Read saamia Abakayi 4 Bible Online

Abakayi 4 - saamia bible

Abakayi 4

¹Ehudi niyamala ohufwa, abaandu ba Yisiraeli haandi bonoona mu moni w'Omwaami.

²Mani Omwaami yesi haandi yaabaleha bayiingirwa neende Yabbini, omutuki Mukanani owali naatukira mu siko sya Hasoori. Omuhoongo w'eye lyae yali Siseera, owali niyamenya mu Haroseeti-sya-Abateende.

³Yabbini yali neende ebigaari by'ebichuma by'efaraasi emia chitaanu-na-chine (900), mani yaanyala ohutuka abaandu ba Yisiraeli neende obwaalaba neende esirifu hulw'emyaaka amahumi kabiri. Mani haandi abaandu ba Yisiraeli boobbera Omwaami wuuwi yeeche abahoonye.

⁴Nae bulaanu, Debboora, omuhasi wa Lapidoti, yali naali nabbi, n'aholaanga koti omukayi w'Abaisiraeli esiha syeene esyo.

⁵Yeehalaanga mu siiniha sy'omusaala munaasi akatikaati wa Rama neende Bbeteli mu syaalo sy'ebigulu-gulu esya Efuraimu, mani abaandu ba Yisiraeli nibeechaanga ebweene eyo ohukerakwa.

⁶Mani ludaalo luundi yeemao yalaanga Bbaraki omwaana wa Abbinoamu ohutula mu siko sya Kedesi esiri mu Nafutaali mani yaamuboolera ati, “Omwaami, Nasaae wa Yisiraeli, ahubereese esilagiro sino ati: ‘Chia mani obukule abasaacha elifu ehumi (10,000) ohutula mu nono cha Nafutaali neende Sebbuluuni mani obeemirire bachie hu Lugulu lwa Tibboori.

⁷Ese mbao njia ohuleeta Siseera, omuhoongo w'eye lya Yabbini, ahulwaanisire hu Mwaalo Kisoni. Achia ohuba neende ebigaari haandi neende abanamaye, nae ese njia ohuhuhoonya onyale ohumuyiingira.’ ”

⁸Mani Bbaraki yaakobolamo ati, “Ese njia ohuchia nikali mbwe wesi ochia ohukanya ohuchia naange, nae ewe n'otachia naange, syeesi haba siimba niinjia ohuchia daawe.”

⁹Debboora nae yamukobolamo ati, “Ebyo byoosi bilai sa, ese njia ohuchia naawe, nae ewe haba soochia hunyoolaho ahasiimo hoosi daawe hu huyiingira, olwohuba Omwaami aba achia ohudiisa Siseera mu mahono k'omuhasi.” Mani Debboora yaatulaniramo ohuchia Kedesi naali alala neende Bbaraki.

¹⁰Bbaraki yeemao yalaanga enono cha Sebbuluuni neende Nafutaali choosi chaachia mu Kedesi, mani abasaacha elifu ehumi (10,000) abo boosi baamuloondaho. Debboora yesi yachiana nae alala.

¹¹Nae esiha syeene esyo, Hebberi Omukeeni yali n'amalire ohwoombaha eyeema lyae aambi neende Kedesi, haandi aambi neende omutuumba okwali abuundu alaangwa mbwe Sananiimu. Yali n'amalire ohweyaaba ohutulaho hu Abakeeni baandi, abali abeechuhulu ba Hobbaabbu, owali mboochoong'ene omuhasi wa Musa.

¹²Mani Siseera niyamanya ati hane Bbaraki yali n'amalire ohuniina ohuchia hu Lugulu lwa Tabboori,

¹³yaatusayo ebigaari byae bira emia chitaanu-na-chine (900), alala neende abasaacha bae boosi, mani naabatusa mu Haroseeti-esya-Abateende ohuchia hu Mwaalo Kisoni.

¹⁴Bulaanu Debboora yeemao yaboolera Bbaraki ati, “Ewe chia buchia! Omwaami niye ohwimiriire! Leero luno, Omwaami amalire ohuhuhoonya ohuyiingira Siseera.” Mani katyo, Bbaraki yetaaho ohwiihirira ohutula hu Lugulu lwa Tabboori alala neende abasaacha bae bala elifu ehumi (10,000).

¹⁵Mani koti lu Bbaraki yali n'aseeta neende eye lyae, Omwaami nae yata obudoondobanu mu Siseera alala neende ebigaari byae byoosi haandi neende abasaacha bae boosi. Siseera yeeha hu faraasi yae mani yeyiruhira niyeweerao neende amakulu sa.

¹⁶Bbaraki nae yoonga hu bigaari neende eye lyeene ohwoola hu Haroseeti-esya-Abateende, mani eye lyoosi elya Siseera lyeetwa lyoosi lyaawa pe. Abulao kata omusaacha mulala yeeng'ene owadoong'aho daawe.

¹⁷Siseera yeeruha ohwoola lu yoola hu yeema lya Yaeli, omuhasi wa Hebberi Omukeeni, olwohuba Omutuki Yabbini owa Hasoori yali neende omuleembe neende edaala lya Hebberi.

¹⁸Yaeli yatula erwaanyi mani yaachia yaamubukaanira yaamala yaamuboolera ati, “Ewe omuhuluundu yingira sa mukati; yingira sa mu yeema lyaange. Otatya daawe.” Mani yeengira mukati, mani yaamukisa emukoongo w'epasya.

¹⁹Nae yaboolera omuhasi oyo ati, “Ewe nookanya, ndaireho amaachi ng'weeho; obuluwo buunjita.” Omuhasi oyo yeekulao esikiingiro sy'eseero sy'amabeere, mani naamubaaho nang'waaho, haandi naamala naamukisa.

²⁰Haandi Siseera yaboolera omuhasi oyo ati, “Ewe yema sa hu mulyaango kw'eyeema elyo, mani omuundu yeesi niyeecha yaahuteeba omuundu yeesi naali ano, ewe kaana sa oti haba.”

²¹Siseera yali n'ajoong'ere muno endoolo echeemonye nichimuyira. Mani Yaeli yaabukula enyuundo, alala neende esihoongo sy'eyeema, mani niyeboonderera kaala niyoola yaali, namwiitirao naamuhomamo esihoongo sy'eyeema ohuchaakira hu lwaande luundi lw'omutwe ohutulira hu lwaande luundi haandi syaafudula olwaande olwo mani syeengira syaanda aasi mu loba.

²²Mani Bbaraki niyeecha nakoonyaanga Siseera, Yaeli yatula ohumubukaanira, mani yaamuboolera ati, “Ewe yicha sa ano obone! Njia ohuhweekesa omusaacha yooli ohukoonyaanga.” Mani yeengirana neende Yaeli, bakaana Siseera n'alambaalire hu loba, n'amalire ohufwa hale, naali neende esihoongo sy'eyeema nisimubitire mu mutwe, nisiyaandire mu loba.

²³Hu ludaalo lweene olwo, nilwo lu Nasaae yanyalira ohuhoonyera Abaisiraeli ohuyiingira Yabbini, omutuki Mukanani.

²⁴Mani bamufwiinyiriraanga muno ohwoola lu bamusihirisira elalira.