Read saamia Abakayi 6 Bible Online

Abakayi 6 - saamia bible

Abakayi 6

¹Haandi ehabi liindi, abaandu ba Yisiraeli beemao bonoona mu moni w'Omwaami, mani yesi yaaleha abaandu b'obutuki bwa Midia, baabatuka hulw'embaka y'emyaaka kitaanu-na-kibiri.

²Abamidia bali ab'amaani ohuhiraho Yisiraeli, mani abaandu ba Yisiraeli baabeekisa baachia mu ng'uungu, neende mu bituundu biindi ebyalichiingi eby'omuleembe mu ngulu.

³Mani buli lu Baisiraeli bataakaanga ebirime byaabwe, Abamidia beecheraanga alala neende Abameleki, neende enono chiindi chomu syaalo sy'esiparara mani baabaseeta.

⁴Beechaanga mani boombaha ekaambi hu loba ohwo, mani basihirisa ebitaake byoosi ohwoola hu situundu sy'esyaalo siri aambi neende Gasa. Bapeyaanga amakoondi koosi, eng'oombe, neende esuhiri, mani baaleha Abaisiraeli nga babula esiindu syoosi esy'ohwehoonyera mu bulamu.

⁵Beechaanga neende ebituke byaabwe neende amayeema ebiingi biri koti esike. Abeene abo, kata neende engamia chaabwe byalichiingi ebiingi bitabaliha. Beechaanga mani banyaasa esyaalo syoosi,

⁶mani Yisiraeli yiba nga siyiri neende esiindu syoosi si yahanyala ohubaholaho.

⁷Mani abaandu ba Yisiraeli haandi beecha boobba wuuwi eyiri Omwaami abahoonye, abaonie Abamidia,

⁸mani yesi haandi yaabatumira omunabbi wuundi owabaleetera emboosi yino yiti ohutula hu Omwaami, Nasaae wa Yisiraeli: “Ese niise owabatusa mu buhalaabani buwaambe mu Misiri.

⁹Ndabanunula ohutula hu Bamisiri neende hu baandu babalwaanianga nimuli ano bweene, mu syaalo muno. Ndabeerusaanga, eng'we koti lu mwayiingiraanga nimuyiinduula nimwiingira mani mala mbaberesa esyaalo syali esyaabwe esyo.

¹⁰Ese ndaboolera eng'we endi ese niise Omwaami Nasaae weeng'we, haandi endi eng'we mutenamiraangaho banasaae ba Abaamoori, abeene syaalo si mumenyeremo bulaanu. Nae eng'we haba simwambuliraho daawe.”

¹¹Mani malaika w'Omwaami yeemao yeecha hu lukoongo lwa Ofura, yeehala aasi mu siiniha sy'omutuumba okwali okwa Yoasi, omusaacha w'enono ya Abbieseeri. Gidioni omwaana wae yali n'ali ohuhoonjaanga engaano bweekisi naali mu sihunyiro sy'efini, hu Bamidia bahaye ohumubona.

¹²Malaika w'Omwaami yeecha yaamubonehera ebweene eyo yaboola ati, “Omwaami ali naawe, ewe omusaacha mululu, haandi ow'amaani!”

¹³Mani Gidioni yaamuboolera ati, “Niwahaanganya ndateebaho, ewe omuhuluundu, lwasiina mani bino byoosi bitweholehaaneho nikali mbwe ewe Omwaami oli sa naafwe? Siina syeene esyakwa hu biindu biwukisa, bi bakuuka yeefwe batubooleraanga, bi ewe Omwaami wabaholeraanga hale, koti lu wabatusa mu Misiri? Efwe siri mbwe Omwaami yamala ohututa sa mu mahono k'Abamidia ohutuhola koti lu badaha.”

¹⁴Ao bulaanu Omwaami yeemao yaamulagira n'aboola ati, “Ewe mani chia neende amaani kao maangi ako mani onyale ohununula Yisiraeli ohutula hu Bamidia. Ese omweene mbao ndi ohuhutumaanga.”

¹⁵Gidioni nae yamukobolamo ati, “Nae ewe Omwaami, ese syeeng'ene nyala endye ohununula Yisiraeli? Enono yaange niyo eyihiramo obukata mu nono yoosi eya Manaase, haandi ese niise omuhayahaya ohiramo mu nyuumba yeefwe.”

¹⁶Nae Omwaami yaamukobolamo ati, “Ewe onyala sa ohusihola olwohuba ese syeesi njia ohuhuhoonya. Mani ochia ohusaasaka Abamidia bwaangu bweene koti lu bahaba nibali sa omusaacha mulala yeeng'ene.”

¹⁷Haandi Gidioni yamukobolamo ati, “Nikali mbwe wusangaaliire, njekeseho esilolero esyomiisa mbwe ewe niiwe Omwaami mweene.

¹⁸Nookanya mani, otawaao niitahuleetera esiyaanwa sy'esyohulya.” Omwaami yamukobolamo n'aboola ati, “Ese njia ohudoong'a sa ano ohwoola lu onakobola.”

¹⁹Mani Gidioni yeengira mu nyuumba yae, yadeeha embusi njere, mani yehoonyera esideru sy'obusye, ohukaandamo emigaati kitabbaahirwe. Yaabukula enyama eyo mani yaayita mu simweero, neende omunyu mu nuungiro, mani yaabileetera malaika w'Omwaami oyo mu siiniha sy'omutuumba, mani yaamuberesa.

²⁰Malaika oyo yeecha yaamuboolera ati, “Mani geeng'a enyama eyo neende emigaati ekyo hu lwaanda luno, mani omale obichuheho omuunyu.” Gidioni yaahola sa atyo.

²¹Mani malaika w'Omwaami oyo yaakolola omuhono kwae yadiira hu nyama, neende hu migaati neende obusoonjo bw'olusaala lu yali n'adiirire. Omuliro kwabbabbuluha nikutulira mu lwaanda olwo mani kwasaamba enyama eyo neende emigaati ekyo. Mani malaika niyamala atyo, yaakotao sa.

²²Gidioni yesi bulaanu ao yeemao yaamanyira elalira ati hane oyo yali nabereenge malaika mweene w'Omwaami, omuundu yi yali n'abweneenge, yalomaloma n'ateengereha ati, “Ewe Omwaami w'Obunyala bwoosi! Mbao ese mweene mbweene malaika wao emoni-hu-moni!”

²³Nae Omwaami haandi yaamuboolera ati, “Omuleembe kwoong'ene sa. Otatya daawe. Haba soochia hufwa daawe.”

²⁴Mani Gidioni yoombahira Omwaami alutaari abweene ao, yayilaanga, “Omwaami Muleembe nikwo.” (Eyisyeemere mu Ofura, esiko sy'enono ya Abbieseeri ohwoola buti.)

²⁵Mani esiro syeene esyo, Omwaami yaboolera Gidioni ati, “Ewe chia obukule esurusi ya lataao, haandi neende esurusi yiindi ey'emyaaka kitaanu-na-kibiri, mani omale okwiise alutaari ya lataao eyo eya Bbaali, wiiche oteme omaleyo esilolero sy'Aseri nasaae muhasi oyo, esiri endulo wayo.

²⁶Mala otyo mani woombahire Omwaami Nasaae wao alutaari ndai muno, hu sifuumi syeene esyo. Ochie obukule esurusi yiindi eyo oyisaambireho yoosi enaamba koti esiyaanwa, niwehoonyera esilolero sy'Asera sy'otemere syaawaayo esyo koti eehwi.”

²⁷Gidioni yabukula hu bahalaabani bae abaandu ehumi abalaamba, yaachia yaahola sa koti lu Omwaami yali n'amuboleere. Kata katyo yatya muno abaandu bomu daala lyae lyeene alala neende abaandu baandi bali nibamenya mu siko omwo ohumubona n'ahola atyo esideete ng'alang'ala, yahola esiholwa esyo esiro mu siirima.

²⁸Abaandu bali nibamenya mu siko omwo nibasimuha echuli nibuhyeere, besiinduha ohubona bati, ngaandi alutaari yali eya Bbaali, haandi esilolero syali esy'Aseera byoombi byali nibimalire ohulikulwa, haandi neende eng'oombe esurusi yohubiri yira yali niyimalire ohusaambirwa hu alutaari yali yosi niyimalire ohwoombahwa abweene ao.

²⁹Beteebanaho sa abeene-na-beene bati, “Wiina mweene oholere esiholwa sino?” Bemeeda ohuhemeresa ohwoola lu boola ohumanya bati hane, yali naali niye Gidioni omwaana wa Yoasi, owali naaholere atyo.

³⁰Mani baachia eyiri Yoasi, bamuboolera bati, “Ewe tusa omwaana wao erwaanyi eno, humwiite bulaanu buti! Alikule alutaari ya Bbaali, haandi amalire ohutema-tema yakwiisa esilolero sy'Asera esibeechaanga endulo wayo.”

³¹Nae Yoasi yaboolera sa abaandu abo boosi abali nibamuchoomere ati, “Eng'we muli ohuyiinganiraanga Bbaali, kose? Muli ohumukwiraanga, kose? Mani oyo yeesi oli ohumuyiinganiraanga, buchia ohuhya muchuli n'amalire ohwiitwa. Nikali mbwe Bbaali ali nasaae niye, mani lehe omweene yelwaaneho. Ngandi alutaari yae niyo eyikwiisirwe aasi.”

³²Mani ohutula hu ludaalo olwo ohwemeeda mu moni, Gidioni yalaangwaanga sa mbwe Yerubbaali, olwohuba Yoasi yaboola ati, “Lehe Bbaali mweene yelwaaneho; olwohuba alutaari yakwiiswa yali niyiri eyae.”

³³Bulaanu Abamidia boosi, Abamaleki boosi, alala neende enono chiindi choosi echomu syaalo sy'esiparara, chehung'aania alala, mani baambuha Yorodaani, boombaha ekaambi mu Hooho lya Yesireeli.

³⁴Mwooyo w'Omwaami yeecha yaniina Gidioni, yoobba eturumbete ohulaanga abasaacha b'enono ya Abbieseeri ohwiicha ohumuloondaho enyuma.

³⁵Yatuma bawamwaanda baachia basalaanira mu situundu sy'esyaalo sy'ebituundu byoombi bya Manaase babalaange bosi beeche bamuloondeho emukoongo. Yatuma bawamwaanda baachia eyiri enono cha Aseri, Sebbuluuni, neende Nafutaali, mani boosi beecha bamweyambaaniaho.

³⁶Gidioni yaboolera Nasaae ati, “Ewe mbao oboola oti oheengereo ohwehoonyera ese ohuwonia Yisiraeli yoosi.

³⁷Esyo silai sa, mani mbano ndi ohuta obwooya bw'ekoondi buundi hooho hu loba yi hwobbakiraanga engaano. Nikali mbwe nibuhya echuli muchuli olume luchia ohuba nilwaamire hu bwooya bw'ekoondi buno bwoong'ene, nae nilutaamire hu loba, ao niwo yi ese njia ohumanyira elalira endi hane ewe ochia ohundehoonyera ohununula Yisiraeli.”

³⁸Mani esyo nisyo sa esyaholehana sityo. Muchuli, Gidioni yasimuha, yasiingira echuli muno yachia yadiinya obwooya bw'ekoondi bula yadiinyululamo olume luyera ohwiichusa ebbakuli enaamba ey'amaachi.

³⁹Bulaanu Gidioni yeemao yaboolera Nasaae ati, “Ewe otaanyoolerera daawe; ndeheho haandi mbooleho emboosi ndala yiti yoong'ene. Ndeheho holeho esiteemo siindi silala syoong'ene nindehoonyera haandi obwooya bw'ekoondi buno. Mani hu luno, hola obwooya buno bube obubalakafu bweene muchuli, nae hu loba hube nihudyeeka olume.”

⁴⁰Haandi mu siro syeene esyo, Nasaae yahola sa esiindu si Gidioni yali n'aboolere. Echuli nibwahya, obwooya bw'ekoondi obwo bwali nibuli obubalakafu bweene, nae hu loba hwali nihudyeeka-budyeeka olume.