, okutanyala ohuchia muluhung'aano lwali mu Misipa, bafuumbula bati hane yali abulao oyo yeesi ohutula mu nono ya Yabbesi mu Gileadi owali nataanyalire ohubonehana hooyo;

⁹ohweema hu muhunu kw'eye, yali naabulao kata mulala ohutula hu Yabbesi owali niyanyala ohwiiruhirira omulaanga okwo daawe.

¹⁰Mani omuhung'aano okwo kwatuma abasaacha baabwe bahiramo obululu, elifu ehumi neende chibiri (12,000), neende ebilagiro bino biti, “Chie mani mwiite buli muundu yeesi oli mu Yabbesi, noyiriramo alala neende abahasi boosi neende abaana beene boosi.

¹¹Mwiite abaandu b'esisaacha boosi, haandi neende buli muhasi yeesi owamala ohumanya eby'abasaacha.”

¹²Mani bachia banyoolayo abahaana bayere abali nibataamanyaho eby'abasaacha emia chine (400), abali nibamenya mu Abayabbesi, mani baabaleeta mu kaambi mu Silo, esiri mu syaalo sya Kanani.

¹³Mani omuhung'aano okwo kwoosi kwatuma emboosi eyiri Ababbenjamini abali nibamenya mu Lwaanda Rimoni, mani baasaba baakamie ebiita ebyo.

¹⁴Ababbenjamini beemao bosi bafukiirira mani baakobola engo, mani Abaisiraeli basyaabwe bala baanyala ohubaberesa abahaana bayere abo ohutula mu Abayebbusi ba bali nibateeta. Nae haba sibali nibabamala boosi daawe.

¹⁵Haandi abaandu beecha bakwiira esisa Ababbenjamini olwohuba Omwaami yali n'amalire ohuhalaka obulala bw'enono cha Yisiraeli.

¹⁶Mani abeemirisi b'oluhung'aano olwo beecha baboola bati, “Yibulayo abahasi abaandi mu nono ya Bbenjamini yoosi. Hunaahole siina syeene hu hunyale ohunyoolera abahasi abasaacha badoong'ere bano?

¹⁷Yisiraeli haba siyihoyere ohukosaho kata enono ndala hu nono chayo ehumi neende chibiri chino. Huhoyere ohunyoola engira yi hunyala hwaholeramo enono ya Bbenjamini yaanyala ohubaao,

¹⁸nae haba sihunyala hwabakanya ohudeehya abahaana beefwe daawe, olwohuba hwamala ohutaao esibwaabo hu oyo yeesi okanya Omubbenjamini ohudeehya omuhaana yeesi hu bahaana beefwe boosi.”

¹⁹Mani beecha baanyala ohwiichulisa bati, “Esidyaalo sya buli mwaaka okw'Omwaami mu Silo syali nisiri aambi ohwoola.” (Silo yali niyiri emukulu wa Bbeteli, haandi niyiri emwaalo bweene wa Lebbona, nae haandi ebukwe w'engira yiri akatikaati wa Bbeteli neende Sekemu.)

²⁰Baboolera Ababbenjamini bati bachie beekise mu ndalo ch'emisabbiibbu

²¹mani babe meeso. Mani abahaana bayere ba Silo nibaba nibatula erwaanyi ohuhina mu siha sy'esidyaalo esyo, muba muchia ohwekisula mutule mu mikuunda omwo. Mani buli mulala hweeng'we anyale ohwehweesera neende amaani kae omuhasi ohutula mu bahaana abo, mani anyale ohukobola nae engo waabwe mu syaalo sya Bbenjamini.

²²Mani basaabwe oba bamboocho yaabwe nibeecha beecha yi muli, muba muchia ohubabooleraanga sa muti, “Mukanye sa humenye naang'we, olwohuba efwe haba sihwabahweesa nihuli mu biita naang'we ohuba abahasi beefwe daawe. Haandi koti lu mutatubereese eng'we abeene, haba simuba nimuliho omusaango okw'ohuhalaka esisuubise syeeng'we daawe.”

²³Mani abasaacha Ababbenjamini beemao baanyala ohuholaanga batyo sa; buli mulala hu nibo yedooleraanga omuhasi ohutulaanga mu bahaana bayere abo, abalichiingi nibali ohuhinaanga mu Silo, nibabakiingaanga nibawaao nabo. Mani batyo beemao baanyala ohukobolaanga mu syaalo sy'ewaabwe, mani boombahaanga ebiko byaabwe buyaaha, haandi bachaaka ohubimenyaangamo.

²⁴Haandi esiha syeene esyo, Abaisiraeli bali nibadoong'ereo bosi bawechaangao, mani buli muundu yaanyala ohwekoboleraanga ena enono yae, neende edaala lyae, haandi hu sihirano yae.

²⁵Yali n'abulao omutuki mwiihase yeesi mu Yisiraeli esiha sino siti. Buli otula yaholaanga sa esiindu syamusangasaanga.