Read saamia Abakayi 3 Bible Online

Abakayi 3 - saamia bible

Abakayi 3

¹Mani sakira Omwaami yeemao yaalehaho enono chiindi chadoong'a mu syaalo sya Kanani, ohuteemaanga Abaisiraeli bali nibatalwaanaho ebiita byali mu Kanani.

²Yahola atyo hwaanyale ohweekesa buli lwiibulo lw'Abaisiraeli, ebidiira hu biita, ohuhirira elalira abo abali nibatalwaanaho ebiita hale.

³Mani enono chali nichalehwa mu syaalo omwo chali, enono ch'ebiko bitaanu echa Abafilisiti, Abakanani boosi, Abasidoni, neende Abahiifi abali nibamenya mu Ngulu cha Lebbanooni, ohutula hu Lugulu lwa Bbaali Hamoni, ohwoola hu Hamati Paasi.

⁴Enono chino nichio echali nichichia ohubeechaanga ebiteemo eyiri Yisiraeli, ohumanya Abaisiraeli nibanyala boola ohwisaanga oluyaali mu bilagiro bi Omwaami yali niyaberesa bakuuka yaabwe ohubitira mu Musa, oba haba daawe.

⁵Mani sakira abaandu ba Yisiraeli boola ohumenya mu Abakanani, Abahiiti, Abaamoori, Abaperisi, Abahiifi, haandi neende Abaebbusi.

⁶Beemao bachaaka ohudeehisanianga nabo neende ohwiinamiraanga banasaae baabwe.

⁷Abaandu ba Yisiraeli bano haandi boola beebirira Omwaami owali Nasaae waabwe; bonoona mu moni wae, mani bachaaka ohwiinamiraanga ebiloongaloongwe bya Bbaali neende Asera.

⁸Mani Omwaami yesi yanyoolerera muno Yisiraeli yoola ohuleha Omutuki Kusani Risataimu owa Mesopotamia ohwiicha ohubayiingira. Baba aasi wae hulw'embaka y'emyaaka kitaanu-na-kidatu.

⁹Mani ao, Abaisiraeli boobba wuuwi eyiri Omwaami, mani yesi yaatuma omuundu wuundi ohwiicha ohubanunula. Omundu wuundi wuno yali niye Otinieli, omwaana wa mwaanang'ina Kalebbu omuyere owali n'alaangwa Kenasi.

¹⁰Mwooyo w'Omwaami yamwiihaho, mani yeehola ohuba omwiimirisi wa Yisiraeli. Otinieli wuno yaatula yaachia mu biita, mani Omwaami yesi yaamuhoonya yayiingira omutuki wa Mesopotamia.

¹¹Mani omuleembe kwabaao mu syaalo sya Kanani esyo ohumala embaka y'emyaaka amahumi kane, ohwoola lu Otinieli yesi yaafwa.

¹²Abaandu ba Yisiraeli haandi beemao bonoona mu moni w'Omwaami. Mani ohweema hu sino, Omwaami yaahola Omutuki Egilooni owa Moabbu ohuba ow'amaani maangi muno ohuhiraho Yisiraeli yoosi ayaakiriire.

¹³Egilooni yeyambaania hu Abaamooni neende Abamaleki; bano boosi mani balwaania Yisiraeli baanyala ohuyiyiingira, baamba Yeriko, esiko syali syamanyihana koti esy'emisaala minaasi.

¹⁴Mani Abaisiraeli haandi baaba aasi wa Egilooni ohumala embaka y'emyaaka ehumi neende kitaanu-na-kidatu.

¹⁵Haandi Abaisiraeli beemao boobba wuuwi eyiri Omwaami, mani yesi yeecha yaatuma omuundu wuundi haandi ohwiicha ohubanunula. Omundu wuundi wuno yali niye Ehudi, omusaacha wali ow'esikaada, owali omwaana wa Gera, ohutula mu nono ya Bbenjamini. Mani abaandu ba Yisiraeli baatuma Ehudi wuno ohuchia eyiri Omutuki Egilooni owa Moabbu, namukingiire ebiyaanwa biingi.

¹⁶Nae Ehudi wuno hane yali niyamala hale ohweyitaanyira olugaanga luliho obwooki enyaande choombi, olwali niluli seetimiita amahumi kataanu obuleeyi. Yali niyaluboya hu lwaande lw'omuhono muluungi mu ngubo chae chi yali niyefwaalaanga.

¹⁷Bulaanu ao, Ehudi yesi naakanya ohuyirira Egilooni ebiyaanwa ebyo, owali naali okusaacha kuhomefu muno.

¹⁸Mani Ehudi niyali n'amalire ohumudiisa ebiyaanwa ebyo, Egilooni yaboolera abasaacha bali nibakiingireenge ebiyaanwa ebyo ohuwaao ohukobola engo waabwe.

¹⁹Nae Ehudi mweene yeemao yaakodohera abuundu w'amakina mabaache, aambi neende Giligaali, mani yaakobola eyiri Egilooni, yaamuboolera ati, “Ewe ow'Obunyala bwoosi, ese ndiho neende emboosi yao y'engiso ohuhuboolera.” Mani omutuki oyo yeemao yaalagira abahalaabani bae ati, “Eng'we mutule erwaanyi mutuleheho hube fweembi fweeng'ene!” Mani boosi baatula, bawaao baabaleha boong'ene.

²⁰Koti lu mutuki oyo yali niyehaale ao yeeng'ene mu siseenge syae sinyifu esiri hu sirama, Ehudi yasuda yaali, yaamuboolera ati, “Ese mbano ndi neende emboosi yao eyitula eyiri Nasaae.” Omutuki oyo yasiingira yi yali niyehaale.

²¹Ehudi yehoonyera omuhono kwae mukaada okwo, mani yaatusa olugaanga lwae, olwali hu lwaande lw'omuhono muluungi, yalufumita mu nda y'omutuki oyo.

²²Olugaanga olwo lwoosi lwaamuhamiramo, esilaalo syeene neende olugaanga lweene byoosi, mani amasinya nikalubwiihaho. Ehudi haba siyaluchomola mu nda y'omutuki oyo daawe, mani lwaafudulira emukoongo, akatikaati mu makulu kae.

²³Ao bulaanu Ehudi yatula mu siseenge omwo, niyeekalira enyuma wae enjiki, mani n'achifuungao,

²⁴niyeweerao. Abahalaabani nibakobolayo, baabona enjiki nichiri enjikale sa, babaasa bati omutuki waabwe yali sa naali mukati naali ohwewuluusanga.

²⁵Baliindaho esiha si bali nibamanyire bati nisyo si bahoyere ohuliinda, mani nibabona bati haba siyali niyeekulao olwiiki, bachia baabukula olufuunguo mani abeene baalwiikulao. Mani ao batyo nilwo lu mwaami waabwe yali naali, n'alambaalire mu bweeru n'afwiire.

²⁶Ehudi yanyala ohweyiba yawaao nibali nibasiliindireenge. Yachia yaabitira eyiri amakina mabaache, naamala niyeeruhira mu Seyira.

²⁷Mani niyoola eyo, mu syaalo sy'ebigulu-gulu, esya Efuraimu, yoobba eturumbete n'alaanga abaandu ba Yisiraeli batule bachie ohulwaana ebiita; mani yabeemirira yabeehirisa aasi w'ebigulu ebyo.

²⁸Yababoolera ati, “Eng'we munoondeho sa! Omwaami amalire ohubaberesa ehabi ohuyiingira abasuku beeng'we, Abamoabbu.” Mani bosi baloonda sa Ehudi, nibeehirira aasi ohwoola lu bachia baanyala ohuwaamba abuundu yi Abamoabbu bali nibachia ohwaambuhira Yorodaani; mani haba sibakanya kata mulala yeeng'ene ohwaambuha daawe.

²⁹Mani hu ludaalo olwo lwoong'ene, Abaisiraeli baanyala ohwiita aambi elifu ehumi (10,000) ech'abanamaye bahiramo obulai Abamoabbu; abulao kata mulala hu nibo owawonamo daawe.

³⁰Hu ludaalo olwo Abaisiraeli banyaliraho ohuyiingira Moabbu, mani omuleembe kwabaao mu syaalo syaabwe ohumala embaka y'emyaaka amahumi kataanu-na-kadatu.

³¹Bulaanu, omutuki waloondaho yali niye Samiga omwaana wa Anaati. Wuno yesi yanyala ohununula Yisiraeli, nae yahola atyo naabitira mu hwiita Abafilisiti emia chisaasaba (600) enaamba niyehoonyera sa olubbariki lulimya endaawu.