Read saamia Abakayi 7 Bible Online

Abakayi 7 - saamia bible

Abakayi 7

¹Ludaalo luundi Gidioni neende abasaacha bae boosi basiingira echuli muno mani baachia boombaha ekaambi hu ndulo w'Ediba lya Harodi. Nae ekaambi y'Abamidia yali yiri mu hooho eliri emukulu waabwe aambi neende Esigulu sya Moore.

²Omwaami yeemao yaboolera Gidioni ati, “Abasaacha ba wiichire nabo babitiirifu muno batahanyala ohuhoonya baanyala ohuyiingira Abamidia. Olwohuba baba bachia ohubaasa bati abeene nibo abanyalire ohuyiingira sa hulw'obuungi bwaabwe hu bwaabwe, mani bahaye ohusiima ese kata nabudiidi.

³Ewe chia olaangirire eyiri abaandu abo oti, ‘Oyo yeesi olihoomo obuti, ahoyere ohukobola engo omweene, mani efwe hundoong'e nihuli hu Lugulu lwa Gileadi huno.’ ” Mani ao, abaandu elifu amahumi kabiri-na-chibiri (22,000) nibakobola engo, nae abaandu elifu ehumi (10,000) nabo nibadoong'a.

⁴Haandi Omwaami yeemao yaboolera Gidioni ati, “Ewe osisiiri sa neende abaandu ababitiirifu obuungi. Mani babukule boosi obayire hu mwaalo, eyo niyo yi njia ohuhubaloboleramo haandi. Nimwoola eyo, nindahubooleraanga endi omuundu lebe niye oba achie nawe, oyo niye onanyalaanga ohuchia nawe. Nae nihuboolera endi omusaacha lebe haba s'ahoyere ohuchia nawe, oyo haba s'aba nanaachie nawe daawe.”

⁵Gidioni yabukula abasaacha abo boosi yaachia nabo eyiri omwaalo, mani Omwaami yamuboolera ati, “Kabula buli oyo yeesi ohoomberera amaachi neende olulimi lwae koti embwa, omutuse eyiri oyo yeesi osigama hu mahuumbo kae mani yaang'wa-bung'wa amaangi.”

⁶Abasaacha boola emia chidatu (300) boong'ene nibo abanyala ohudaulaanga amaachi mu mahono kaabwe hu banyala ohuhoomberera neende olulimi; nae abadoong'ereo boosi basigamaanga sa hu mahuumbo kaabwe, hu bang'we amaachi maangi.

⁷Omwaami yeemao yaboolera Gidioni ati, “Ese njia ohuhuwonia, mani nyale ohuhuhoonya oyiingire Abamidia nindehoonyera abasaacha bano emia chidatu (300) boong'ene abahombereere amaachi neende enimi chaabwe sa koti embwa. Mani boolera abasaacha baandi badoong'ereo boosi ohukobola engo.”

⁸Gidioni yaseebula Abaisiraeli boosi badoong'ereo baakobolayo engo, ohutusaho emia chidatu (300) bala, ni abadoong'a alala neende ebilwaaniso byaabwe byoosi haandi alala neende eturumbete cheene. Ekaambi y'Abamidia nayo yali aasi waabwe, niyiri mu hooho sa.

⁹Mani esiro syeene esyo, Omwaami yeemao yalagira Gidioni ati, “Ewe siingira oseete ekaambi eyo; Njia ohuhoonya oyiyiingire.

¹⁰Nae nooba notiire ohuseeta, chia sa eyiri ekaambi eyo, ewe omweene neende Puura, omuhalaabani wao oyo.

¹¹Muchia ohunyala ohutekeeresa muwulire ebyo byoosi bi bali ohuteesa, hu mani onyoole obwomiifu bw'ohuseeta.” Gidioni alala neende Puura omuhalaabani wae beehirira baachia boola hu lwaaho bweene lw'ekaambi y'omusuku eyo.

¹²Mani Abamidia, Abamaleki, alala neende abasaacha b'enono chomu siparara, bali nibaandakalaale mu hooho nibali koti eyiicho ly'esike, haandi bali neende engamia enyiingi chiri koti emoni ch'omusenye kuli hu lwaasi lw'enyaanja.

¹³Gidioni niyoolayo, yawulira omusaacha wuundi n'akaniaayiraanga owaasye esilooto si yali nalootere. Yali n'aboolaanga ati, “Ese ndootere endi omugaati mulala kw'obusye bwa ‘amabere masuungu,’ kuserengeete sa nikwiicha mu kaambi yeefwe yino, nikutwooma eyeema. Eyeema elyo lyaakwa mani lyalambaala aasi hu buloba.”

¹⁴Owaasye oyo nae naamukobolamo ati, “Olwo mbaasa sa bulai bweene endi lu beere olugaanga lw'Omuisiraeli lweene, Gidioni omwaana wa Yoasi! Sisinyala ohuba nisyeekesa esiindu siindi daawe! Mbao Nasaae amalire ohumuberesa amaani ohuyiingira Midia yoosi, alala neende eye lyeefwe lyoosi!”

¹⁵Gidioni niyawuliraho atyo, esilooto sy'omusaacha oyo, neende koti amahuluundu kasyo kali, yakwa hu mahuumbo mani niyeenamira Omwaami abweene ao. Mani yaatula ao, yaakobolayo engo mu kaambi y'Abaisiraeli yaamala yaboola ati, “Eng'we siingire! Omwaami nguno ali ohubaberesa ehabi ohuyiingira eye ly'Abamidia!”

¹⁶Yeecha yaabukula abasaacha bae emia chidatu (300) abo boosi yabakabulamo emikaanda kidatu mani naakaba buli muundu eturumbete ndala-ndala, neende enjaagi yirimo emuli ch'omuliro.

¹⁷Yeemao yaababoolera ati, “Ese ninjola sa endi hu lwaaho lw'ekaambi, eng'we muundewunjaanga bulai mani muholaanga sa buli siindu si mba niihola.

¹⁸Mani omukaanda kwaange neende ese mweene ni huubba eturumbete, mani mwesi muba muchia ohuchaaka ohuubba echeeng'we nimweebodoohaanie ekaambi mani nimwehuuma muti, ‘Hulw'Omwaami neende hulwa Gidioni!’ ”

¹⁹Bulaanu, Gidioni alala neende abasaacha bae bala emia ndala beecha boola hu lwaaho bweene lw'ekaambi obwiire nibuli aambi ohwoola esiro akatikaati, omuliindi niyahamala ohukaluuhanisibwa. Mani beyiinga ohuubba eturumbete chaabwe, haandi nibaatirao enjaagi chaabwe chi bali nibakiingire,

²⁰nae emikaanda kiindi kibiri kira kyosi nikiicha nikihola nasilala koti bano bali nibaholere. Boosi bulaanu nibeecha nibadiirira emuli chaabwe echio mu mihono mikaada, nae eturumbete nichiba mu mihono miluungi, mani nibeecha ni bahuuma bati, “Era mbao, olugaanga lw'Omwaami, neende olugaanga lwa Gidioni!”

²¹Buli muundu yeema sa abuundu yi yalichiingi nibebodoohaanie ekaambi, nae eye lyoosi ely'omusuku niliiruha niliwaao nilyuubba wuuwi.

²²Mani abasaacha ba Gidioni nibali nibobbaanga eturumbete chaabwe, Omwaami nae yahola abalwaani basuku abo baseetana abeene-na-abeene neende engaanga. Beeruha nibachoomere Saretaani, ohwoola hu Bbeeti Siita, haandi ohwoola hu siko sya Abbeli-Mehola aambi neende Tabbati.

²³Bulaanu abasaacha ohutula mu nono cha Nafutaali, Aseri, neende ebituundu byoombi ebya Manaase beemao balaangwa baalobolwamo mani baloonda embiro hu Bamidia.

²⁴Gidioni mweene yesi yatuma bawamwaanda bae baachia mani basalaanira mu syaalo sy'ebigulu-gulu sya Efuraimu ohulangaanga abaandu nibababooleraanga bati, “Eng'we mutule mwiihirire mwiiche mulwaanie Abamidia. Mwiikalire Omwaalo kwa Yorodaani kwoosi, neende emyaalo midiidi-diidi ohwoola hu Bbeetibbaara, mukaire Abamidia ohukyaambuha!” Abaandu ba Efuraimu baabalaanga baababuusa alala, mani beekalira Omwaalo kwa Yorodaani, alala neende emyaalo midiidi-diidi kiindi kyoosi ohwoola hu Bbeetibbaara.

²⁵Baanyala ohuwaamba abaami Bamidia babiri, Orebbu neende Seebbu; beetera Orebbu hu Lwaanda lwa Orebbu, nae Seebbu bamwiitira hu Esihunyiro Sy'Efiini sya Seebbu. Bemeeda sa ohwoonga hu Bamidia nae abaandi nabo nibakiinga nibaleeta emitwe kya baabwe Orebbu neende Seebbu eyiri Gidioni, owali bulaanu naali ebukwe wa Yorodaani.